Prezıdent • 27 Jeltoqsan, 2019

Memleket basshysy Almaty mańyndaǵy ushaq apatyna baılanysty keńes ótkizdi

47 retkórsetildi

«Aqorda» rezıdensııasynda Premer-Mınıstrdiń, Prezıdent Ákimshiligi basshylyǵynyń, Qaýipsizdik Keńesi hatshysynyń, Bas prokýrordyń, Ulttyq qaýipsizdik komıteti tóraǵasynyń, Ishki ister, Aqparat jáne qoǵamdyq damý, Densaýlyq saqtaý mınıstrleriniń qatysýymen Almaty áýejaıy mańyndaǵy jolaýshylar ushaǵynyń apatyna baılanysty shuǵyl keńes ótti. Bul týraly Aqordanyń baspasóz qyzmeti habarlady.

Qasym-Jomart Toqaev Qazaqstan halqynyń jáne jeke óziniń atynan qaza bolǵan azamattardyń otbasylary men jaqyndaryna kóńil aıtty. Jıynǵa qatysýshylar qaıtys bolǵandardy bir mınýt únsizdikpen eske aldy.

Memleket basshysy Premer-Mınıstr Asqar Mamınniń, Bas prokýror Ǵızat Nurdáýletovtiń, Ishki ister mınıstri Erlan Turǵymbaevtyń jáne Densaýlyq saqtaý mınıstri Eljan Birtanovtyń esepterin tyńdady.

Qasym-Jomart Toqaev Úkimetke Almaty qalasy men Almaty oblysy ákimdikterimen birlesip qaza bolǵan azamattardyń otbasylaryna 4 mıllıon teńge kóleminde materıaldyq kómek kórsetýdi tapsyrdy. Qaıtys bolǵandardyń jaqyndaryna jan-jaqty psıhologııalyq jáne medısınalyq qoldaý kórsetiledi. Sonymen qatar zardap shekkenderdiń barlyǵyna qajetti kómek beriledi.

28 jeltoqsandy jalpyulttyq aza tutý kúni dep jarııalaǵan Prezıdent elimizdegi memlekettik týlardy tómen túsirýge jáne barlyq oıyn-saýyq sharalaryn toqtatýǵa tapsyrma berdi.

Memleket basshysy keńes barysynda:

–Ushaq apatyna soqtyrǵan sebepterdi sapaly ári obektıvti túrde tekserýge;

–«Qazaqstannyń avıasııalyq ákimshiligi» aksıonerlik qoǵamyn bilikti mamandarmen qamtý jumystaryn tolyq aıaqtaý sharalaryn qabyldaýǵa;

–Qaýipsizdik talaptaryna sáıkestendirý úshin barlyq áýe kompanııalarynyń jumystary men avıasııalyq ınfraqurylym nysandaryn tekserýge tapsyrma berdi.

Bas prokýratýra men Ishki ister mınıstrligine qozǵalǵan qylmystyq is aıasynda ushaq apatyna soqtyrǵan sebepterdi anyqtaý, kinálilerdi zańǵa sáıkes jaýapkershilikke tartý, sondaı-aq Almaty áýejaıynyń aýmaǵyna jaqyn ornalasqan jeke qurylystardyń zańdylyǵyn zertteý jóninde shara qabyldaýdy tapsyrdy.

Sońǵy jańalyqtar

Abaı murasyna arnalǵan kórme

Rýhanııat • Keshe

Jaǵa ustatqan jat qylyq

Aımaqtar • Keshe

Uqsas jańalyqtar