Ádette biz: «Ýaqyt ótip barady!» deýge áýespiz. Al shyndyǵynda... Jyly jaqqa bet alǵan tyrnalar sekildi birinen soń biri tizbektelip, alysqa uzap bara jatqan kúndermen birge О́mir de ótip barady emes pe?!
Oıla-a-ap qarasańyz, ol da bir uzaq sapar. Jáne sol saparda árkimniń-aq ózine tán kórer qyzyǵy, tartar taýqymeti bar. Ony biz – Taǵdyr deımiz...
Ásili, qýanyshty kúnderdiń salmaǵy bolmaıdy. Olar zymyrap, kózdi ashyp-jumǵansha-aq ǵaıyp bolady. Al qıyndyqpen, ýaıymmen ótetin kúnder jaraly qus sııaqty. Qanatyn aýyrsyna qaǵyp, áýpirimmen ázer ushady. Biraq ol da alystap, kóńilińizde tereń iz qaldyryp ketedi...
Pendeshilikpen kúndelikti tirliktiń yńǵaıyna qaraısyz, árıne. Birde kúlip, qýanyp, taǵy birde ókinip, ókpelep júresiz. Áıtse de, uly mártebeli Ýaqyttyń kóńil kúıge qarap, bir sátke aıaldap, pende shirkinge mursat berip, ıilgen kezin kórmeısiz. Qolyńyzdaǵy saǵat tili syrtyldap, sol baıaǵy júrisinen jańylmaıdy...
Shynyn aıtqanda, keıde sizdiń de osy Ýaqytty birer mınýtqa toqtatyp, es jıyp, aldaǵy kúnderge asyqpaı jospar quryp alǵyńyz keletini ras. Endeshe, ony eptep alańdatyp, az da bolsa kóńilin aldandyratyn shaqty kútpeımiz be?..
Áne, qarańyzshy, Eski jyl qolyn bulǵap, qoshtasyp barady. Al Jańa jyl bolsa, jan-jaǵyna qarap, dúrkin-dúrkin atylyp jatqan otshashýlardy kórip, tańyrqap keledi.
Demek, tyń josparlar quryp, kúsh jınap, aldaǵy bıikterge kóterilýge ázirlik jasaıtyn eń qolaıly sát te osy-daǵy.
Olaı bolsa, bir-birimizdiń qolymyzdy qysyp: «Iske sát!» deıik!
Munyń qyzyǵy, kúntizbeniń betinde eki sandyq belgi ǵana ózgerip, 2019-dyń ornyna 2020 dep jazylýyna qaraı qanshama jańa bastamalardyń ómirge kelip, jarqyn úmitterdiń oıanyp jatatyndyǵynda emes pe.
ALMATY
