«Biz birgemiz!» chellendjin elordanyń júzdegen myń turǵyny qoldap, kommýnaldyq qyzmetterge qar qursaýymen kúresýge kómektesýde. Atalǵan aksııa aıasynda birikken elordalyqtar qar tazalaý boıynsha jalpy qalalyq senbilik uıymdastyrdy. Qala turǵyndary elordanyń aýlalary men trotýarlaryndaǵy qardy tazalap, kommýnaldyq qyzmetterge kómek qolyn sozdy.
Qalanyń ár bóliginde turǵyndardyń kúshimen 4800 tekshe metrden astam qar jınaldy. Volonterler, blogerler, qazaqstandyq estrada ónerpazdary Rústem Júginisov, Aıgúl Imanbaeva, Tursynbek Qabatov, TerriTima, Álııa Álimjanova, Ádil Ahmetov, Ǵanı Ájikenov sııaqty belsendi qala turǵyndarynyń birlesken kúshimen kómekke muqtaj zeınetkerlerdiń úıiniń aýlalary qardan tazartyldy. Qazaqstan halqy Assambleıasy etnomádenı birlestikteriniń ókilderi «О́ndiris» turǵyn úı alabynda turatyn UOS ardagerleri men qart zeınetkerlerge qar kúreýge qol ushyn sozdy.
Sonymen qatar bul iske joǵary oqý oryndary men kolledj stýdentteri, bilim berý jáne densaýlyq saqtaý mekemeleriniń qyzmetkerleri de qatysyp, olar óz ǵımarattarynyń aýmaǵyn qardan tazartty.
Senbilik is-sharaǵa barlyǵy 475 qyzmet kórsetýshi uıym qatysyp, 978 aýla jınaldy. Elordalyq volonterler shtabynyń jetekshisi Shyńǵys Tileýlın atap ótkendeı, qysqy merzim ishinde mundaı kómek muqtaj turǵyndarǵa turaqty negizde kórsetiletin bolady.
«Sýyq biz úshin qorqynyshty emes. Sondaı-aq ystyq shaı men azyq-túlik sebetterin taratatyn bolamyz, qar tazalap, elordalyqtardy birlesip ıgi ister jasaýǵa shaqyramyz», dedi ol.
Esterińizge sala keteıik, «Biz birgemiz!» chellendji elordalyq turǵyndar arasynda tanymaldylyqqa ıe bolyp, qala turǵyndarynyń kóbi qala aýmaǵyn qardan tazartyp, áleýmettik jelilerde #Bizbirgemiz heshtegimen beıne jáne fotosýretterdi ornalastyrýda. Aksııa jyl basynda bastalǵan bolatyn. Gıdrometeorologııalyq ortalyqtyń málimetteri boıynsha qańtar aıynda Nur-Sultanda qar qalyńdyǵy rekordtyq dárejege jetken. Sońǵy ret mundaı kórsetkish 1964 jyly belgilendi.
