«Qazir qazaq kúresiniń 100 saǵattyq oqý baǵdarlamasy daıyndaldy. Ol oqý baǵdarlamasynda qazaq kúresiniń álipbıinen bastap, ózindik sport túri retinde barlyq qyrlary, oqytý joldary qamtylǵan. Aldaǵy oqý jyldary qanatqaqty joba retinde Nur-Sultan qalasynyń 5 mektebinde dene shynyqtyrý pánderine qazaq kúresi engiziledi. Barlyq mektepke qazaq kúresi sabaǵyn engizý úshin mamandar tapshylyǵy baıqalýy múmkin», deıdi Dáýren Abaev.
Onyń aıtýynsha, osy rette mamandar daıyndaıtyn qazaq kúresi akademııasyn ashýdy josparlap otyrǵanyn aıtty.
«Sondyqtan biz mamandar daıarlaıtyn Qazaq kúresi akademııasyn ashýdy josparlap otyrmyz. Akademııa mamandardy ǵana oqytyp qoımaı, tóreshilerdiń biliktiligin arttyrý, ulttyq kúrestiń ǵylymı-praktıkalyq turǵyda zerttelýin qamtamasyz etedi. Barlyq álemdik sport túrleri sııaqty qazaq kúresin ǵylymı turǵydan zerdeleýimiz kerek. Solaı ǵana tól kúresimizdi álemdik deńgeıge kótere alamyz. Qazir halyqaralyq arenada qazaq kúresiniń ataýyn ózgertý týraly jıi aıtylyp júr. Osy oraıda biz zertteýshi ǵalymdar tobyna qazaq kúresine qatysty termınderdi júıeleýdi tapsyryp otyrmyz», dedi federasııa prezıdenti.
Qazaq kúresi federasııasynyń bas hatshysy Baqdáýlet Sábıtovtyń aıtýynsha, bıylǵy «Qazaq kúresinen 2020 jylǵa arnalǵan sporttyq-buqaralyq is-sharalardyń biryńǵaı respýblıkalyq kúntizbesinde» balalar, jasóspirimder, jastar jáne eresekter arasynda 104 sporttyq shara uıymdastyrý josparlanǵan. Onyń ishinde, «Bala balýan» týrnıri, Qazaqstan oqýshylar gımnazııadasy, Qazaqstan kolledj stýdentteri arasyndaǵy spartakıada, qazaq kúresiniń bir tarmaǵy sanalatyn beldesýden «Qazaq Arlany», «Dala Arlany» sııaqty sporttyq sharalary tuńǵysh ret ótkeli tur.
Al eresekter arasyndaǵy Qazaqstan Respýblıkasynyń chempıonaty men «Qazaqstan barysy», «Halyq barysy», «Eýrazııa barysy» jobalary jáne respýblıkalyq iri týrnırler jyl saıynǵy dástúr boıynsha turaqty túrde uıymdastyryla bermek.
