Qoǵam • 04 Jeltoqsan, 2019

SOS Qazaqstan balalar aýyldaryna – shırek ǵasyr

38 retkórsetildi

Elordadaǵy «Astana Opera» memlekettik opera jáne balet teatrynda «SOS Qazaqstan balalar aýyldary» korporatıvtik qorynyń 25 jyldyǵyna arnalǵan saltanatty jıyn ótti.

Jıynǵa Premer-Mınıstrdiń orynbasary Berdibek Sapar­baev qatysyp, Úkimettiń atynan balalar aýyl­daryna noýtbýktar syılady. Sondaı-aq, birqatar azamatqa Prezıdent Q.Toqaev pen Premer-Mınıstr A.Mamınniń alǵys hattaryn tapsyrdy.

Atap aıtqanda, «SOS Qazaqstan balalar aýyldary» qorynyń qurmetti prezıdenti Sara Alpysqyzy, SOS Children`s Villages International dırekto­rynyń orynbasary Tom Malvet jáne SOS Balalar aýyldarynyń halyqaralyq aımaqtyq ókili Zdenko Sedlar Memleket basshysy Qasym-Jomart Toqaevtyń alǵys hatymen marapattalsa, «SOS Qazaqstannyń balalar aýyldary» KQ Qamqorshylyq keńesiniń tóraıymy Dınara Qulybaeva, qor­dyń Qamqorshylyq keńesiniń múshe­leri  Aıdyn Rahymbaev, Nurlan Sma­ǵu­lov, Ásel Tasmaǵambetovalar Prem­er-Mınıstrdiń alǵys hatyna ıe boldy.

«Balalar­ǵa qamqorlyq jasap, kómektesý – árbir adam­nyń azamattyq boryshy. 25 jyl buryn qıyn-qystaý kezeńde Sara Alpys­qy­zynyń basshylyǵymen Qazaqstanda qor­ǵalǵan aýyldar paıda boldy. Osy ýa­qyt­tyń ishinde 500-ge jýyq ata-anasyz qalǵan balalar ózderiniń otbasyn qu­ryp, qazir Qazaqstannyń túkpir-túkpirinde eńbek etip jatyr. Búginde anasynyń bas­taǵan jumysyn Dınara Nursultan­qyzy ári qaraı jalǵastyryp, osy qor­dyń kó­­megimen kóptegen ata-anasyz qalǵan ba­lalar qamqorlyqqa ıe bolyp jatyr. Úkimettiń atynan qordyń qyzmet­ker­lerine, demeýshilerine úlken rahmet aıta­myn», dedi Vıse-premer.

Keshte Sara Alpysqyzynyń qut­tyq­taý sózin oqyǵan «SOS Qazaqstan bala­lar aýyldary» korporatıvtik qory Qam­qorshylyq keńesiniń birinshi tóraǵasy Galına Sývorova ıdeıa avtorynyń jyly lebizin jetkizdi. «25 jyl buryn Elbasy Nursultan Ábishuly resmı sapary kezinde meni SOS Kinderdorf International Aýstrııa qorynyń ókilderimen tanystyrdy. 1999 jyly uly gýmanıst German Gmaınerdiń soǵysta ata-analary qaza tapqan balalarǵa arnap salǵan aýylyna bardym. Bıyl aýstrııalyq qor 70 jyldyǵyn atap ótýde. Kórgen dúnıemnen erekshe áser aldym, ondaǵy adamdar qatty unady. Sóıtip Qazaqstanda jańa úlgidegi balalar úılerin salý boıynsha SOS Kinderdorf International-men yntymaqtasý ıdeıasy oıǵa keldi. Bizdiń SOS aýyldardaǵy analar men balalardyń qaýyshýyn árdaıym qýana eske alamyn. SOS analarymyzǵa balalarǵa qamqorlyq tanytqany úshin erekshe alǵysymdy bildiremin», delingen hatta.

SOS balalar aýyly – otbasylyq tıptegi balalar úıi. Birneshe shańyraqtan quralyp, ár shańyraqty bir-bir SOS ana nemese SOS ata-ana ustaıdy da olar balalar úıinen kelgen jasóspirimderdi baýyryna basady. Bir otbasynda bastary qosylǵan balalar bolsa bir-birimen týǵan baýyrdaı bolyp, SOS ananyń nemese SOS ata-ananyń tárbıesin kórip ósedi. Eń alǵash mundaı balalar úıin 1949 jyly German Gmaıner esimdi dáriger Aýstrııanyń Imste qalasynda ashty. Ol Ekinshi dúnıejúzilik soǵystan keıin jetim qalǵan balalardy ash-jalańash qaldyrmaı, aman-saý ósirýdi kózdegen edi. Búginde SOS balalar aýyly álemniń 130-dan astam elinde jumys isteıdi.

«SOS Qazaqstannyń balalar aýyldary» korporatıvtik qory 1994 jyly mem­lekettik emes áleýmettik uıym retinde SOS Children’s Villages International ha­lyqaralyq uıymynyń qoldaýymen, Sara Alpysqyzynyń bastamasymen qurylǵan. 2018 jyldan bastap «Nursultan Nazar­baevtyń Bilim berý qory» qoǵamdyq qorynyń dırektory Dınara Qulybaeva «SOS Qazaqstan balalar aýyldary» KQ Qamqorshylyq keńesiniń tóraıymy jáne quryltaıshysy boldy. Elimizde SOS balalar aýyly Almaty, Nur-Sultan jáne Temirtaý syndy úsh qalada bar. 25 jylda úsh aýyldan 581 jetim bala tárbıelenip shyqsa, onyń 296-sy ózin ózi qamtamasyz etetin jastardyń qataryna qosylǵan. Bul jastardyń 95%-y joǵary jáne orta arnaıy bilim alsa, 68%-y turǵyn úımen qamtamasyz etilgen. Qazir «SOS Qazaqstannyń balalar aýyldarynda» 200-den asa bala turady.

 

Sońǵy jańalyqtar

Táýelsizdik – tuǵyrym

Aımaqtar • Keshe

Jas otbasylar baspanaly boldy

Aımaqtar • Keshe

Kúlki kerýeni № 25

Rýhanııat • Keshe

Uqsas jańalyqtar