Abaı – álem tilderinde

Ádebıet • 27 Qarasha, 2019

Abaı – álem tilderinde

Qazaq ulttyq agrarlyq ýnıversıtetinde Uly aqyn Abaı Qunanbaevtyń 175 jyldyǵyna oraı uıymdastyrylǵan «Abaı – álem tilderinde» mánerlep oqý baıqaýynyń sheshýshi týry ótti.

Aıgúl AHANBAIQYZY

Baıqaýǵa mádenıet jáne óner salasynyń mamandary, ádebıetshiler, tájirıbeli aýdarmashylar jáne sahna sheberlerinen quralǵan qazylar alqasy tórelik etti. Sonymen qatar M.Áýezov atyndaǵy Ońtústik Qazaqstan memlekettik ýnıversıtetiniń rektory Darııa Qojamjarova, belgili qoǵam jáne memleket qaıratkerleri, abaıtanýshy ǵalymdar, joǵary oqý oryndarynyń tárbıe salasynyń jetekshileri, qalanyń belsendi jastar qaýymy qonaq retinde qatysty.

Jıyndy QazUAÝ rektory, akademık Tilektes Isabaıuly Espolov ashty. Tilektes Isabaıuly: «Aldaǵy 2020 jyly Qazaqstan Respýblıkasy Prezıdentiniń Jarlyǵymen halqymyzdyń dana tulǵasy, Uly Abaıdyń 175 jyldyq mereıtoıy keńinen atap ótiledi.

Bizdiń ýnıversıtetimizdiń 90 jyldyǵy osy úlken merekemen sáıkes kelip otyr. Biz muny jaqsy yrymǵa balap otyrmyz. О́ıtkeni Abaı – qazaq halqynyń ǵana maqtanyshy emes, ol – búkil Túrki dúnıesine ortaq rýhanı qubylys, álemdik tulǵa.

Búgin osy baıqaýdyń qorytyndy saltanatty sharasyna jınalyp otyrmyz. Bul baıqaý jastardyń ulttyq sanasyn jańǵyrtýdy, uly Abaı shyǵarmalaryn urpaq arasynda keńinen nasıhattaýdy, stýdentterdi álem tilderin úırenýge yntalandyrýdy, joǵary oqý oryndarynda bilim alýshy jastardyń rýhanı baılanysyn arttyrýdy kózdeıdi».

Sharany Qazaq ulttyq agrarlyq ýnıversıteti «ALQA Foundation» halyqaralyq mádenıet qory, Qazaqstan halqy Assambleıasy jáne Dostyq úıimen birlesip uıymdastyrdy. 2019 jyldyń qazan aıynda Almaty qalasy joǵary oqý oryndarynyń stýdentteri arasynda «Abaı – álem tilderinde» atty mánerlep oqý baıqaýy jarııalanǵan bolatyn.

Baıqaý stýdent jastardyń ulttyq sanasyn jańǵyrtýda ádebıettiń ornyn nyǵaıtyp, oǵan qyzyǵýshylyǵyn arttyrý, jastar arasynda uly Abaı shyǵarmalaryn nasıhattaý, stýdent jastardyń álem tilderin úırenýge yntasyn arttyrý, jastardyń shyǵarmashylyq áleýetin damytý, polımádenıetti tulǵa qalyptastyrý, joǵary oqý oryndarynda oqıtyn stýdent jastardyń rýhanı baılanysyn arttyrýdy kózdeıdi.

Baıqaýdyń irikteý týrynda Almaty qalasynyń 12 joǵary oqý ornynan 21 qatysýshy ónerlerin ortaǵa saldy. Konserttik baǵdarlamamen órnektelgen sharada stýdentter Abaı Qunanbaevtyń óleńderin qazaq, orys, aǵylshyn jáne taǵy basqa tilderde oqydy.

«ALQA Foundation» halyqaralyq mádenıet qorynyń Prezıdenti Alýa Tańjaryqova tórelik etken qazylar alqasynyń quramynda Egıpet mádenı jáne bilim berý isteri boıynsha attashe, doktor Randa Mahmýd Rızk, O.Súleımenov atyndaǵy áleýmettik-gýmanıtarlyq bilim berý jáne tárbıe ınstıtýtynyń dırektory Esenkeldi Medeýov, Qazaqstan-Brıtan tehnıkalyq ýnıversıtetiniń professory Janat Dáýletbekova, A.Baıtursynov atyndaǵy Til bilimi ınstıtýtynyń ǵylymı qyzmetkeri, túrkolog Tımýr Talǵatuly boldy.

Baıqaýdyń sheshýshi kezeńinde jeńimpazdarǵa júldeli oryndar men syılyqtar tabys etildi. Bas júlde jáne 100 myń teńge syıaqyny Botakóz Ivash (Abylaıhan at. QazHQjÁTÝ), 1 dárejeli dıplom jáne 50 myń teńge syıaqyny Narıman Baqytjan (Abaı at. QazUPÝ), Ulpan Joldasbekova (QazUAÝ), 2 dárejeli dıplom men 25 myń teńge syıaqyny Qarjaýbaı Qanaǵat (Nur-Múbárak Egıpet ıslam mádenıeti ýnıversıteti), Aqbota Silám (S.Demırel at. ýnıversıtet), 3 dárejeli dıplom men 15 myń syıaqyny Aıan Joldyǵalıev (Nur-Múbárak Egıpet ıslam mádenıeti ýnıversıteti), Aıgerim Maratqyzy (Abaı at. QazUPÝ), Aıgúl Júsipqalıeva (S.Asfendııarov atyndaǵy QazUMÝ) ıelendi.

Sonymen qatar O.Súleımenov atyndaǵy áleýmettik-gýmanıtarlyq bilim berý jáne tárbıe ınstıtýtynyń dırektory Esenkeldi О́mirjanuly QazUAÝ rektory Tilektes Isabaıulynyń atynan taǵaıyndalǵan arnaıy júldeni (50 myń teńge) Karıma Battalovaǵa (Ál-Farabı atyndaǵy QazUÝ) tabys etti. Barlyq qatysýshylar gramotalarmen, joǵary oqý ornynan kelgen jetekshiler sertıfıkattarmen, syılyqtarmen marapattaldy.

Shara sońynda «ALQA Foundation» halyqaralyq mádenıet qorynyń Prezıdenti Alýa Tańjaryqova jıyndy qorytyndylady, Qazaqstan halqy Assambleıasynyń sarapshysy Gúlmıra Bılıalova quttyqtaý sóz sóılep, barlyq qatysýshylarǵa Assambleıa atynan kitaptar tabys etti.