Rýhanııat • 01 Aqpan, 2020

BQO-da maıdan batyrlaryna qurmet kórsetý aksııasy bastaldy

164 retkórsetildi

Batys Qazaqstan oblysynda 1 aqpanda «Biz – Jeńis muragerlerimiz!» aksııasy bastaldy. Aksııanyń mánisi – 1941-1945 jyldar aralyǵyndaǵy Uly Otan soǵysy Jeńisiniń 75 jyldyǵyna oraı maıdan batyrlaryna, soǵys qurbandaryna qurmet kórsetý.

Aksııaǵa áskerı bólimder, ardagerler uıymdary, orta bilim beretin mektepter oqýshylary, áskerı-patrıottyq klýbtardyń tárbıelenýshileri, stýdent jastar, qoǵamdyq jáne basqa da uıym ókilderi qatysady. Sóıtip, stýdentter, oqýshylar osy jyldyń sońyna – 31 jeltoqsanǵa deıin kún saıyn saǵat 12.00-de Oral qalasynda ornalasqan eskertkishterge gúl shoǵyn qoıyp, batyrlar rýhyna taǵzym etedi.

Oral qalasynda Uly Otan soǵysy taqyrybyna arnalǵan 5 eskertkish bar eken. Olardyń alǵashqysy – 1942-1943 jyldary urys dalasynda jaraqat alyp, Oral qalasyndaǵy áskerı gospıtalda qaza bolǵan Stalıngrad qorǵaýshylarynyń baýyrlastar zıraty. Ol jerde 132 maıdanger-sarbaz jerlengen.

Ekinshisi – qazaqtyń batyr qyzdaryna arnalǵan eńseli eskertkish. Buryn bul jerde Mánshúk Mámetovanyń jeke-dara mys tulǵasy turatyn. Soǵys ardagerleriniń, jergilikti halyqtyń suraýy boıynsha 2017 jyly bul jerge qazaqtyń úsh batyr qyzy, Keńes Odaǵynyń batyrlary Mánshúk Mámetova, Álııa Moldaǵulova jáne Halyq qaharmany Hıýaz Dospanovaǵa eskertkish ornatyldy.

Budan bólek, Oral qalasyndaǵy áskerı bólim aldynda Sovet Odaǵynyń marshaly Georgıı Jýkovtyń eskertkishi 1992 jyly ornatylǵan. 1945 jyly áıgili Jeńis paradyn qabyldap alǵan áskerı qolbasshynyń eńbegi men qyzmetine búginde kózqaras ártúrli bolǵanymen, Oral qalasynda jeńis taqyrybyna arnalǵan sharalar Jýkovtyń eskertkishin aınalyp ótpeıdi. Bir qyzyǵy, Georgıı Jýkovtyń Oral qalasyna da qatysy bar: 1919 jyly Azamat soǵysy kezinde bolashaq qolbasshy Máskeý kavalerııalyq dıvızııasynyń quramynda dál osy Oral kazaktarymen bolǵan birneshe urysqa qatysyp, erlik kórsetken.

Uly Otan soǵysynyń taǵy bir qaharmany – Sovet Odaǵynyń batyry Temir Masın eskertkishi. 1944 jyly 1 shildede Mogılev-Mınsk tas jolyn jaýdan qorǵaýdaǵy erligi úshin Keńes Odaǵynyń batyry ataǵyn alǵan kapıtan Temir Masın soǵystan keıin Taıpaq aýdandyq partııa komıtetiniń 2-shi hatshysy qyzmetin atqaryp júrip, 1947 jyly jazda dala órtinde alǵan kúıik jaraqatynan qaza tapqan. Búginde Oral qalasyndaǵy ózi attas kóshe boıynda jerlengen batyrdyń qabirinde bıýst ornatylǵan.

Árıne, maıdan dalasynda qaza tapqan aqjaıyqtyqtarǵa arnalǵan eń úlken, keshendi eskertkish – Jeńis alańy, Máńgilik alaý ekeni sózsiz. Maıdan dalasynan qaıtpaı qalǵan bozdaqtardyń tizimi jazylǵan tas taqtalar ornatylǵan bul jerde jyl saıyn jeńis sherýi, ant qabyldaý, basqa da áskerı-patrıottyq sharalar ótedi.

- Mine, osy atalǵan bes eskertkish aldynda endi kún saıyn tiri gúl – qalampyr qoıylady. Oral qalasyndaǵy barlyq JOO, kolledj-lıseıler jáne 51 orta mektep oqýshylary osy eskertkishterdi sheftik qamqorlyǵyna alyp, kún saıyn kezekpen gúl shoǵyn qoıyp turady. Bul aksııa 2020 jyldyń sońǵy kúnine deıin jalǵasady, - deıdi Batys Qazaqstan oblystyq Ishki saıasat basqarmasynyń basshysy Nurlybek Daýmov.

Biz búgin «Úsh batyr qyz» eskertkish-kompozısııasyna gúl shoǵyn qoıý saltanatyna arnaıy qatystyq. Bul keshendi Jáńgir han atyndaǵy Batys Qazaqstan agrarlyq-tehnıkalyq ýnıversıteti qamqorlyqqa alypty. Ýnıversıtet prorektory Aqylbek Sultanov «Ekinshi dúnıejúzilik soǵystyń negizgi aýyrtpalyǵyn óz moınymen kóterip, qaısarlyqtyń úlgisin kórsetken UOS sarbazdaryna máńgi qurmet kórsetý keıingi urpaqtyń asyl mindeti» ekenin aıtsa, BQATÝ-dyń 4 kýrs stýdenti, stýdenttik ózin ózi basqarý uıymynyń múshesi Marat Maǵjan «ár batyrdyń erligi men eldigi óshpeýine biz kepilmiz» dedi. Jasy 95-ten assa da boıyn tik ustaǵan soǵys ardageri Venıamın Skalenko «qan maıdanda halyqty jeńiske jetelegen – dostyq, tatýlyq» ekenin aıtyp, eldi tatýlyqqa, birlikke shaqyrdy.

Úsh batyr qyzdyń eskertkishine gúl qoıý rásiminen keıin Oral qalasynda ornalasqan 5517 áskerı bólimi – «Ulttyq ulan» sarbazdary jáne BQATÝ-dyń áskerı kafedra kýrsanttary alańnan sap túzep, sherý jasap ótti.

Dál osyndaı sharalar joǵaryda atalǵan eskertkishterdiń bárinde de uıymdastyryldy.

 

Batys Qazaqstan

 

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar