Keshe Aqordada Memlekettik hatshy Marat Tájın elimizdiń úzdik jýrnalısterine Qazaqstan Respýblıkasy Prezıdentiniń buqaralyq aqparat quraldary salasyndaǵy syılyqtary men granttaryn tabys etti, sondaı-aq Alǵysyn jarııalady.
Memlekettik hatshy elimizdiń buqaralyq aqparat quraldary ókilderin kásibı merekelerimen – Baılanys jáne aqparat qyzmetkerleri kúnimen quttyqtaı kele, táýelsizdik jyldary otandyq aqparat quraldary úlken joldan ótkenin atap kórsetti.
«Bul marapat kásibı sheberligimen erekshelengen eń tańdaýly jýrnalısterge beriledi. Baspasóz ókilderin yntalandyrýǵa arnalǵan osy shara jyldaǵy jaqsy dástúrge aınaldy. Biz elimizdiń buqaralyq aqparat quraldarynyń deńgeıi bıik jáne memleketshil bolýyna múddelimiz. «Halyqtyń kózi, qulaǵy hám tili» dep Ahmet Baıtursynov aıtqandaı, baspasózdiń qoǵamdaǵy róli zor. BAQ qazirgi jahandaný dáýirinde memlekettilikti saqtaýǵa, táýelsizdikti nyǵaıtýǵa, halyqty ortaq maqsatqa toptastyrýǵa yqpal etýge tıis», dedi Memlekettik hatshy óz sózinde.
Sondaı-aq, ol elimizdegi tynyshtyq pen turaqtylyqty saqtaýda jýrnalıst qaýymǵa júkteler jaýapkershilik zor ekenin, Qazaq eliniń irgesi keńeıip, mártebesiniń artýyna da jýrnalıster úlken úles qosqanyn atap ótti.
«О́ziniń berik ornyn tapqan kóshbasshylar qalyptasty. Medıakeńistik qarqyndy damýyn jalǵastyrýda. Sońǵy ýaqytta birneshe respýblıkalyq telearnalar ashylǵanyn bilesizder. Otandyq ınternet-resýrstar sany óte jedel qarqynmen kóbeıip keledi. Sondaı-aq, sapaly jańarý mindeti birinshi orynǵa shyqty», dedi Marat Tájın bul rette.
Bul kúni Memlekettik hatshy qazirgi zamanǵy medıa salasynda bolyp jatqan ózgeristerge qaramastan, jýrnalıstıkanyń negizgi qundylyqtary burynǵysynsha shynaıylyq, dáldik jáne baıypty aqparat bolýy tıis ekenin de atap ótti. Sondaı-aq, ol jýrnalısterge arnalǵan Prezıdent syılyǵy men grantynyń budan 16 jyl buryn taǵaıyndalǵanyn, jyl ótken saıyn bul baıqaýdyń mańyzy men deńgeıiniń ósip kele jatqanyn alǵa tartty. «Bıyl úmitkerlerge qoıylatyn talap aıtarlyqtaı arta tústi. Sondyqtan, marapatqa búgin eń laıyqty, úzdik jýrnalıster men ujymdar ıe boldy dep esepteımin», dedi M. Tájın. Osy oraıda bıyldan bastap prezıdenttik nagradanyń bedelin jáne mánin arttyrý maqsatynda jýrnalısterge jyl saıyn eki syılyq jáne eki grant beriletin bolsa, alǵys tórt shyǵarmashylyq ujymǵa jarııalanatynyn atap kórsetken jón.
Sonymen, bıylǵy jylǵy Qazaqstan Respýblıkasy Prezıdentiniń syılyqtarymen «Alash aınasy» gazetiniń bas redaktory Serikbek Janbolat, «Eýrazııa» birinshi arnasynyń bas dırektory Sergeı Kıselev marapattaldy. Qazaqstan Respýblıkasy Prezıdentiniń granttary «Habar» telearnasynyń aqparattyq baǵdarlamalar bóliminiń tilshisi Artem Istomınge, «Astana» telearnasynyń arnaýly jobalar bóliminiń prodıýseri Áıgerim Ábildınaǵa berildi.
Al Prezıdent Alǵysy «Aqtıýbınskıı vestnık» jáne «Drýjnye rebıata» gazetteriniń shyǵarmashylyq ujymdaryna, sonymen qatar, «Alaý» teleradıokompanııasy men «Tengrinews.kz» aqparattyq portalynyń ujymdaryna jarııalandy.
Bul kúngi saltanatty rásim aıasynda marapatqa ıe BAQ ókilderi de sóz alyp, ózderine kórsetilgen qurmet úshin alǵystaryn bildirdi. Máselen, «Alash aınasy gazetiniń bas redaktory Serikbek Janbolat Memleket basshysynyń eldiń básekege qabilettiligin arttyrý jónindegi saıasaty qazirgi bıik talaptarǵa saı bolýǵa tıisti otandyq buqaralyq aqparat quraldary qyzmetine de qatysty ekenin atap ótti. «Memleket basshysyna osyndaı joǵary nagrada úshin alǵysymdy bildiremin. Bul bizdiń ujymnyń ǵana eńbegi emes, elimizdiń táýelsizdigin jáne onyń ósip-órkendeýin nyǵaıtýǵa baǵyttalǵan barsha qazaq jýrnalıstıkasyna kórsetilgen qurmet dep sanaımyn», dedi S. Janbolat.
Al «Alaý» teleradıokompanııasynyń dırektory Zýlfııa Arefeva kórsetilgen qurmet úshin alǵysyn aıta kele, qazirgi ýaqytta otandyq, onyń ishinde óńirlik jýrnalıstıkany damytýǵa barlyq jaǵdaı jasalyp otyrǵanyna, jýrnalıstıkanyń basty maqsaty barsha qazaqstandyqtardy elimizdiń damýyna qyzmet etýge shaqyrý bolyp tabylatynyna toqtaldy. Balalardyń respýblıkalyq «Drýjnye rebıata» gazetiniń bas redaktory Álimjan Akbarov ózi basqaryp otyrǵan basylymnyń shyǵa bastaǵanyna 80 jyl tolatynyn tilge tıek ete kele, búgingi kúni «Baldyrǵan», «Aq jelken», «Ulan» jáne «Drýjnye rebıata» tárizdi baıyrǵy balalar basylymdaryn tek saqtap qana qoımaı , sonymen birge, odan ári damytýǵa múmkindik týǵanyn jetkizdi.
Kezdesý sońynda Marat Tájın BAQ ókilderine qyzmette shyǵarmashylyq tabys tilep, laýreattar men grant ıegerleri Memleket basshysynyń zor senimin aqtaıtynyna senim bildirdi.
Láıla EDILQYZY,
«Egemen Qazaqstan».
