Jalpy, búgingi tańda Qazaqstan ekonomıkasynda kvazımemlekettik jáne memlekettik sektordyń úlesi óte úlken. Memlekettiń qatysy bar kompanııalarda barlyǵy 300 myńǵa tarta adam jumys isteıdi. Bul degenimiz – jumysqa qabiletti halyqtyń 3,5 paıyzy.
Holdıngterdiń portfeldik kompanııalarynyń aktıvteri IJО́-niń jartysyna jýyǵyn quraıdy. Bul – óte úlken kórsetkish. Olardyń qanshalyqty tıimdi jumys istep jatqanyn qaıta qarastyrý kerektigi týraly Memleket basshysynyń tarapynan buǵan deıin de aıtylǵan bolatyn. Bul oraıda «Báıterek» UBH elimizdegi eń aýqymdy ekonomıkalyq baǵdarlamalardy júzege asyrýmen aınalysatynyna nazar aýdarǵan jón. Iаǵnı, onyń tıimsiz jumys isteýi ekonomıkalyq baǵdarlamalardyń da tıimdi júzege asyrylatynyna kúmánmen qaraýǵa jeteleıdi.
2018 jyly «Báıterek» holdınginiń tabysy 35 mlrd teńgeni qurady, al ákimshilik shyǵyndarynyń kólemi 43 mlrd teńge boldy. 43 mlrd teńgeniń 21 mlrd-sy qyzmetkerlerge jumsalǵan. 2017 jyly atalǵan holdıngtiń ákimshilik shyǵyndary 39 mlrd teńge boldy. Iаǵnı, holdıngtiń jyldyq shyǵyny tabysynan áldeqaıda joǵary degen sóz. Osyǵan baılanysty shtatynyń tym kóptigi týraly másele kóterilgeni oryndy dep sanaımyn.
Prezıdent halyqtyń ál-aýqatyn kóterý mindetin alǵa qoıyp otyr. Áleýmettik tólemderge jumsalatyn shyǵyn kólemi ulǵaıýda. Osyndaı kezeńde holdıngterdiń ákimshilik jáne basqa da shyǵyndaryn azaıtyp, shekten tys ulǵaıyp ketken shtatyn yqshamdaý máselesiniń ózektiligi arta túsedi.
Vıacheslav DODONOV,
Qazaqstan Strategııalyq zertteýler ınstıtýtynyń bas ǵylymı qyzmetkeri, ekonomıka ǵylymdarynyń doktory
