Úkimet • 19 Jeltoqsan, 2019

Asqar Mamınniń tóraǵalyǵymen kezekti Úkimet otyrysy ótti

35 retkórsetildi

Premer-Mınıstr Asqar Mamınniń tóraǵalyǵymen ótken Úkimet otyrysynda Bilim men ǵylymdy damytýdyń 2016-2019 jyldarǵa arnalǵan memlekettik baǵdarlamasyn iske asyrý qorytyndylary jáne 2020-2025 jyldarǵa arnalǵan jobasy qaraldy. Bul týraly Premer-Mınıstrdiń baspasóz qyzmeti habarlady.

Bilim jáne ǵylym mınıstri A.Aımaǵambetov ótken kezeńde qol jetkizilgen nátıjeler jáne jańa Memlekettik baǵdarlamanyń negizgi baǵyttary týraly, Kókshetaý qalasyndaǵy AT mektep-lıseıiniń dırektory A. Baltasheva pedagogıkalyq qaýymdastyqtyń pozısııasy týraly baıandady.

3 jylda Memlekettik baǵdarlamany júzege asyrýǵa 1 trln 466 mln teńge bólindi. Mektepke deıingi uıymdardyń jelisi 1728 birlikke ulǵaıtyldy, 3 jastan 6 jasqa deıingi balalardy mektepke deıingi oqytýmen qamtý 98%-ǵa deıin artty. 1-10 synyp oqýshylary (95,4%) jańartylǵan mazmunǵa kóshti. 273 myń muǵalim (94%) jańartylǵan oqý baǵdarlamasy boıynsha oqytylyp, 30% mólsherinde ústemeaqy alýda. Attestasııadan ótken 123 myńnan astam muǵalim qosymsha tólemderdi 30-dan 50%-ǵa deıin alady.

437 memlekettik jáne 80 jekemenshik mektep jan basyna qarjylandyrýǵa kóshti. 372 jańa mektep salyndy. Tájirıbelik-qurastyrymdyq ázirlemeler boıynsha shyǵyndar 1,6%-ǵa, ǴZTQJ-ǵa jumsalatyn bıznes shyǵyndarynyń úlesi 6,6%-ǵa, kommersııalandyrylǵan jobalardyń úlesi 2,8%-ǵa ósti.

«Bilim berýdi damytý Tuńǵysh Prezıdent – Elbasy Nursultan Ábishuly Nazarbaevtyń strategııalyq baǵytynyń basty basymdyqtarynyń biri. Memleket basshysy Qasym-Jomart Kemeluly Toqaev Qazaqstan halqyna arnaǵan Joldaýynda bilim sapasyn odan ári jaqsartýǵa, qala men aýyl mektepteri arasyndaǵy alshaqtyqty azaıtýǵa jáne pedagogterdiń mártebesin arttyrýǵa erekshe nazar aýdardy», dedi A. Mamın.

Úkimet basshysy Prezıdenttiń tapsyrmasyn oryndaý maqsatynda, jańa Memlekettik baǵdarlama aıasynda 2020 jyldan bastap, tórt jyl ishinde pedagogterdiń jalaqysyn 2 esege kezeń-kezeńimen arttyrý josparlanǵanyn atap ótti. Sonymen birge balalar balabaqshalarmen 100% qamtamasyz etiledi, úsh aýysymda oqytý jáne apatty jaǵdaıdaǵy mektepter tolyǵymen joıylady.

«Qazaqstan PISA-nyń – oqýshylardyń fýnksıonaldyq saýattylyǵynyń álemdik reıtıngisiniń TOR-40-na kirýdi josparlap otyr. Barlyq mektepter jańa modıfıkasııadaǵy pán kabınetterimen jabdyqtalady», dedi A. Mamın.

2025 jylǵa deıin elimizde 800-ge jýyq jańa mektep salynady. Tirek eldi mekenderde 114 ınternat salynady.

Premer-Mınıstr ınvestorlar úshin bilim berý salasynyń ósip kele jatqan tartymdylyǵynyń mańyzdylyǵyn atap ótti. Aldaǵy 5 jylda salaǵa 11,5 trln teńge baǵyttalady, onyń ishinde 1,3 trln jeke ınvestısııalar tartylady. Bul jeke ınvestorlar esebinen 150 myń orynǵa qosymsha mektepter salýǵa múmkindik beredi.

«El ekonomıkasy úshin ǵylymnyń nátıjeligin arttyrý úshin ǵylymı-zertteý qyzmeti jetildirilip, ǵylymǵa jumsalatyn shyǵyndar kóbeıtiledi. Bilim berýdi qarjylandyrý JIО́-niń 7% deńgeıin quraıdy», dedi A. Mamın.

Úkimet basshysy Bilim jáne ǵylym mınıstrligine jyl basynan baǵdarlamanyń iske qosylýyn jáne kózdegen kórsetkishterge qol jetkizýdi qamtamasyz etýdi tapsyrdy.

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar