Bıyl 12 qyrkúıek pen 4 qazan aralyǵynda Baltyq jaǵalaýynda jalaýy jelbireıtin dúnıejúzilik dop dodasyna ár toptan úzdik shyqqan komandalar birden joldama alady. Sondaı-aq ekinshi oryn alǵandar da ózara kúsh synasyp, sol matchtarda jeńiske jetse, dál sondaı qurmetke bólenedi. Qazaqstan quramasy kimdermen kezdesetinin biz joǵaryda aıttyq. Al ózge toptarda myna memleketterdiń órenderi óner kórsetedi:
«A» toby – Portýgalııa, Italııa, Belarýs, Fınlıandııa.
«V»toby – Ispanııa, Serbııa, Ýkraına, Fransııa.
«S» toby – Reseı, Ázerbaıjan, Slovakııa, Horvatııa.
Birden aıta keteıik, jerlesterimiz úshin jerebe sátti tústi. Bizdiń topta ataǵy alysqa jaıylǵan birde-bir komanda joq. Barlyq qarsylastarymyzdyń deńgeıleri shamalas. Máselen, Chehııa fýtzalshylary osyǵan deıin jeti márte uıymdastyrylǵan álem chempıonatyna úsh ret qatysyp, 2004 jáne 2012 jyldary ekinshi kezeńde oınady. Odan árige shamalary jetpedi. Al Eýropa birinshiliginde segiz ret baq synady. 2003 jylǵy Eýropa birinshiligin óte tamasha bastaǵan chehtar jartylaı fınalda Ýkraınadan (1:5) tas-talqan bolyp utyldy. Ol kezde úshinshi oryn úshin kezdesý ótkizilmegendikten, júlde buıyrmady.
Esesine 2010 jyly aıtýly eldiń oıynshylary qola medaldy ıelendi. Shırek fınalda Italııadan (3:3, penaltıden – 3:1) aılasyn asyrǵan olar jartylaı fınalda Ispanııadan (1:8) oısyraı jeńildi. Sheshýshi synda Chehııanyń ókilderi Ázerbaıjannyń (5:3) osal tusyn tapty.
Slovenııa osy kúnge deıin dúnıejúzilik dop dodalaryna birde-bir ret qatysqan emes. Al qart qurlyqtyń basty jarysynda alty márte óner kórsetti. Tórt ret toptyq saıysta súrinse, 2014 jáne 2018 jyldary shırek fınalǵa deıin jetti. Alǵashynda Ispanııaǵa (0:4) jol berse, odan keıin Reseıden (0:2) utyldy.
Rýmynııanyń da álem chempıonatyna áli joly túspegen eken. Esesine Eýropa birinshiliginde tórt ret oınady. 2007 jyly olar toptyq týrnırde súrindi. 2012 jyly shırek fınalǵa áýpirimdep júrip jetkenimen, Ispanııaǵa (3:8) jarytyp qarsylyq kórsete alǵan joq. 2014 jyly da dál sol mejeden kórindi. Bul joly rýmyndardyń jolyn Reseı (0:6) bógedi. 2018 jyly Slovenııada jalaýy jelbiregen jarystyń alǵashqy kezeńinen asa almaı, elderine eńseleri túsken kúıde oraldy.
Joǵaryda atalǵan úsh komandaǵa qaraǵanda Qazaqstannyń tabysy áldeqaıda qomaqty. Sonaý 1999 jáne 2000 jyldary jerlesterimizdiń Azııa chempıonatynda jeńis tuǵyryna kóterilgenin jankúıerler umyta qoıǵan joq. Malaızııada qola medal alsaq, Taılandta kúmispen kúpteldik. ÝEFA-ǵa ótkennen keıin de biraz belesterdi baǵyndyrdyq. 2016 jyly Belgradtaǵy básekede Reseıdi (1:2) alǵa jiberip, óz tobymyzda ekinshi oryndy enshiledik. Shırek fınalda áıgili Italııany (5:2) shań qaptyryp kettik. Jartylaı fınalda dańqy alysqa taraǵan Ispanııaǵa (3:5) álimiz jetpedi. Al qola medal úshin tartysta Serbııany (5:2) san soqtyrdyq.
2018 jyly Slovenııada ótken jarysta Reseı (1:1) men Polshany (5:1) artqa tastap, toptyq týrnırde kósh bastadyq. Shırek fınalda Serbııamen jolymyz qaıta túıisti. Bul joly da bizdiń jigitterdiń (3:1) mysy basym boldy. Jartylaı fınalda Ispanııamen (5:5) teń oınadyq. Biraq penaltı soǵý barysynda Pıreneı túbegi túlekteriniń baǵy jandy. Al úshinshi oryn úshin ótken básekede Reseıden (0:1) utyldyq.
Álem chempıonatynda Qazaqstan quramasy eki ret óner kórsetti. Ǵasyrlar toǵysynda Gvatemalada jalaýy jelbiregen jarysta otandastarymyz Brazılııa (1:12), Portýgalııa (2:6) jáne Gvatemaladan (5:6) jeńilip, toptyq týrnırde kósh sońynda qalyp qoıdy.
2016 jyly qazaqstandyq fýtzalshylar álemdik dodada ekinshi márte boı kórsetti. It arqasy qııandaǵy Kolýmbııada ótken jarysta óz tobymyzda ekinshi oryndy ıelendik. Týrnır barysynda Argentınadan (0:1) utylǵanymyzben, Kosta-Rıka (3:1) men Solomon araldarynan (10:0) basym tústik. Biraq 1/8 fınalda azýly Ispanııaǵa tap boldyq. Bul joly da álemniń eki jáne Eýropanyń jeti dúrkin chempıony degen dardaı ataǵy bar komandaǵa álimiz jetpedi. Bul kezdesý 2:5 esebimen aıaqtalǵan edi.
Mine, bıyl 12 qyrkúıek pen 4 qazan aralyǵynda Lıtvada ótetin álem chempıonatyna joldama alý úshin jerlesterimiz taıaý kúnderi joǵaryda atalǵan komandalarmen kúsh synasady.
