Qoǵam • 07 Aqpan, 2020

Bolashaq tilshiler «Egemenniń» jýrnalısterimen júzdesti

342 retkórsetildi

Ál-Farabı atyndaǵy Qazaq ulttyq ýnıversıteti Jýrnalıstıka fakýltetiniń bir top shákirtteri  «Egemen Qazaqstan» gazetiniń Almaty bólimshesine baryp, arnaıy taǵylymdamadan ótti. Bul ıgi shara oqý ordasy men bas basylym arasyndaǵy memorandým aıasynda júzege asyp otyr.

Stýdentterdi  irgeli basylymnyń shańyraǵyna  fakýltet dekany Saǵatbek Medeýbekuly jáne «Baspasóz jáne elektrondy BAQ» kafedrasynyń jetekshi ustazdary bastap bardy.  «Egemenniń» Almaty bólimshesine jetekshilik etetin belgili jazýshy Júsipbek Qorǵasbek bolashaq jýrnalısterdi maqala jazýdyń qyr-syryna qanyqtyryp, aqparat berýdiń tyń tásilderi týraly  áńgimeledi. 

Tilshilik tirshilikke bet alǵan talapkerler úshin teorııalyq bilim qanshalyqty mańyzdy bolsa, mashyqtanǵan mamandardan taǵylym alyp, kásibı biliktilikterin arttyrý da asa qajet. Osyny basa aıtqan Jýrnalıstıka fakýlteti «Baspasóz jáne elektrondy BAQ»kafedrasynyń meńgerýshisi Gúlmıra Sultanbaeva bul baǵyttaǵy rýhanı baılanys júıeli jalǵassa degen tilegin jetkizdi.

Jazý mashyǵyn tereń meńgergen tájirıbeli jýrnalıster qyzmet jolyndaǵy qyzyqty estelikterimen bólisip, maqala jazýda basa mán beretin talaptar men zańdylyqtardy jipke tizdi. Ásirese, ekonomıka, medısına, saıasat sekildi kúrdeli taqyryptardy qaýzaǵanda  neni eskergen jón?  Qatyp qalǵan súrleýden arylyp, shyǵarmashylyq erkindik, tyń stıl qalyptastyrý syndy mańyzdy máseleler erkin formatta órbigen kezdesýdiń ózegine aınaldy. «Egemendik» jýrnalıster Arman Oktıabr, Aınash Esaly, Gúlbarshyn Aıtjanbaıqyzy óz tájirıbelerimen bólisip, stýdentterge jan-jaqty baǵyt -baǵdar berdi.

Budan bólek, bolashaq tilshiler kókeılerindegi saýaldaryn joldap, mardymdy jaýap aldy. Aldaǵy ýaqytta, qazaq baspasóziniń qasıetti ustahanasyna balanatyn aǵa basylym men talaı qabyrǵaly qalamgerlerdi túletken jetekshi fakýltet arasyndaǵy shyǵarmashylyq baılanystar tereńdeı bermek.

Osy rette «Egemen Qazaqstan»  gazetiniń Almaty bólimshesi janynan Jýrnalıstıka fakýltetine qarasty «Baspasóz jáne elektrondy BAQ» kafedrasynyń fılıaly ashylǵanyn súıinshilep aıta ketken jón.

Ańsat DÚISENǴALI,

QazUÝ, Jýrnalıstıka fakýltetiniń 1 kýrs stýdenti

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar