«Rýhanı jańǵyrý» baǵdarlamasy aıasynda, sondaı-aq Uly Abaıdyń 175 jyldyq mereıtoıy qarsańynda ótken shara elimizdiń rýhanı qundylyǵy – qyz ulaǵatyn dáripteý maqsatynda kópshiliktiń kóńilinen shyqty. Baıqaýǵa qatysqan arýlar uly Abaıdyń kóńil túkpirinde máńgi munartyp qalǵan Toǵjan beınesin aınytpaı jetkizýde óz ónerlerin ár qyrynan tanyta bildi.
Saıystyń alǵashqy kezeńinde ár qatysýshy ózin óleńmen tanystyryp ótse, kelesi kezeńde Abaıdyń oıly óleńderi men qara sózderinen úzindi oqýdan baq synasty. «О́nerge árkimniń-aq bar talasy» demekshi kórermender qatysýshylardyń shyrqaı án aıtyp, myń burala bı bılegen tańǵajaıyp ónerlerine erekshe tánti boldy.
Qyzyqty ári tartysty ótken saıysty saralaǵan qazylar alqasy baıqaý qorytyndysy boıynsha Qaratal orta mektebiniń oqýshysy Aıajan Manarbekqyzyn bas júldege laıyq dep tanydy.
Ulttyq bolmysymyz ben rýhanı qundylyqtarymyz dáriptelgen baıqaýdyń joǵary deńgeıde ótýinde aýdandyq mádenıet úıiniń rejısseri Alma Súleımenova men Qaratal orta mektebiniń muǵalimi Gúlden Saıranovanyń eńbekteriniń erekshe ekendigin atap ótken jón. Sonymen qatar hakim óleńderin jatqa oqyǵan júrgizýshiler Zaısan tehnologııalyq kolledjiniń stýdentteri, «Jastar» poezııa teatrynyń músheleri Álisher Slıambekov pen Aıqyn Qýandyq jáne «Jastar» poezııa teatrynyń ózge de jas ónerpazdary ónerlerimen kórermenderin tánti etti.
Áserli keshtiń kýási bolyp, aqylyna kórki saı, ınabatty da ıbaly qyzdarymyzdyń ónerine súısindik. Uly Abaı jyrlap ótken, esimi mahabbat pen sulýlyqtyń sımvolyna aınalǵan Toǵjandaı qyzdarymyz kóp bolǵaı degimiz keledi.
Nurgúl HALYQOVA,
jýrnalıst
Shyǵys Qazaqstan oblysy,
Zaısan aýdany
