Iran Ádilet mınıstrliginiń ókili Golam Hýsseın Esmaılı atalǵan apatqa qatysy bar degen kúdiktilerdiń ustalyp, tergeýdiń bastalyp ketkenin málimdedi. Degenmen, qansha adamnyń jáne naqty kimderdiń jaýapqa tartylǵany týraly aqparat bermedi. Memleket basshysy Hasan Roýhanı halyqqa tele-joldaýynda mundaı apatqa bir adamnyń kináli bolýy múmkin emes ekenin aıtty. Sonymen birge Iran úkimetiniń halyqtyń jáne apatta jaqyndaryn joǵaltqan ár otbasynyń aldynda jaýapty ekenin de eskerdi.
Ýkraına prezıdenti Vladımır Zelenskıı óz kezeginde Iran úkimeti usynǵan 80 myń AQSh dollarynyń az ekenin, budan kóp qarajat talap etetinin aıtty. Sonymen birge ushaqtyń «qara jáshigin» oqý úshin ýkraınalyq mamandardy Iranǵa jiberý «qara jáshiktiń» Ýkraınaǵa qaıtarylmaýyna alyp kelýi múmkin degen kúdigin de jasyrmady. «Olar ony Iranda oqyp, Ýkraınaǵa qaıtarýdyń qajeti joq degen tujyrymǵa kelýi múmkin. Biz «qara jáshikti» ózimiz alǵymyz keledi, ony ózimiz oqymaqpyz. Bul týraly Iran jaǵyna da aıttyq», dedi V.Zelenskıı.
Ýkraına prezıdentiniń sózine súıensek, Iran memleketiniń basshysy Hasan Rýhanı Ýkraına ókilderiniń apattyń sebebin anyqtaý jumystaryna qatystyrylatynyn aıtqan. «Sondyqtan Iranǵa barǵan jaǵdaıda qandaı da bir kúmán týsa, Ýkraınaǵa «jáshikpen» qaıtatynymyzǵa senimdi bolýymyz kerek», deıdi Ýkraına prezıdenti.
V.Zelenskııdiń osynsha senimdi bolýyna ushaqtyń qulaý sebebin Iran áý bastan bildi degen aqparat ta sebep bolyp otyr. «Bizdiń qolymyzda ırandyq Aseman Airlines áýe kompanııasynyń ushqyshy men aeroport dıspetcheriniń áńgimesiniń jazbasy bar. Ol jerde ushaqtyń qulaýyna raketa sebep bolǵany anyq aıtylǵan. Iran muny bilip, bizge aıtpady. Sotta Ýkraına jeńetinine senimdimin», dep túıindedi V.Zelenskıı. Ýkraına tarapy Irannan resmı keshirim suraýdy, apattyń jaýapkershiligin óz moınyna alýdy, japa shekkenderge ótemaqy tóleýdi talap etip otyr.
Irannyń Azamattyq avıasııa uıymy tergeý bóliminiń basshysy Hasan Rezaıefar jazbalardyń taralýy, BAQ-ta jarııalanýy eki el arasyndaǵy seriktestikke keri áser etetinin aıtty. «Bul apat ornynda jumys istep jatqan sarapshylarǵa arnalǵan jazba edi. Ony kópshilikke usyný halyqaralyq normalarǵa qarsy. Sondyqtan Iran budan bylaı Ýkraınaǵa aqparat berýden bas tartady», dedi.
Esterińizde bolsa, dál sol kúni, ıaǵnı 8 qańtarda AQSh Irannyń Iraktaǵy áskerı bazasyna raketa jibergen edi. Iran úkimeti apatty osy oqıǵamen baılanystyryp, Iran áskeri ushaq apatyna adamı faktor sebep bolǵanyn habarlaǵan. Olar ýkraınalyq laınerdi AQSh raketasy sanap, nysanaǵa alǵanyn málimdegen bolatyn. Odan keıin oqıǵa ornynda raketa qaldyqtary tabylyp, ushaqty raketa qulatty degen habar taraı bastady. Brıtanııa premer-mınıstri Borıs Djonson men Kanada úkimet basshysy Djastın Trıýdo sol kúni-aq ushaq apatyna raketa sebep degen tujyrymmen kelisetinin málimdedi. AQSh prezıdenti Donald Tramp bul oqıǵaǵa kúmánmen qaraıtynyn jetkizdi. Tramp «Ushaqtyń tehnıkalyq qateden qulaýy ekitalaı. Ol qate jerdegilerden bolsa kerek», dep jazdy. Kelesi kúni ýkraınalyq sarapshylar da raketany qulatqanyna dálelder tapty. Alaıda Iran úkimeti bul aqparatty tek 11 qańtarda rastady. Sol kezde Iran prezıdenti Hasan Rýhanı ushaq apatyn «keshirilmes qate» dep baǵalap, memleket qajetti sharalar qoldanatynyn aıtqan bolatyn.
