Nıderland Koroldiginde Birikken Ulttar Uıymy Turǵyn halyq salasyndaǵy qorynyń (UNFPA) jáne BUU Adam quqyqtary jónindegi joǵarǵy komıssary basqarmasynyń uıymdastyrýymen Adam quqyqtary boıynsha halyqaralyq konferensııa ótti.
Halyqaralyq qaýymdastyq tarapynan úlken mánge ıe bul is-sharaǵa Qazaqstan Respýblıkasy Parlament Májilisiniń depýtaty, Qazaqstan Prezıdenti janyndaǵy Adam quqyqtary jónindegi komıssııa tóraǵasy Qýanysh Sultanov qatysty. Alqaly is-sharaǵa jergilikti úkimet músheleri, halyqaralyq uıymdar, azamattyq qoǵam jáne BUU ókilderi, arnaıy sarapshylar men adam quqyqtaryn qorǵaý salasyndaǵy qaıratkerler atsalysyp, jalpy alǵanda, 130 memleketten kelgen 300-den astam qatysýshy jumyldyryldy.
Is-shara aıasynda Qazaqstan Respýblıkasy Prezıdenti janyndaǵy Adam quqyqtary jónindegi komıssııa tóraǵasy Q.Sultanovtyń BUU Bas hatshysynyń orynbasary laýazymyndaǵy Turǵyn halyq salasyndaǵy qorynyń Atqarýshy dırektory Babatýnde Osotımehınmen, Nıderland Parlamenti Senaty tóraǵasynyń orynbasary Hans Frankenmen ekijaqty kezdesýi ótti.
Q.Sultanov B.Osotımehınmen kezdesý barysynda adamnyń jáne azamattyń quqyqtary men bostandyqtarynyń kepildigin qamtamasyz etý, jappaı teńdikti saqtaý Qazaqstan Respýblıkasy basty qundylyqtarynyń biri bolyp tabylatynyn aıryqsha atap ótti. Bul baǵytta júzege asyrylyp jatqan memlekettik saıasattan tys, BUU tarapyna álemdi alańdatyp otyrǵan ózekti máselelerdi sheshýge barynsha járdem etýshi Qazaqstannyń halyqaralyq, aımaqtyq qaýipsizdik pen turaqtylyqqa qosqan aýqymdy úlesi týraly aıtyldy.
H.Frankenmen kezdesý barysynda eki eldiń parlamentaralyq yntymaqtastyǵyn tereńdetý múmkindikteri talqylanyp, ekijaqty jáne kópjaqty árekettesý kún tártibindegi mańyzdy da ózekti máseleler boıynsha pikir almasyldy, dep habarlady QR SIM-iniń baspasóz qyzmeti.
