Tehnologııa • 07 Aqpan, 2020

Nazarbaev Zııatkerlik mektebiniń muǵalimi qazaq tildi matematıka saıtyn jasap shyǵardy

53 retkórsetildi

Qyzylorda qalasyndaǵy Nazarbaev Zııatkerlik mektebiniń muǵalimi Muhtar Begaıdarovtyń mektep oqýshylary men muǵalimderge arnap jasap shyqqan saıty Qaznette tanymaldylyqqa ıe boldy. Bir aıdyń ishinde júıege 23 000 belsendi qoldanýshy tirkelip, olar kontent mazmuny men qoljetimdiligine joǵary baǵa berýde.

Saıt qurý ıdeıasy eki jyl buryn paıda bolǵan eken. Qazaq tilindegi materıaldardyń jetispeýshiligin baıqaǵan Muhtar matematıka boıynsha oqýlyqtardyń elektrondy nusqalaryn bir veb-paraqqa jınaqtaýdy qolǵa aldy. Aldymen 600-den astam kitap, vıdeo-oqýlyqtar, ǵylymı maqalalar jáne taqyryptyq teorııalyq materıaldar júktedi. Keıin áriptesteriniń keńesi boıynsha onlaın-platformany túrli resýrstarmen jáne quraldarmen tolyqtyrdy. Saıtta ádistemelik nusqaýlyqtan basqa, qorytyndy emtıhanǵa daıyndalýǵa arnalǵan ártúrli test tapsyrmalary bar. Sonymen qatar pán boıynsha bilimdi tekserýge arnalǵan olımpıadalyq bólim ashylǵan.

– Men saıtty 2018 jyly bastaǵan bolatynmyn. Ony  «NISmath» dep atadym. О́tken jylǵy túlek Arman Álisher saıt logotıpin jasaýǵa kómektesti. Taǵy bir oqýshy Nurbol Bıjigit onyń mobıldi nusqasyn ázirledi», – dedi Muhtar Begaıdarov.

Onyń aıtýynsha, oqyrmandar men saıt paıdalanýshylar geografııasy kún saıyn artyp keledi. Alǵashqy jyldary platformany 1000-ǵa jýyq adam qoldansa, bıyl bir ǵana aıdyń ishinde júıe 23000 belsendi qoldanýshy tirkelgen.

– Saıt óte qoljetimdi jáne zamanaýı bilim berý baǵdarlamasyna beıimdelgen. Barlyq resýrstar tegin, bul paıdalanýshylar úshin óte mańyzdy. Men óz tájirıbemde oqýlyqtardy, tapsyrmalardy jıi qoldanamyn. Sabaqtarda saıttyń qosalqy qosymshalaryn paıdalanamyn», – dedi Jazıra Balabı, Túrkistan oblysyndaǵy aýyl mektebiniń muǵalimi.

Búginde «NISmath» kómegine elimizdiń pedagogtary men oqýshylary júginedi eken. Muhtardyń bul avtorlyq jobasyn paıdalanýshylar ǵana emes, sonymen qatar muǵalimder arasynda ótkiziletin dástúrli respýblıkalyq bilim saıysynyń sarapshylary da joǵary baǵalady. Pedagogıkalyq ıdeıalar festıvaliniń «Sheberlik palıtrasy» bóliminde «nismath.org» ınternet-platformasy áriptesterdiń úlken qyzyǵýshylyǵyn týdyrdy, al jobany qorǵaǵan kezde qatysýshylardyń 100 paıyzy platformanyń belsendi qoldanýshylary bolyp shyqty. Baıqaý nátıjesinde M.Begaıdarovtyń matematıkalyq saıty taratýǵa jáne tájirıbede qoldanýǵa laıyqty úzdik ıdeıa dep tanyldy.

Aıta ketý kerek, 2019 jylǵy qorytyndy attestattaýdyń nátıjeleri boıynsha Muhtar Begaıdarov shákirtteri matematıka páni boıynsha joǵary ball jınap, jıyrma Zııatkerlik mektep arasynda birinshi orynnan kórindi.

Bilim berý júıesin damytýǵa qosqan úlesi men pedagogıkalyq qyzmettegi shyǵarmashylyq jetistikteri úshin Muhtar Bilim jáne ǵylym mınıstriniń Alǵys hatymen marapattaldy.

Muhtar Begaıdarov – bos ýaqytynda óz bastamasy boıynsha mektep oqýshylary men muǵalimderge jańa bilimdi meńgerýge jáne matematıkany baǵyndyrýǵa kómektesetin Syr óńirindegi eń tanymal eriktilerdiń biri.

Sońǵy jańalyqtar

Jetisaılyq jomart jandar

Aımaqtar • Keshe

Ishan baǵy qaıta qalpyna keledi

Rýhanııat • Keshe

? (Suraq belgisi) Poema

Ádebıet • Keshe

Senzýrasyz Abaı

Rýhanııat • Keshe

Uqsas jańalyqtar