«TURAN» etno-folklorlyq ansambli – elimizdiń ulttyq mýzykalyq murasyn jańǵyrtyp, umyt bola bastaǵan tól aspaptardyń súıemeldeýimen kóne kúı-jyrlardy nasıhattap júrgen biregeı top. Onjyldyq tarıhy bar óner ujymy qazaq mýzykasyn álemge áıgilep, 70-ten astam shet memlekette 600-den astam jeke konsert bergen. Ansambldiń álemniń eń ataqty «Karnegı holl», «Kennedı ortalyǵy», «Konsert haýs», «Kreml saraıy», «Salle Korto» zaldarynda óner kórsetkenin aıtýymyz kerek.
Folklorǵa qyzyqpaıtyn kórermenniń ózi «TURAN» dese eleńdep turatyny bar. Sebebi olar mýzykalyq aspaptardyń dybysyn qazirgi zamanǵa saı laıyqtap, jańa formatta usynady. Uly dalany dúbirge toltyrǵan barlyq kórinisti kórermenniń kóz aldyna keltirip, zamana rýhyn sezindiredi. Olar – Maqsat Medeýbek, Serik Nurmoldaev, Baýyrjan Bekmuhanbetov, Erjigit Álıev jáne Jantý Dadabaev syndy talantty mýltı ınstrýmentalıst mýzykanttar. Halqymyzda otyzdan astam ulttyq mýzykalyq aspap bolsa, mýzykanttardyń árqaısysy solardyń birnesheýinde oınaýdy meńgergen.
Keshegi esep berý konsertterinde de «TURAN» ózderine tán stılmen, mazmunmen zaldy óner nuryna bóledi. Olar oryndaǵan «Orteke», «Aqsaq qulan», «Kerýen», «Kóroǵly», «Baqsy» kúıleri kórermenderge sahna artynda turǵan úlken ekran arqyly kórinistermen ádiptelip, árlenip, jańa pishinmen túrlenip jetti. Tanymal bes jigit jaı ǵana oryndaı salmaıdy. Keıde úlken, keıde kishigirim teatrlandyrylǵan kórinis jasaıdy. Sol zamannyń rýhyn tiriltkendeı bolady.
«TURAN» tobyn tek qana folklorlyq shyǵarmalardy oryndaýshylar desek, qate bolar edi. Olar jańa zaman kompozıtorlarynyń da shyǵarmalaryn oryndaıdy, ózderi de mýzyka jazady, árleıdi. Shyǵarmashylyq keshterinde olar N.Tilendıevtiń «Aqqý», A.Raıymqulovanyń «Shabyt» shyǵarmalarymen qatar ózderiniń tól týyndylaryn da qalyń jurtshylyqqa usyndy.
Konsertte toptan bólek Nur-Sultan qalasy ákimdigi memlekettik akademııalyq fılarmonııasynyń sımfonııalyq orkestri, Astana musical memlekettik teatry, Qazaq ulttyq horeografııa akademııasynyń ártisteri de óner kórsetti.
