Saıasat • 28 Qańtar, 2020

Mańyzdy mindetterge basymdyq beriledi

18 retkórsetildi

Elordada Aqparat jáne qoǵamdyq damý mınıstrliginiń keńeıtilgen alqa otyrysy ótti. Onda 2019 jyly atqarylǵan jumystar qorytyndylanyp, bıylǵy mindetter belgilendi. Otyrysqa Premer-Mınıstrdiń orynbasary Berdibek Saparbaev, Májilis depýtaty Qýanysh Sultanov, Aqparat jáne qoǵamdyq damý mınıstri Dáýren Abaev qatysty.

Jıynda aldymen sóz alǵan vedomstvo basyshysy atqarylǵan jumystarmen qatar, tyń jobalar men júıeli josparlardy alǵa tartty.

– Aqparat jáne qoǵamdyq damý mınıstrliginiń qurylǵanyna bir jylǵa jeter-jetpes qana ýaqyt boldy. Men óz kezegimde 2020 jylǵa negiz­del­gen basym baǵyttar men negizgi maqsattarǵa toqtalǵym keledi. Biz jetekshilik etetin barlyq baǵyttardy damytý boıynsha naqty josparymyz ben strategııamyz bar. Mańyzdy sharalar josparlanýda. Aqparat salasyna toqtalar bolsaq, ózderińiz biletindeı Prezıdent Qasym-Jomart Toqaev «Halyq únine qulaq asatyn memleket» tu­jy­rymdamasyn engizý týraly tapsyrma bergen bolatyn. Osy maqsatqa jetý úshin mınıstrlik bir­qatar jospar qurdy, – dedi D.Abaev.

Onyń aıtýynsha, birinshiden, halyqpen keri baılanys arnalarynyń jumystaryna jú­ıeli túrde monıtorıng júrgizý jáne taldaý ja­saý qajet. Barlyq memlekettik organdar ha­lyq­pen jumys júrgizý boıynsha jaýapty bólim­she taǵaıyndap, olar tikeleı birinshi bas­shyǵa ba­ǵynýy tıis. Ekinshiden, memlekettik organ­­dar aqparattyq qyzmetiniń belsendiligin art­tyr­ǵany jón. Memlekettik organdardyń BAQ ókil­derimen baılanysynyń tıimdiligin baǵalaý­dyń jańa krıterıılerin engizý josparlanýda. Úshinshiden, memlekettik organdar men zań jo­ba­laryn qaraıtyn jumys toptarynyń, qoǵam­dyq keńestiń otyrystaryn onlaın kórsetý jalǵasady.

Prezıdent Qasym-Jomart Toqaev aqparat salasyn damytýdyń 2020-2023 jyldarǵa arnalǵan ulttyq strategııa­lyq josparyn qurý týraly tapsyrma bergenin aıt­qan mınıstr, qujat aıasynda otandyq BAQ-tyń báse­kege qabilettiligine baılanysty jumystar qol­ǵa alynatynyna toqtaldy. Osyǵan baılanysty birqatar sha­ra ázirlenýde. Birinshiden, memlekettik aqpa­rat saıasatyn iske asyrý jumysy jalǵasady. Bul úshin memlekettik aqparattyq tapsyrys te­tik­teri qaıta qaralady. Naryqtyq baǵany en­gizý­de sanǵa emes, sapaǵa mán beriledi. Halyq ara­synda suranysqa ıe mýltımedııalyq kon­tenttiń jarııalanǵan sany emes, ǵalamtor jeli­sindegi taralymyna qoldaý bildiriledi. Ekin­shiden, kommersııalyq telearnalar men radıo stan­salardyń sıfrly efır taralymy óz baǵy­tyn tabýǵa qoldaý kórsetiledi.

Sondaı-aq memlekettik saıasat tapsyrysyn oryndaýda telearnalar men ınternet resýrstardyń aýdıtorııalaryn medıabaǵalaý úshin 2021 jyly arnaıy júıe qurastyrylmaq. Osylaısha ınternet-telearnalardy ret­teý boıynsha normalar ázirlenedi. О́tken jyly mınıstrlik BAQ salasyndaǵy zańnamany jáne aqparatqa qoljetimdilikti ońtaılandyrý maq­satynda joba daıyndady. Onda birqatar máse­le qamtylǵan.

Otyrysta radıohabarlardy taratý máselesi de nazardan tys qalmady. Elbasy Nursultan Nazarbaev Qaýip­sizdik keńesiniń otyrysynda radıohabar­lardy damytýǵa erekshe kóńil ból­gen bolatyn. Bul rette radıohabarlar taratýdy damytýdyń Jol kartasyn ázirlep bekitý, sony­men qatar sıfrly radıony engizýdiń kon­sep­týaldyq tásilderin anyq­taý jumysy Aqparat jáne qoǵamdyq damý vıse-mınıstri Nurgúl Maý­berlınovaǵa júkteldi.

– Byltyr «Egemen Qazaqstan» gazetiniń 100 jyl­dyq mereıtoıy atap ótildi. Bıyl «Kazah­stanskaıa pravda» gazeti men «QazAqparat» halyq­ara­lyq aqparat agenttigine 100 jyl tolady. Osy mereıtoılardy da óz deńgeıinde ótkizý kerek. Biraq bir eskeretin dúnıe, Memleket basshysy atap ótkendeı, aǵartýshylyq baǵytyndaǵy sharalarǵa basymdyq berilýi kerek, – dedi D.Abaev.

Mınıstr «QazMedıa» ortalyǵynyń tehnolo­gııa­lyq ıadrosyn jańartý men otbasylyq-gen­derlik saıasatty damytý josparyna da toqtaldy. Onyń aıtýynsha, 2030 jylǵa deıin otbasylyq-genderlik saıasattyń ekinshi kezeńin júzege asyrýǵa kirisý qajet. Bul jumys kóp balaly otbasylardy, jalǵyzbasty analardy qoldaý sharalaryn kúsheıtýdi, daǵdarys ortalyqtarynyń, áleýmettik qyzmetterdiń jumysyn jetildirýdi kózdeıdi. Sondaı-aq memlekettik jastar saıasaty máseleleri boıynsha zań jobasyn ázirleý de mańyzǵa ıe.

Jastarǵa arnalǵan art-habtyń da mańyzy zor. EKSPO pavılonyndaǵy bul shyǵar­ma­shy­­lyq alań jastarǵa arnalǵan biregeı zama­­naýı basqosý orny bolmaq. Onda jastar óz jo­balary men bastamalaryn qolǵa alady. Sony­men qatar «Zere» jastar tanymdyq lageri, Besin­shi respýblıkalyq ákeler forýmy jáne Halyq­ara­lyq saraptamalyq forým, Qazaqstan men Reseı volonterlik keńesiniń qurylýy da nazarda bolady.

Mınıstr «Rýhanı jańǵyrý» baǵdarlamasy­nyń ambassadorlary jobasyn júzege asyrý qa­­jettigin alǵa tartty. Onyń aıtýynsha, atal­­ǵan baǵdarlamany júzege asyrýdyń tıim­di­li­gi boıyn­sha saraptamalyq baıandama jasaý kóz­d­elý­de. «Qazaqstannyń kıeli jerleriniń» tany­mal­dylyǵyn arttyrý maqsatynda «2gis» kartasyna birqatar nysannyń ornalasý orny engiziledi. Bul jumystar áli de jalǵasady.

Din máselesine qatysty da sharalar jos­par­lanǵan. Iаǵnı salany damytý boıynsha strategııalyq ortamerzimdi jos­par ázirleý qajet­tigi bar, óıtkeni 2017-2020 jyl­darǵa ar­nal­ǵan tujyrymdamanyń merzimi aıaqtalady.

D.Abaev «Jýsan» operasııasy arqyly Otanǵa oralǵan qyz-kelinshekterdi 100 paıyz ońaltý týraly sóz qozǵady. Mınıstr bul tek psıho-emosıonaldyq keńes qana emes, áleýmettik qoldaý ekenin de aıtty. Sondaı-aq osy jyly Din­tanýshylar forýmy, Álemdik jáne dástúrli dinder kóshbasshylary sezi Hatshylyǵynyń HIH otyrysy uıymdastyrylady.

