Qoǵam • 08 Aqpan, 2020

Qordaıdaǵy qaqtyǵys: aıyptylar anyqtalýda, jaǵdaı baqylaýda

1474 retkórsetildi

Juma kúni keshqurym Jambyl oblysynyń Qordaı aýdany Masanshy aýyly turǵyndarynyń arasynda toptyq tóbeles oryn aldy. Qazaqtar men dúngender arasyndaǵy kelispeýshiliktiń sońy janjalǵa ulasqan. Masanshydaǵy qaqtyǵys týraly túrli beınetúsirilimder men aqparattar sol kúni-aq keshke qaraı áleýmettik jelilerde tarap ketti. El arasynda dúngenderdiń 80 jastaǵy qarııany balalarymen qosa urǵany, tóbelestiń sodan bastalǵany jaıly da áńgimeler boldy. Alaıda, máseleniń mánisi áli de anyqtalý ústinde. Polısııanyń kúshimen aýyldaǵy tóbeles toqtatylyp, jaǵdaı baqylaýǵa alyndy. Jambyl oblystyq polısııa departamentiniń málimetinshe, oblystyq Tergeý basqarmasy Qazaqstan Respýblıkasy Qylmystyq Kodeksiniń 293-baby, ıaǵnı buzaqylyq boıynsha sotqa deıingi tergeý jumystaryn bastady.

Bul máselege Memleket basshysy Qasym-Jomart Toqaev aıryqsha nazar aýdaryp, óziniń Twitter-degi paraqshasynda «Jambyl oblysy Qordaı aýdanynda buzaqylyq sıpattaǵy jappaı tóbeles boldy. Ony arandatýshylar óz paıdasyna qoldanbaq bolǵan. Polısııa jaǵdaıdy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady», dep jazǵan bolatyn. Sonymen qatar, Prezıdent Qasym-Jomart Toqaev Jambyl oblysyndaǵy jaǵdaıǵa baılanysty málimdeme jasady. Memleket basshysy qaqtyǵys kezinde qaza bolǵan azamattardyń otbasylaryna kóńil aıtyp, Úkimet komıssııasyn qurýdy tapsyrǵanyn, komıssııa bolǵan oqıǵanyń sebebin anyqtaıtynyn jetkizdi. «Beıbitshilik pen qoǵamdyq kelisim – bizdiń memleketimizdiń berik negizi. Halqymyz qıyn-qystaý zamandarda óziniń birtutastyǵyn saqtap qalǵan. Sondyqtan biz keıbir azamattarǵa, sonyń ishinde arandatýshylarǵa elimizdiń basty qundylyǵyn – yntymaq-birligimizdi buzýǵa jol bermeımiz. Bul elimizdegi barsha azamattarǵa ortaq tilek dep sanaımyn. Azamattardy jalǵan qaýesetterge boı aldyrmaýǵa, qoǵamdyq qaýipsizdikti qamtamasyz etý jumysynda quqyq qorǵaý organdaryna kómek berýge shaqyramyn. Memlekettik organdar týyndaǵan máselelerdi sheshý úshin barlyq qajetti sharalardy qabyldaıdy», dedi Prezıdent.

  Qazirgi kezde qaqtyǵysty bastaýshylar men qatysýshylar anyqtalý ústinde. Jambyl oblysynyń polısııa departamenti azamattardan tek resmı aqparatqa ǵana senýdi, qaýasetter men túrli jalǵan aqparattardy taratpaýdy surap otyr. О́ıtkeni, túrli áleýmettik jelilerde ótirik-rasy beımálim túrli aqparattar men beınejazbalardyń tarap ketkeni belgili. Qordaı aýdany, Masanshy aýylynda oryn alǵan tóbeles boıynsha Nur-Sultan qalasynda Ortalyq kommýnıkasııalar qyzmetinde Qazaqstan Respýblıkasynyń Ishki ister mınıstri Erlan Turǵymbaev, Qazaqstan Respýblıkasynyń aqparat jáne qoǵamdyq damý mınıstri Dáýren Abaev jáne Qazaqstan Respýblıkasy Bas prokýrorynyń orynbasary Bolat Dembaevtyń qatysýymen brıfıng ótken bolatyn. Osy jerde alypqashpa áńgimelerge jol berilmeý kerektigi taǵy da aıtylyp, halyqqa naqty málimetter berildi. «7 aqpanda saǵat 19:00-da Jambyl oblysynyń polısııa departamentiniń kezekshi bólimine Qordaı aýdanynyń Masanshy aýylynyń janynda 70-ten astam adam tóbelesip jatyr degen aqparat kelip tústi. Zańsyz áreketterdi toqtatý úshin oqıǵa ornyna dereý polısııa qyzmetkerleri jiberildi. Sol jerde bolǵan adamdar tóbelesti vıdeoǵa túsirip, áleýmettik jeli arqyly taratqan. Nátıjesinde, basqa aýyldardan kelgen 300-den astam azamat tóbeleske qosylyp ketti. Eki jaq bir-birine tas laqtyryp, taıaqpen uryp, qarý qoldandy. Nátıjesinde 8 adam qaıtys boldy. 40 adamnan astam jaraqat aldy. Arasynda qarýdan zardap shekkender de bar. Jaǵdaıdy turaqtandyrý úshin oqıǵa ornyna ishki ister organdarynyń qosymsha kúshteri jiberildi», dedi Erlan Turǵymbaev. Qazirgi kezde Masanshy aýylynda bolǵan jaǵdaıdyń sebebin anyqtaý úshin jedel tergeý toby qurylǵan. Sol boıynsha jumystar atqarylýda.

