Qansonarda búrkitshi shyǵady ańǵa,
Tastan túlki tabylar ańdyǵanǵa.
Jaqsy at pen tatý joldas – bir ǵanıbet.
Yńǵaıly yqsham kıim ańshy adamǵa, – dep jyrlaǵan uly Abaıdyń ózi de saıatshylyqty jaqsy kórgeni, Qarasholaq, Kókshegir atty qustary bolǵany belgili. Osy rette hakimniń 175 jyldyq mereıtoıy qarsańynda Úrjar aýdanynyń Kókterek aýylynda aýdandyq qusbegiler saıysy ótti. «Buǵan deıin aýdanymyzda respýblıkalyq búrkitshiler básekesin ótkizgenbiz. Al aýdandyq qusbegiler baıqaýyn alǵash ret uıymdastyryp otyrmyz. Aýdandyq Deneshynyqtyrý jáne sport bóliminiń uıymdastyrýymen, Kókterek aýyldyq okrýginiń demeýshiligimen ótken dodaǵa «Qarager», «Zańǵar», «Sarbalaq», «Jebe», «Muzbalaq», «Samǵar», «Kókshybar», «Aqsuńqar», «Aqjelke», «Saryshegir», «Sartirnek» atty 11 búrkit baptary men baqtaryn synap kórdi. Qusbegiler Kókózek, Qazymbet, Baqty, Kókterek jáne Qaratal aýyldarynan keldi» deıdi Kókózek orta mektebiniń dene tárbıesi pániniń muǵalimi, «Shyǵys Altaı» búrkitshiler federasııasynyń prezıdenti Táttimbet Kápuly.
Sonymen qusty qolǵa shaqyrý, qustyń erkin ushýy, búrkitti shyrǵaǵa salý, búrkitti qoıanǵa salý jáne búrkiti túlkige salý sekildi 5 kezeńnen turǵan saıysta Táttimbet Kápulynyń «Qarager» atty búrkiti 3-oryndy ıelense, 1-2-oryndardy Kókterek aýylynyń qusbegisi Nuǵym О́mirbektiń «Muzbalaq» jáne «Sartirnek» atty búrkitteri jeńip aldy.
Shyǵys Qazaqstan oblysy,
Úrjar aýdany,
Kókterek aýyly
