Sondaı-aq aýdanda elordany azyq-túlikpen qamtý baǵytynda 25 joba iske asyrylǵan. Turǵyndar sany da kóp. Esep boıynsha 70 myńnan astam turǵyn tirkelse, shyn máninde budan eki ese artyq.
– Selınograd aýdany ótken jyldyń qorytyndysy boıynsha memlekettik bıýdjetke 10,4 mıllıard teńge qarjy quıǵan. Budan bes jyl buryn eki ese az tólemder túsetin,– deıdi aýdan ákimi Malǵajdar Tátkeev.
О́tken jyly Reseı men Qazaqstan arasyndaǵy aımaqaralyq yntymaqtastyq forýmynda jasalǵan memorandýmǵa sáıkes Qabanbaı batyr aýyldyq okrýginde quny 30 mıllıard teńgeni quraıtyn kún elektrostansııasynyń qurylysy bastaý almaq. Sondaı-aq, aýdanda «Qarapaıym zattar ekonomıkasy» baǵdarlamasynyń aıasynda 7 joba iske asqan. Bas qalanyń irgesinde ornalasqandyǵy basty sebep bolsa kerek, óńirde qurylys salasy qarqyndy damýda. Máselen, ótken jyly 214 myń sharshy metr turǵyn úı qurylysy paıdalanýǵa berilse, aǵymdaǵy jyly 23 eldi mekende uzyndyǵy 430 shaqyrymdy quraıtyn joldyń qurylysy bastalmaq. Sonymen qatar shaǵyn jáne orta kásipti damytý da qolǵa alynǵan.
– «Bastaý Bıznes» jobasy boıynsha 258 adam oqýdan ótti. Jańa bıznes-ıdeıalardy iske asyrý úshin 100 aılyq eseptik kórsetkishke deıin 45 adam, 200 aılyq eseptik kórsetkishke deıin 77 adam granttar aldy, 71 kásipker shaǵyn nesıe aldy,– deıdi Selınograd aýdanynyń ákimi Málǵajdar Tátkeev.
Aqmola oblysy.
