Úkimet • 11 Aqpan, 2020

QHR aýmaǵynda koronavırýs juqtyrǵandar arasynda qazaqstandyqtar joq

41 retkórsetildi

Premer-Mınıstr Asqar Mamınniń tóraǵalyǵymen ótken Úkimet otyrysynda Qazaqstanda koronavırýstyq ınfeksııanyń taralýyna jol bermeý sharalary qaraldy. Bul týraly Premer-Mınıstrdiń baspasóz qyzmeti habarlady.

Densaýlyq saqtaý mınıstri Eljan Birtanov qazirgi tańda Qytaı Halyq Respýblıkasynda jańa koronavırýstyq pnevmonııamen naýqas 42 638 adam tirkelgenin, onyń ishinde – 1 016-i qaıtys bolǵanyn jáne 3 996 emdelip shyqqanyn aıtty.

Álemniń 27 elinde 448 adamda koronovırýstyq ınfeksııa rastaldy. Bul rette Qytaıdaǵy syrqattyń taralý qarqyny 31 qańtar men 9 aqpan aralyǵynda 3,6 esege tómendedi (22%-dan 6,1%-ǵa deıin). Sonymen qatar basqa elderde koronavırýstyq ınfeksııanyń taralý qarqyny 3,8%-27% aralyǵynda.

Qytaıdaǵy epıdemıologııalyq jaǵdaıdyń qıyndaýyna baılanysty, Qazaqstan Respýblıkasy Densaýlyq saqtaý mınıstrligi elimizge koronavırýstyq ınfeksııanyń ákelinýi men taralýynyń aldyn alý boıynsha kelesi sharalardy qabyldady: Qazaqstan Respýblıkasynyń Bas memlekettik sanıtarııalyq dárigeriniń, elimizge ákeletin barlyq ótkizý pýnktterindegi sanıtarly-epıdemıologııalyq baqylaýdy kúsheıtú týraly qaýlysy jarııalandy; QHR-dan kelgen barlyq adamdardy turǵylyqty jeri boıynsha monıtorıngteý uıymdastyryldy. Budan ózge medısınalyq uıymdardyń naýqas jáne aýrýǵa kúdikti adamdardy qabyldaýǵa daıyndyq retinde qosymsha 4,5 myń qosymsha tósek orny daıyndaldy. Jeke qorǵanysh quraldarynyń, profılaktıkalaý jáne emdeý zattarynyń qajetti qory quryldy.

«2020 jyldyń 30 qańtarynda Dúnıejúzilik Densaýlyq Saqtaý Uıymy qoǵamdyq densaýlyq saqtaýda halyqaralyq mánge ıe tótenshe jaǵdaı jarııalady. Osyǵan baılanysty Densaýlyq saqtaý mınıstrligi elimizdiń barlyq shekarasynda sanıtarııalyq-epıdemıologııalyq baqylaýdy kúsheıtý týraly buıryǵyn qabyldady», — dedi E. Birtanov. 

Memleket basshysynyń tapsyrmasy boıynsha, aǵymdaǵy jyldyń 27 qańtarynda Premer-Mınıstrdiń orynbasary Berdibek Saparbaevtyń tóraǵalyǵymen Qazaqstan Respýblıkasynda koronavırýstyq ınfeksııanyń paıda bolýy men taralýyna jol bermeý sharalaryn úılestirý jónindegi vedomstvoaralyq komıssııa quryldy, onyń quramyna barlyq múddeli memlekettik organdar men oblystardyń jáne Nur-Sultan, Almaty jáne Shymkent qalalarynyń ákimdikteri kirdi.

Atalǵan komıssııanyń sheshimimen:

  1. Qazaqstan Respýblıkasynda koronavırýstyq ınfeksııanyń paıda bolýy men taralýyna jol bermeý jónindegi is-sharalar jospary bekitildi; 

  2. Kezeń-kezeńmen jolaýshylar tasymaly toqtatyldy (áýe, temir jol, avtokólik);

  3. Úkimettiń rezervinen qosymsha qarjy bólindi.