  Sonymen qatar, Dáýren Abaev Qordaı aýdanyndaǵy jaǵdaı týraly aqparat bergende jýrnalısterdi obektıvti bolýǵa shaqyrdy. «Azamattardy alańdatatyn, eldi shýlatatyn málimet bermeýdi suraımyn. Baıqasańyzdar, myna janjal eń basynda tek bir aýyl deńgeıinde bolǵan. Alaıda ýatsap, telegramm sııaqty messendjerler máseleni qozdyrǵan. Jaǵdaıdy ýshyqtyrǵan. Nátıjesin kórip otyrsyzdar. Birneshe adam qaza tapty, jaraqat aldy. Qanshama úı-jaı órtendi. Sondyqtan, umytpaý kerek, árbir taratqan aqparatqa jaýap beremiz. Bul da aıtylǵan sóz sııaqty qaıtara almaısyz. Sondyqtan aýdıo-vıdeony taratqanda abaı bolyńyzdar. Siz taratqan aqparattan kinásiz bireýdiń zardap shekpeýin oılaý qajet. Osy tusta tek jýrnalısterge ǵana emes, elimizdiń árbir azamatyna eskertkim keledi. Biz «Adamzattyń bárin súı, baýyrym dep», degen Abaıdyń elimiz ǵoı. Asyǵys sheshim qabyldamaıyq. Sabyr saqtaıyq. Bul janjaldy bastaǵandar eshqaıda qashyp qutyla almaıdy. Qazir ınternet, barlyq áleýmettik jeliler, messendjerler monıtorıng jasalýda. Ol jerde vıdeo-aýdıo habarlardyń barlyǵy qaralatyn bolady. Qazirdiń ózinde birneshe qoldanýshylar anyqtalyp otyr. Olar ultaralyq arazdyqty qozdyratyn habarlar taratqan. Ol málimetter quqyq qorǵaý organdaryna beriledi», dedi Dáýren Abaev. Al, Bolat Dembaev bul jaǵdaıdyń Bas prokýrordyń da baqylaýynda ekenin, jaǵdaıdy turaqtandyrý maqsatynda  jumystar atqarylǵanyn aıtty. Sonymen qatar, jalǵan aqparat taratý zańǵaı qaıshy áreket ekenin, mundaı jaǵdaıda adamdardyń jaýapqa tartylatynyn atap ótti.

Qordaı aýdanynda oryn alǵan qaıǵyly jaǵdaı boıynsha Prezıdent Qasym-Jomart Toqaevtyń tapsyrmasymen Úkimettik komıssııa quryldy. Al, Jambyl oblysynyń ákimi Asqar Myrzahmetov bastaǵan jergilikti tıisti basshylardyń bári de búginde oqıǵa ornynda. Qazirgi kezde óńirde jaǵdaı turaqty. Janjaldyń qandaı jaǵdaıdan shyqqany, ony kimderdiń bastaǵany anyqtalýda. Memleket basshysynyń tapsyrmasy boıynsha Jambyl oblysynyń ákimdigi Úkimettik komıssııamen birlesip, qaza bolǵandardy jerleý, zardap shekkenderge kómektesý jumystaryn uıymdastyrady.

 

Jambyl oblysy

   

 

 

   

   

 

   

 

  

Sońǵy jańalyqtar

Almatyda onlaın jattyǵý ótedi

Sport • Búgin, 11:51

Jalǵan aqparat taratqan muǵalim ustaldy

Koronavırýs • Búgin, 11:45

Túrkistan: Kásipkerlerdiń kómegi kóp

Aımaqtar • Búgin, 11:13

Naýqastyń jeke deregin kim taratty?

Aımaqtar • Búgin, 10:59

Aqyn Amanhan Álimuly dúnıeden ótti

Rýhanııat • Búgin, 10:53

Qaıyrymdylyq aksııasynyń aýqymy keń

Aımaqtar • Búgin, 09:40

Shekteý sharalary qatań saqtalýy tıis

Koronavırýs • Búgin, 09:18

Meıirlannyń músinderi

Rýhanııat • Búgin, 08:05

Memleket basshysynyń qamqorlyǵy

Qoǵam • Búgin, 07:50

Kúı qudireti

Rýhanııat • Búgin, 07:43

Daýys galereıasy

Rýhanııat • Búgin, 07:39

Aq jeleńdilerge alǵys aıtty

Rýhanııat • Búgin, 07:35

El áńgimelerin ekshegen

Rýhanııat • Búgin, 07:28

Tórt túlik kóbeıse, toqshylyq keledi

Ekonomıka • Búgin, 07:26

Tarıhta qalǵan indetter

Tarıh • Búgin, 07:22

Nesıe tóleýdi toqtata turý tártibi

Ekonomıka • Búgin, 07:21

Onlaın oıynda jeńildi

Hokkeı • Búgin, 07:15

Uqsas jańalyqtar