Jas ǵalym ǵaryshqa ushý úshin balama energııa kózderin alý jolyn zerttep, ózindik teorııasyn jasap shyqqan bolatyn. Múmkindigi shekteýli ekenine qaramastan on jeti jasar ǵalym ǵylym jolynda budan da basqa izdenisterge baryp júr. Onyń London qalasynda álemge áıgili fızık Stıven Hokıngpen kezdeskeni de talaıdyń qyzyǵýshylyǵyn týdyrdy. Jas ǵalym osy ýaqytqa deıin múmkindigi shekteýli adamdarǵa arnalǵan STEM ınnovasııalary ulttyq konkýrsynyń laýreaty atanyp úlgerdi. Sondaı-aq byltyr qarasha aıynda Koreıa elinde álemniń 23 eliniń ókilderi qatysqan aqparattyq tehnologııalar baıqaýynda da úzdik dep tanylyp, jeńiske jetti.
«Búginde bizdiń qoǵamda múmkindigi shekteýli adamdarǵa barynsha jaǵdaı jasalýda. Árıne, bul qýanarlyq jaǵdaı. Shyndyǵynda, álemdegi barlyq sala qarqyndy damý ústinde. Mundaı úderisten Taraz qalasy da qalys qalmaı keledi», deıdi I.Mýstopýlo. Isaak jýyrda oblys ákimi Asqar Myrzahmetovpen kezdesip, ǵylym jolyndaǵy jańalyqtarymen bólisken edi. A.Myrzahmetov I.Mýstopýloǵa jaqynda ashylǵan Sherhan Murtaza atyndaǵy «Rýhanııat jáne tarıhtaný» ortalyǵynda ǵylym jolynda izdenip júrgen jastar úshin úıirme nemese klýb uıymdastyrý týraly usynysyn aıtqan bolatyn. Isaak bul bastamany qýana qoldady. Sebebi, ol da ózi oqıtyn mekteptiń qabyrǵasynda osy ispetti sharýa uıymdastyrýǵa árekettenip júr eken. Maqsaty – ǵylymnyń shyńyna shyǵý, qoǵam ıgiligine jaraıtyn jańalyqtar ashý. «Eger klýbty oblys kóleminde uıymdastyratyn bolsa, onda jastar úshin keń perspektıvalarǵa jol ashylatyn bolady», deıdi jas ǵalym.
Búgingi tańda óńirde 166 balabaqsha men 331 mektepte ınklıýzıvti bilim berýdi damytýǵa barlyq múmkindik qarastyrylǵan. Atalǵan bilim nysandarynda pandýstar, tutqalar, keń esikter, demalys buryshtary, taktıldi joldar jáne dene múmkindikteri shekteýli adamdar úshin basqa da qolaıly jaǵdaılar jasalǵan. Budan ózge 46 orta jáne arnaýly oqý oryndarynyń 20-synda erekshe bilim berý qajettilikteri bar stýdentterdiń esh kedergisiz bilim alýy qamtamasyz etilgen. Bul jerlerde de Isaak Mýstopýlo sııaqty shekteýli múmkindigi arman jolyna kedergi bola almaıtyn bilimdi jastar ósip keledi.
Jambyl oblysy