Respýblıkamyzda koronavırýstyq ınfeksııanyń paıda bolýy men taralýyna jol bermeý maqsatynda memlekettik shekara arqyly ótetin barlyq pýnktterde aǵymdaǵy jyldyń 6 qańtarynan bastap barlyǵy 260 885 adam, onyń ishinde QHR-dan – 30 852 adam qaraldy.

Búgingi jaǵdaı boıynsha dene qyzýy joǵary jáne jedel respıratorlyq-vırýstyq ınfeksııanyń sımptomdary bar 140 adam emdeýge jatqyzyldy, onyń 113-i emdelip shyqty, 27-si stasıonarda em alýda. Emdeýge jatqyzylǵan naýqastardyn eshqaısysynda koronavırýstyq ınfeksııa rastalǵan joq.

Medısınalyq uıymdar Qytaıdan kelgen 23 059 adamdy turǵyn jeri boıynsha 14 kúndik baqylaýǵa aldy. 14 kúndik ınkýbasııalyq mezgildiń aıaqtalýyna baılanysty Qytaıdan kelgen 15 478 adam monıtorıngten bosatylsa, 8 690-y áli de medısınalyq baqylaýda. Eshqaısysynda koronovırýstyq ınfeksııa tirkelmegen. 

Ulttyq asa qaýipti ınfeksııalar ortalyǵy Ulttyq bıotehnologııa ortalyǵymen birlese otyryp koronavırýsty jedel anyqtaýǵa múmkindik beretin dıagnostıkalyq júıe ázirledi.

Osyǵan qosa, Reseı Federasııasy men Qytaı Halyq Respýblıkasynan dıagnostıkalyq testiler alyndy. Nátıjesinde, koronavırýstyq ınfeksııa kúdigimen emdeýge jatqyzylǵan, jáne Ýhan qalasynan evakýasııalanǵan barlyq 313 adam arnaıy zertteýmen qamtyldy. Zertteý qorytyndylary teris – koronavırýs anyqtalǵan joq.

Reseı Federasııasy men О́zbekstan Respýblıkasynyń densaýlyq saqtaý mınıstrlikterimen birlese otyryp Ýhan qalasynan evakýasııalanǵan azamattarymyzdyń densaýlyǵy baqylaýǵa alyndy. Olardyń densaýlyqtary qanaǵattanarlyq, aralarynda koronavırýs anyqtalǵan joq.

Densaýlyq saqtaý mınıstrligi halyq arasynda aýqymdy aqparattyq túsindirý jumysyn jasaýda. Koronavırýstyq ınfeksııa suraqtary boıynsha call-ortalyq táýlik boıy jumys isteıdi. 

Halyqtyń koronavırýstyq ınfeksııadan qorǵanýyn qamtamasyz etý maqsatynda:

1) Medısınalyq baqylaýdy jalǵastyrý, qajet bolǵan jaǵdaıda 14 kúndik karantınge jatqyzýdy qamtamasyz etý qajet. Tıisti nusqaýlyqtar densaýlyq saqtaý basqarmalaryna jiberildi. 

2) Halyq arasynda koronovırýstyq ınfeksııanyń aldyn alý boıynsha aqparattyq túsindirý jumystaryn jalǵastyrý qajet.

Syrtqy ister mınıstri Muhtar Tileýberdi óz kezeginde Syrtqy ister mınıstrliginiń koronavırýstyń Qazaqstan Respýblıkasynyń aýmaǵynda taralýyna jol bermeý boıynsha atqarǵan jumystary týraly baıandady.

Syrtqy ister mınıstrligi Prezıdent Q. Toqaevtyń QHR Tóraǵasy Sı Szınpınniń atyna koronavırýsqa qarsy kúreste Qytaıǵa elimizdiń barynsha kómek kórsetýge jáne tolyqtaı qoldaý kórsetýge daıyn ekeni týraly hatyn joldady. Sondaı-aq Qytaıǵa medısınalyq qolǵaptar (1 mln dana) jáne maskalar (500 myń dana) túrinde gýmanıtarlyq kómek kórsetý máselesi pysyqtaldy.

