enbek.kz saıtyndaǵy ashyq derekkózderden belgili bolǵandaı, oblysta áleýmettik sala boıynsha mamandarǵa suranys joǵary. Atap aıtqanda, aýdandar boıynsha berilgen habarlandyrýlardyń úlesi muǵalim, orta deńgeıli medısına qyzmetkeri, meıirbıkeler men mektepterdegi jumysshylarǵa qatysty bolyp otyr. Máselen, Tekeli qalasyndaǵy «Tekeli-kómek» qoǵamdyq qory áleýmettik qyzmetkerge muqtaj bolsa, osy qalanyń aýrýhanasyna meıirbıke asa qajet eken. Alǵashqy suranys úshin qoǵamdyq qor 60 000 teńgeden bastap aılyq jalaqy tóleýge daıyn bolsa, orta deńgeıli dáriger úshin usynylǵan eńbekaqy 70 000 teńge dep kórsetilgen.
Sondaı-aq aýdandar boıynsha jıi suranys berilgen bastaýysh synyp muǵalimi men shet tili pánniń oqytýshysynyń aılyǵy 70 000 teńgeden bastalady. Al eńbek ótilin qajet etpeıtin eden jýýshyǵa tólenetin jalaqy 42 000 teńge shamasynda.
