Aımaqtar • 03 Aqpan, 2020

Dáýletkereı kúıleri nasıhattalatyn jyl

85 retkórsetildi

Bıyl áıgili kúıshi-kompozıtor, júrektiń qylyn shertetin «tóre kúıleriniń» negizin qalaýshy Dáýletkereı Shyǵaıulynyń týǵanyna 200 jyl jáne Batys Qazaqstan oblysyndaǵy Dáýletkereı atyndaǵy ult-aspaptar orkestriniń qurylǵanyna 20 jyl tolyp otyr.

Qatar kelgen qos mereıtoıǵa oraı Dáýletkereı orkestri jyl boıy 20 konsert beretinin habarlady. Buǵan qosa Ǵarıfolla Qurmanǵalıev atyndaǵy Batys Qazaqstan oblystyq fılarmonııasy ornalasqan tarıhı ǵımarat qabyrǵasynda jyl sońyna deıin kúıshiniń sýreti salynǵan jarnama taqta ilinip turmaq.

- Dáýletkereıdiń sońynda mol mura qaldy. Biraq ókinishke qaraı ol kúılerdiń orkestrge laıyqtalǵan partıtýralary osy kezge deıin jınaqtalmaǵan, bir izge túsirilmegen. Biz bıyl osy ispen júıeli aınalysyp, Qazaqstannyń ár túkpirindegi óner ujymdarynda, dırıjer áriptesterimizde, oqý oryndarynda bar partıtýralardy jınaqtap, rettep, jeke jınaq shyǵarýdy josparlap otyrmyz. Al «20 jyldyqqa – 20 konsert» atty aýqymdy jobamyz boıynsha oraldyq kórermen ǵana emes, ózge óńirdegi jankúıerlerimiz aldynda da óner kórsetemiz, - deıdi Dáýletkereı atyndaǵy qazaq halyq aspaptary orkestriniń bas dırıjeri jáne kórkemdik jetekshisi, «Qurmet» ordeniniń ıegeri, memlekettik «Daryn» jastar syılyǵynyń laýreaty, mádenıet salasynyń úzdigi Erkin Nurymbetov.

Oral qalasyndaǵy Dáýletkereı atyndaǵy ult-asspaptar orkestrin alǵash quryp, irgetasyn qalaǵan – Qazaqstan Respýblıkasynyń eńbek sińirgen qaıratkeri, Dáýletkereı atyndaǵy qazaq halyq aspaptary orkestriniń bas dırıjeri Qyrymgereı Qajymov. 2000 jyly elimizde «Mádenıetti qoldaý jyly» jarııalanǵan kezde, sol kezdegi oblys, qala basshylarynyń kómegimen paıda bolǵan óner ujymy búginde birneshe halyqaralyq saıystardyń júldegeri bolyp úlgergen. Qazaqstan ishinde Dáýletkereı orkestrin óner mamandary jaqsy tanıdy. 

- Dáýletkereı – erekshe kompozıtor. Bizdiń Qurmanǵazy, Dáýletkereı, Dına kúıshilerimiz birin biri qaıtalamaıdy, árqaısysy óz aldyna bólek. Dáýletkereı qazaqtyń dástúrli kúı ónerin álemdik mýzykamen ushtastyrdy. Bul jóninde Zataevıch, Ahmet Jubanov osyndaı qorytyndy jasaǵan. Dáýletkereı kúı ónerine lırıkalyq baǵyt berdi. Ol qazaqtyń alǵashqy án-bı ansamblin de jasaǵan adam. Buǵan onyń zamandasynyń salǵan kartınasy kýá. Dáýletkereıdiń tóńiregi, ósken ortasy kóp ultty boldy. Ol solardy zerttedi, paıdalandy. Dáýletkereı Batys Eýropanyń kompozıtorlaryn bilgen, Verdıdiń, Shtraýstyń shyǵarmalaryn tyńdaǵan. Zataevıchtiń Bókeı ordasyn Venaǵa teńeýi tegin emes, deıdi mádenıet salasynyń ardageri, ólketanýshy Jaısań Aqbaı.

Dáýletkereı Shyǵaıulynyń zıraty búginde Bókeıliktegi Han Ordasy aýylynda, Jáńgir hannyń janynda jatyr. Basyna kesene ornatylǵan. Qazaqstannyń jalpyulttyq kıeli nysandary qataryna engen bul nysanǵa alys-jaqynnan arnaıy keletin týrıster az emes.

- Bıylǵy mereıtoıly jylda kúıshiniń tutas tulǵasy, ómir joly, sońynda qalǵan murasy tolyq zerttelýi tıis. Onyń týǵan jylyna qatysty aıtylatyn túrli boljamdarǵa da naqty derekpen núkte qoıatyn ýaqyt jetti, - deıdi Qyrymgereı Qajymov.

 

Batys Qazaqstan

Sońǵy jańalyqtar

Reseıde altyn qory azaıyp keledi

Ekonomıka • Búgin, 20:25

Túrkistan: Kenege qarsy kúres bastaldy

Aımaqtar • Búgin, 17:03

Ulttyq kınodaǵy karantın

Aımaqtar • Búgin, 16:56

Dúkenderdiń jumys kestesi belgilendi

Aımaqtar • Búgin, 16:55

Aqtaý qalasy karantınge jabylǵan joq

Aımaqtar • Búgin, 16:31

Ulttyq tanymnyń ózegi – tarıhı sana

Rýhanııat • Búgin, 14:51

Uqsas jańalyqtar