Budan ózge, dıplomatııalyq arnalar arqyly túsken ótinishterge sáıkes EAEO elderiniń 24 azamatyn (18 Qyrǵyzstan azamaty, 5 Belarýs azamaty jáne 1 Armenııa azamaty) áketýge járdem kórsetildi. Bishkekke birden jiberilgen Qyrǵyz Respýblıkasynyń azamattarynan basqa, Nur-Sultan qalasyna kelgennen keıin azamattardyń barlyǵy karantınge jatqyzyldy. 

Qytaı tarapymen qol jetkizilgen ýaǵdalastyqtardyń nátıjesinde «Eır Astana» áýe kompanııasynyń reısimen 11 aqpanda QR 217 azamaty Nur-Sultan qalasyna jetkizildi, taǵy 155 qazaqstandyq 2020 jyldyń 12 aqpanynda jetkiziledi.

Qytaı tarapynyń ótinishi boıynsha 10 aqpanda «Eır Astana» reısimen Qazaqstannan QHR 43 azamaty jáne QHR Elshiligi men QHR Bas konsýldyǵynyń Almatydaǵy kommersııalyq emes júginiń birinshi bóligi tasymaldandy. Ekinshi bóligi jetkiziledi.

«Osy jyldyń 10 jáne 12 aqpanynda azamattardy evakýasııalaǵannan keıin Qytaı aýmaǵynda QR 343 azamaty, onyń ishinde bizdiń shet eldegi mekemelerdiń qyzmetkerleri men otbasy músheleri qalady», — dep habarlady syrtqy ister mınıstri.

Qazaqstan Elshiligi Bilim jáne ǵylym mınıstrligimen jáne QHR JOO-larymen birlesip, qazaqstandyqtardy qajetti medısınalyq jabdyqtarmen jáne tamaqpen qamtamasyz etý jumystaryn júrgizip jatyr.

Qazaqstan Syrtqy ister mınıstrligi men QHR-daǵy Qazaqstannyń barlyq shet elderdegi mekemelerinde Qazaqstan azamattaryna keńes berý úshin jedel jeliler qurylǵan. SIM men Qazaqstannyń QHR-daǵy mekemeleriniń veb-saıttary arqyly, sondaı-aq túrli áleýmettik jeliler arqyly (facebook, instagram, telegram, weibo, wechat jáne t. b.) aǵymdaǵy jaǵdaı týraly azamattardy der kezinde habardar etý júzege asyrylýda.

Búgingi tańda SIM usynymy boıynsha Qazaqstannyń 450 azamaty Qazaqstanǵa ózderi oraldy.

«Joǵaryda atalǵan sharalar qytaı tarapymen tyǵyz baılanysta júzege asyrylýda, bul Qytaı aýmaǵyndaǵy Qazaqstan azamattarymen baılanysty barlyq máselelerdi konstrýktıvti túrde sheshýge múmkindik beredi. QHR aýmaǵyndaǵy bizdiń azamattardyń quqyqtary men múddelerin qamtamasyz etýge kedergi keltiretin eshqandaı da problemalar joq», — dep sendirdi Syrtqy ister mınıstri.

QHR-daǵy Qazaqstan Elshiliginde bar aqparat boıynsha, 2020 jylǵy 11 aqpandaǵy jaǵdaı boıynsha QHR aýmaǵynda koronavırýstyń jańa túri týdyrǵan pnevmonııamen aýyrǵandar arasynda qazaqstandyq azamattar joq.

Sońǵy jańalyqtar

Abaı murasyna arnalǵan kórme

Rýhanııat • Keshe

Jaǵa ustatqan jat qylyq

Aımaqtar • Keshe

Uqsas jańalyqtar