D.Abaev qandastardy qoldaýdy jalǵastyrý maqsatynda áleýmettik-ekonomıkalyq qoldaý sharalary kesheniniń naqty paıymdaýyn ázirleý qajettigin jetkizdi. Onyń aıtýynsha, alda Otan­dastar forýmy men sheteldegi qazaqtardyń kishi quryl­taıyn joǵary deńgeıde ótkizý mindeti tur. 12 el­de qazaq tilin úıretýge qatysty 31 onlaın sa­baq júrgizý men 7 memlekette qazaqtyń máde­nı-is­kerlik úılerin ashý qajettiligi bar. «Qan­das» statýsyn «Bir tereze» qaǵıdaty bo­ıynsha berý qyzmetin iske qosý qajettigi de kún tártibinde tur.

Alqa májilisi barysynda negizgi baıandamashylardy tyńdaǵannan keıin B.Saparbaev aldymen «Rýhanı jańǵyrý» baǵdarla­ma­synyń iske asý barysyna toqtaldy.

– Osydan úsh jyl buryn Elbasy Nursultan Nazarbaev «Rýhanı jańǵyrý» baǵdarlamasyn jarııalaǵanda negizgi maqsat retinde halqymyzǵa tán ádet-ǵurpymyzdy, mádenıetimizdi, saltymyzdy dáripteý arqyly el birligin nyǵaıtýǵa úlken kóńil bólgen edi. Bul baǵytta aýqymdy jumys atqaryldy, – dedi Premer-Mınıstrdiń orynbasary.

«Rýhanı jańǵyrýǵa» qatysty paıymyn B.Saparbaev «Týǵan jer» baǵdarlamasymen sabaqtastyrdy.

– «Týǵan jer» baǵdarlamasynyń negizgi maqsaty – jastardy, azamattardy óziniń Otanyn súıýge tárbıeleý, olardyń patrıottyq sezimin ári qaraı arttyrý. Elbasy osydan eki jyl bu­ryn «Aýylym – altyn besigim» aksııasyn bas­taǵan bolatyn. Bul qos bastamanyń memleket bolashaǵy úshin máni zor, – dedi B.Saparbaev.

Premer-Mınıstrdiń orynbasary memle­ket­tik organdardyń baspasóz qyzmetin úılestirý bo­ıynsha durys bastama kóterilgenin de atap ótti. Onyń aıtýynsha, baspasóz qyzmetteri mem­lekettik organdardyń atqaryp jatqan ju­mystaryn  halyqqa jedel jetkizýi kerek.

– BAQ – bılik pen qoǵam arasyndaǵy altyn kópir. Aqparat – ýaqtyly hám shyndyqtyń shyraǵdany bolǵan kezde ǵana mańyzǵa ıe. Eger BAQ ókilderi turǵyndarǵa durys ári ýaqtyly aqparat beretin bolsa, olar da bılik, úkimettik emes uıymdar tarapynan atqarylyp jatqan ju­mystan habardar bolar edi. Osy oraıda ju­mysty jetildirý qajet dep oılaımyz, – dedi B.Saparbaev.

Otyrys sońynda qatysýshylar ózderin tolǵandyrǵan suraqtaryn joldap, oılaryn ortaǵa saldy.

 

Sońǵy jańalyqtar

Satıralyq shyǵarmalar baıqaýy bastaldy

Rýhanııat • Búgin, 18:43

Áskerge barý da keıinge qaldyrylǵan

Aımaqtar • Búgin, 18:33

iPhone 12 Pro renderi shyqty

Tehnologııa • Búgin, 18:31

Petropavlda eki ury qolǵa tústi

Aımaqtar • Búgin, 18:07

Epıdemııa jeńipmazy – bulttyq esepteýler

Tehnologııa • Búgin, 17:22

Shymkentte barlyq avtobeketter jabyldy

Aımaqtar • Búgin, 17:17

Búgin: Almatyda 22 indet oshaǵy bar

Aımaqtar • Búgin, 17:05

Almatyda urlyq-qarlyq eki ese azaıdy

Aımaqtar • Búgin, 15:55

Batys Qazaqstanda qozǵalys shekteledi

Aımaqtar • Búgin, 15:34

Shymkenttik joldar qoǵam baqylaýynda

Aımaqtar • Búgin, 14:57

Qyzylorda: Oblys ákimi ortalyqqa bardy

Aımaqtar • Búgin, 14:39

Uqsas jańalyqtar