Qoǵam • 07 Aqpan, 2020

Medısınalyq qyzmetterdiń sapasy artady - Baqytjan Saǵyntaev

33 retkórsetildi

Bul týraly Almaty qalasynyń ákimi B. Saǵyntaev «Dýman» yqshamaýdanynyń turǵyndarymen ótken kezdesýde málimdedi. Jıynda Medeý aýdanynyń ákimi Sultanbek Mákejanov atqarylǵan jumystar jaıynda esep berdi. 

Shahar basshysy Baqytjan Saǵyntaev aýdan ákimderiniń eseptik kezdesýlerine iriktep qatysyp keledi. Ár aýdan ákimi aýdan turǵyndarymen 5 ret kezdesý ótkizedi. Jıynda Sultanbek Almasbekuly aýdannyń áleýmettik-ekonomıkalyq damýy men sheshilgen ınfraqurylymdyq máseleler týraly baıandady. О́tken jyly jalpy uzyndyǵy 33 shaqyrym bolatyn 19 kósheniń syrtqy jaryqtandyrý jelisiniń qurylysy aıaqtaldy. 1084 jaryq núkteleri ornatyldy. Aǵymdaǵy jyly 279 kóshede jáne 27 aýlada 6200 jaryq núktesin ornatý josparlanýda. Qala ákiminiń tapsyrmasy boıynsha, ótken jyly Kereı-Jánibek handary kóshesindegi tuıyq kóshe turǵyndarynyń máselesi sheshildi. Kóshkin saldarynan jeke úılerdiń qulaý qaýpi bolǵan edi. Qazirgi ýaqytta betkeıdi nyǵaıtý jumystary aıaqtaldy. Jol jóndelip, abattandyrý jumystary júrgizildi. Osylaısha 120 adamnyń ómiri qaýipsizdendirildi.

Sondaı-aq birneshe jyldan beri kóktemgi jáne kúzgi kezeńderde «Terisbulaq» ózeniniń boıyndaǵy 50-den astam jeke turǵyn úıdi sý basqan edi. Bul másele ózen arnasyn tereńdete otyryp, qalpyna keltirý-nyǵaıtý jumystarynan keıin sheshimin tapty. Bul 300-ge jýyq turǵynnyń ómirine qaýip joq degen sóz. О́tken jyly 52 aýlaǵa kúrdeli jóndeý jáne 30 aýlaǵa aǵymdaǵy jóndeý jumystary júrgizildi. Aǵymdaǵy jyly taǵy 41 aýlaǵa kúrdeli jáne aǵymdaǵy jóndeý jumystaryn júrgizý josparlanýda. Medısınalyq qyzmetterdiń sapasy men qoljetimdiligin qamtamasyz etý mańyzy bolyp tur. Qala ákiminiń tapsyrmasy boıynsha «Taý-Samal», «Keńsaı», «Kólsaı», «Sulýsaı» yqshamaýdandarynda 4 feldsherlik-akýsherlik pýnkt ashyldy. Osylaısha 12 myńnan astam turǵynǵa medısınalyq kómektiń qadamdyq qoljetimdiligi qamtamasyz etildi. Jalpy, qala ákimi B. Saǵyntaev atap ótkendeı, medısınalyq mekemelerdi jabdyqtarmen jabdyqtaý máselesi ózektiligin joıǵan emes. О́tken jyly júrgizilgen aýdıt qalanyń emhanalary men aýrýhanalarynyń jabdyqtalýy nebári 20%-dy quraıtynyn kórsetti.

«Sondyqtan biz qalanyń medısınalyq mekemelerin jańartý men qajetti jabdyqtarmen jaraqtandyrýdyń úsh jyldyq josparyn ázirledik. Osylaısha medmekemelerdiń jabdyqtalýyn 90%-ǵa jetkizbekpiz. Osy jylǵa qarajat bólindi», – dedi qala ákimi.

Kezdesýdi qorytyndylaı kele, B. Saǵyntaev turǵyndardy ashyq áńgimesi úshin alǵys bildirip, mundaı kezdesýler ákimdiktegilerge turǵyndardyń talap-tilegin jaqynyraq bilýge múmkindik beretinin aıtty.

«Shaǵyn ýchaskelerdegi mundaı kezdesýler ár aýdanda ótýde. Turǵyndardyń belsendiligi jergilikti sıpattaǵy problemalardy jedel sheshýge, sondaı-aq qysqa merzimdi jáne orta merzimdi damý josparlaryna túzetý engizýge septigin tıgizedi», – dep atap ótti shahar basshysy Baqytjan Saǵyntaev.

Sońǵy jańalyqtar

Ystyq tamaq taratty

Qazaqstan • Keshe

Betperde kıgen kóktem

Tanym • Keshe

Uqsas jańalyqtar