Abaı – danalyqtyń dara shyńy. Qazaqqa ǵana emes, bútin túrki jurtyna ortaq jarqyn tulǵa. Qazaq eliniń táýelsizdik jolyndaǵy baǵyt-baǵdaryn aıqyndap, búginge deıin jol kórsetip keledi. Qazaq halqynyń úkilegen úmiti men aq adal tilegi, maqsaty men muraty, muńy men zary dál osy Abaı shyǵarmalarynyń ón boıynda tunyp tur. Hakimniń jekelegen shyǵarmalary ázerbaıjan tiline aýdarylyp, oqyrman oljasyna aınaldy. Ázerbaıjan men qazaq ádebı-mádenı baılanystary kóneden belgili. Tarıhqa úńiler bolsaq, oǵyz-qypshaq folklorlyq mádenıetimen, dástúrimen úndesken mol sabaqtastyqty kóremiz. Túrki halyqtarynyń epıkalyq mádenıetinde aıryqsha mánge ıe Qorqyt jyrlarynyń qazaq dalasyndaǵy sarynyn da aıtýǵa bolady. Tipti qos baýyrlas eldiń ádebı túp-tamyrynyń ortaq negizde ekenin aǵartýshy ǵalym, oıshyl Abaı Qunanbaıulynyń Fızýlı, Shámsı, Sáıhalı, Naýaı, Saǵdı, Fırdaýsı dep jyrǵa qosqanynan ańǵarýǵa bolady. Bul rette túrki áleminiń alybyna degen Ázerbaıjan eliniń qurmeti aıryqsha, sheksiz jaqsy kóredi desem, artyq aıtqandyq emes. Baký ulttyq ýnıversıtetinde onshaqty jyldan beri jumys istep kele jatqan «Abaı ortalyǵy» ulysaralyq qoǵamdyq-saıası jáne mádenı-rýhanı ortada sheshýshi ról atqaratyndyǵyn atap ótken jón. Uly oıshyldy týǵanymyzdaı qasterlep, onyń máńgi ólmes muralaryn qaster tutyp kelemiz. Al bıylǵy Abaı jylynda atqarylýy tıis sharýaǵa jan-jaqty qoldaý kórsetýge, belsene aralasýǵa ázirmiz ári nátıjeli bolatynyna senimim kámil.
Isa Gabıbbeılı,
akademık, Ázerbaıjan ǵylym akademııasynyń vıse-prezıdenti
