Atap aıtqanda, «Áleýmettik karta» aıasynda oblystaǵy kásiporyndardyń 100 myń jumysshysy men bıýdjettik uıymdardyń 102 myń qyzmetkeri jáne atqarýshy salada eńbek etetin 3 500 adamnyń jalaqysy ósken. Iаǵnı 2019 jyly óńirdegi ortasha aılyq eńbekaqy mólsheri 137 054 teńgeni qurady. Bul kórsetkish 2018 jylmen salystyrǵanda 20,6 paıyzǵa joǵary. Al naqty ósim kórinisi 14,7 paıyz shamasynda. Jalpy, aımaqtaǵy eń joǵary jalaqy qarjy salasy men saqtandyrý qyzmetkerlerine tıesili. Olardyń aılyǵy – 211 241 teńge. Al eń tómengi – 78 939 teńge jalaqyny ákimshilik jáne qosalqy qyzmet kórsetý salasynda eńbek etetinder alady.
– Memleket basshysy Qasym-Jomart Toqaevtyń tapsyrmasyna sáıkes, bıyl áleýmettik sala qyzmetkerleriniń jalaqysy kóbeımek. Atap aıtqanda, óńirdegi 60 myńnan astam muǵalimniń jalaqysy 25 paıyzǵa, mádenıet, óner, sport jáne muraǵat salasyndaǵy 5 myń qyzmetkerdiń jalaqysy 30 paıyzǵa artsa, 3 800 dárigerdiń aılyǵy 30 paıyzǵa jáne 12 200 medbıkeniń tabysy 20 paıyzǵa ósedi. Sondaı-aq oblystaǵy 3 100 áleýmettik qyzmetkerdiń de jalaqysyna ortasha eseppen 30 paıyzǵa deıin ústeme qosylady, - deıdi oblys ákiminiń orynbasary Batyrjan Baıjumanov.
«Áleýmettik kartanyń» bilim berý baǵyty týraly aıtqanda, 2019-2020 jylǵy oqý jylynda Almaty oblysyndaǵy bilim berý mekemeleriniń 1-synybyna 50 myńǵa jýyq oqýshy qabyldanǵany eske túsedi. Iаǵnı bala sanynyń kúrt artýy mektepterdegi oqý synyptarynyń jetispeýine ákelip, oqýshylar 3 aýysymda bilim alýǵa májbúr bolyp otyr. Qazir oblystaǵy 38 mektepte oqýshylar 3 aýysymda oqyp jatyr. Esep boıynsha 3 aýysymdy mektepterdi joıý úshin birden 21 oqý oshaǵyn salý qajet. Oǵan 52 mlrd teńge jumsalady. Alaıda qurylys qarqyn alǵan kúnniń ózinde munsha mektepti paıdalanýǵa berýge 2021 jyly ǵana qol jetýi múmkin. Al bıyl 6 mekteptiń qurylysy júrgiziledi. Bul taǵy 3 myń oqýshynyń erkin otyryp bilim alýyna qolaıly jaǵdaı týǵyzbaq.
Jalpy, bıyl oblys aýmaǵyndaǵy mektep-ınternattardy kúrdeli jóndeý men bilim mekemeleriniń materıaldyq-tehnıkalyq bazasyn nyǵaıtýǵa 300 mln teńge qarjy bólingen. Bul oblys mektepterindegi birqatar máseleni sheshýge múmkindik bermek. Ásirese óńir mektepterinde tártip pen qaýipsizdikti saqtaý boıynsha syn kóp. Qazir bilim berý nysandarynda 15 860 beınebaqylaý qurylǵysy iske qosylǵan eken. Alaıda kameralardyń deni eskirgen. Kóptegen qurylǵy bir baǵytty ǵana beınege túsiredi. Onyń jazbalaryn qarap, suryptap otyratyn arnaıy maman taǵy joq. Sol sebepten de mektep ishindegi bala quqynyń buzylýy nazardan tys qalyp jatady. Al oblystaǵy úsh júzden astam mekteptiń dárethanasy ǵımarat ishinde emes, aýlada ornalasqany da ata-analardyń alańdaýyna negiz bolyp otyr.
Oblystyń áleýmettik damý kartasy boıynsha bólingen bıýdjet qarjysynyń basym bóligi kóp balaly otbasylar men az qamtylǵan áýletterdiń jaǵdaıyn jaqsartýǵa baǵyttalyp otyr. Qazir Almaty oblysynda tirkeýde turatyn 43 myńǵa jýyq otbasynda 4 jáne odan da kóp bala ósip keledi.
Al jańa jyldan bastap, oblystaǵy osynsha otbasy jańartylǵan baǵdarlama boıynsha ataýly áleýmettik tólem alýdy bastady. Búginde respýblıkalyq bıýdjetten tólenetin memlekettik járdemaqy 4 bala úshin – 42 496 teńge, 5 bala úshin – 53 127 teńge, 6 bala úshin – 63 757 teńge, 7 jáne odan kóp balaǵa – 74 388 teńge kóleminde berilýde. Sondaı-aq oblys boıynsha 18 jasqa deıingi 83 myń balany áleýmettik qoldaý maqsatynda 3,7 mıllıard teńge bólingen. Onyń ishinde mektep jasyna jetpegen 31 644 bala jáne mektep jasyndaǵy 52 681 balany kıim-keshek, ystyq tamaqpen qamtý men qoǵamdyq kólikte tegin júrýi úshin arnaıy áleýmettik paket júzege asyp otyr.
Jalpy, oblystyń «Áleýmettik kartasy» sheńberinde kóp balaly jáne az qamtamasyz etilgen otbasylarǵa 3,5 mıllıard teńge kóleminde qoldaý kórsetilip, atalǵan qarjynyń ıgiligin 106 myń adam kórgen eken. Onyń ishine kóp balaly analardyń qaladaǵy koǵamdyq kóliktermen tegin júrýi, mektepke deıingi mekemelerdegi tólemderdi sýbsıdııalaý, tabıǵı gaz jelisine tegin qosý jáne joǵary oqý oryndarynda oqý úshin bilim granttaryn taǵaıyndaý sııaqty ıgi sharalar kiredi.
Almaty oblysy
