Salada qordalanǵan kóp saýalǵa oraı Abaı atyndaǵy Qazaq ulttyq pedagogıkalyq ýnıversıtetinde bolashaq pedagog mamandarmen ótken kezdesýde Bilim jáne ǵylym mınıstri Ashat Aımaǵambetov jaýap berdi. Búginde elimizde pedagog mamandardy daıarlaıtyn 85 joǵary oqý orny bar desek, olardyń sany emes, sapasyna alańdaýshylyǵyn bildirgen mınıstr qazirgi kezde talapqa saı kelmeıtin oqý oryndary anyqtalyp, arnaıy tekserýden ótip jatqanyna toqtaldy. Sapasyz bilim beretin oqý oryndarynyń kóptiginen elimizde 2016 jyldan bergi aralyqta engizilgen jańashyldyqtan beıhabar mamandardyń tárbıelenip shyqqanyna qynjylysyn bildirgen mınıstr, jańa zań aıasynda pedagog mamandardyń jumys isteýine qolaıly jaǵdaılarmen qatar talaptyń da kúsheıetinin jetkizdi. Osyǵan oraı joǵary oqý oryndary da oqytý baǵdarlamalaryn jańartýy tıis.
Al bıyldan bastap pedagog mamandyǵyna baratyn túlekter úshin shekti ball 70-ti quraıtyn bolady. Sonymen qatar 2021 jyldan bastap árbir joǵary oqý ornynyń dıplomy engiziletin bolady. Jumys berýshiler jas mamannyń biliktiligin, bilim sapasyn osy dıplomǵa qarap tańdaıdy. Mundaı talaptar joǵary oqý oryndary úshin bilim sapasyn arttyrýǵa yqpal etetini sózsiz, deıdi mınıstr. Al jas pedagog ulttyq baǵalaý testinen ótip, pedagog-moderator sertıfıkatyn almaıynsha, mektepterge jiberilmeıdi. Ári qaraı pedagog-moderator sertıfıkatyn alǵan jas mamannyń eńbekaqysyna ústemeaqy tólenedi. Mundaı ústemeaqy, ıaǵnı 25 myń teńge kóleminde mektepterge magıstrlerdi tartý maqsatynda da qarastyrylyp otyr. Mektepke kelgen jas muǵalimniń tálimgerine bir jylǵy eńbegi úshin aı saıyn 17500 teńge kóleminde ústemeaqy tólenedi. Ekonomıkalyq kórsetkishterge baılanysty tólem barysy jyl saıyn ózgerip otyrady.
Jańa múmkindikter jaıynan habardar etip, jas pedagogterdi ulaǵatty urpaq tárbıeleý isine shaqyrǵan mınıstr A.Aımaǵambetov qazirgi kezde respýblıkada 1-10 synyptary jańartylǵan oqý baǵdarlamasyna kóshse, aǵymdaǵy jyldyń qyrkúıeginen bastap 11-synyptar da qosylady dep atap ótti.
ALMATY
