Aıtýly sharaǵa elimizdiń ár óńirinen jáne Reseıden meımandar qatysty. Esimi elge jaqsy tanymal tulǵany saltanatty ulyqtaý Manash Qozybaevtyń eskertkishine gúl shoqtaryn qoıýdan bastaldy.
«Manash Qozybaev – elimiz táýelsizdik alǵannan keıin ult tarıhyn jańasha paıymmen jan-jaqty zerdelegen ǵalymdardyń biregeıi. Qaıratkerdiń qaldyryp ketken ǵylymı eńbekteri óskeleń urpaq úshin óte mańyzdy. Jas býyn ókilderi akademıktiń jazǵan tarıhı eńbekterinen nár alyp keledi. Bilim ordasynda stýdentterdiń qatysýymen konferensııalar jıi ótedi», dedi ýnıversıtet rektorynyń mindetin atqarýshy Erbol Isaqaev.
Egemendik pen táýelsizdik jolynda zor eńbek sińirgen Manash Qabashulynyń murasy jan-jaqty zerttelip keledi. Shákirti, L. Gýmılev atyndaǵy EUÝ professory, tarıh ǵylymdarynyń doktory Tilegen Sadyqovtyń aıtýynsha, mundaı mazmundaǵy sharalar uly ǵalymnyń rýhyna kórsetilgen úlken qurmet bolyp tabylady. Ol kisiniń artyna qaldyrǵan murasy men eńbekterin óskeleń urpaq keńirek bilip, tereńirek ıgergeni durys deıdi.
Ult tarıhynyń tamyryn tereńnen izdegen ǵalym kózi tiri bolǵanda talaı syrdy ashar edi deıdi izbasarlary. Ol kisiniń qol astynda eńbek etip, birlese ǵylymı jumystar jazǵan ǵalymdardyń biri – Zırabúbi Tólenova. Ol Sh. Ýálıhanov atyndaǵy Tarıh jáne etnologııa ınstıtýtynan arnaıy kelip, jyly lebizderimen bólisti.
Belgili ǵalymnyń 88 jyldyǵyna oraı ýnıversıtet aýmaǵynda stýdentter alleıasy ashyldy.
Soltústik Qazaqstan oblysy
