Aımaqtar • 12 Aqpan, 2020

Qart maıdangerge qurmet

22 retkórsetildi

Jeńistiń 75 jyldyǵyna arnalǵan «Biz – Jeńistiń muragerimiz!» atty Taǵzym estafetasy aıasynda áıgili Panfılov dıvızııasynyń jaýyngeri, soǵys ardageri Qaıyrly Jonqabaevtyń úıiniń aýlasynda saltanatty sherý uıymdastyryldy.

Qart maıdanger turyp jatqan úıdiń janynan Ulttyq ulan sarbazdary Jaýyngerlik Týmen, áskerı orkestrdiń súıemeldeýimen sap túzep ótip, ardagerge erekshe iltı­pat, qurmet kórsetti.

Jasy toqsan toǵyzǵa kelip qalǵan qarııanyń úıine arnaıy atbasyn burǵan Ulttyq ulan Bas qolbasshysynyń orynbasary, general-maıor Muhametqalı Satov pen qazaqstandyq IIO men Ulttyq ulan Ardagerler keńe­siniń tóraǵasy mılısııa general-maıory О́mirzaq Bolsambekov Jeńis merekesimen quttyqtady. Ishki ister mınıstri men Ulttyq ulan Bas qolbasshysynyń atynan syı-sııapat kórsetildi.

Shara barysynda áskerı or­kes­tr soǵys jyldaryndaǵy án­derdi oryndap, maıdangerdiń kó­­ńilin bir serpiltip tastady.

Qaıyrly Ýataıuly Shyǵys Qazaqstan oblysy Samar aýdanynda dúnıege kelgen. Eńbek jolyn 1940 jyly Shyǵys Qazaqstan oblysy Qulja orta mektebinde muǵalim bolyp bastaǵan. 1941 jyly qazan aıynda Panfılov dıvızııasynyń 23-shi gvardııalyq polkine Qyzyl ásker jaýyngeri bolyp alynǵan.

Ardager soǵysqa basynan aıaǵyna deıin qatysqan eken. 8-shi gvar­dııalyq atqyshtar dıvızııasy quramynda mergen, pýlemetshi, barlaýshy bolyp azamattyq boryshyn ótegen.

– Men Keńes Odaǵynyń Batyry Málik Ǵabdýllınmen bir rotada boldym, Belarýs, Polsha, Estonııany azat etýge qa­tystym. 1943 jyly aqpanda Rjev­tegi qandy maıdanda aýyr jaralanyp, jeńisti Drezdende qarsy aldym, – deıdi maıdanger.

Qaıyrly ata soǵystan keıin Samar aýdandyq atqarý komı­tetinde bólim meńgerýshisi bolyp istedi. Ári qaraı aýdandyq tuty­nýshylar odaǵynyń júıe­sinde basshylyq laýazymda­ryn­da bolǵan. 1970-1983 jyl­da­ry aralyǵynda Almaty­da­ǵy qoǵamdyq tamaqtandyrý júıe­sinde sharýashylyq esepteriniń dırektory boldy. 1983 jyly qurmet demalysyna shyqty, bes bala tárbıelep ósirdi.

Uly Otan soǵysynda kór­setken erlikteri úshin «Qyzyl Jul­dyz» jáne II dárejeli «Otan soǵysynyń» ordenimen, «Erligi úshin», «Máskeýdi qorǵaǵany úshin» jáne basqa da kóptegen me­dalmen marapattalǵan.

– Soǵystan keıin úıli-barandy bolyp, 5 bala tárbıelep ósirdim, búgingi tańda urpaǵymnan on nemere, on úsh shóbere súıip otyrmyn. Allanyń bergenine razymyn. Ǵasyrlyq jasyma taıaý qaldym. Meniń sizderge degen alǵysym sheksiz. Estafetanyń atrıbýty retinde Keńes Odaǵynyń Batyry general-maıor I.V.Panfılov atyndaǵy áıgili 8-shi gvardııalyq dıvızııanyń Jaýyngerlik Týy­nyń kóshirmesi alynypty. So­ǵysta osy dıvızııanyń qata­ryn­da bolǵan soń bul men úshin erekshe qýanysh boldy. Endigi ýaqytta ondaı zulmat bolmasyn. Osyndaı maǵan kórsetken qurmetterińizge úlken alǵysymdy bildirip, aq batamdy beremin, dep sózin aıaqtady qarııa.

 

Qýanysh QOJAHMETOV

 

ALMATY

Sońǵy jańalyqtar

Juma: Almatyda 28 indet oshaǵy karantınde tur

Ońtústik Qazaqstan • Keshe

Almatyda zerthanalar sany artady

Ońtústik Qazaqstan • Keshe

Uqsas jańalyqtar