Úkimet • 12 Aqpan, 2020

A.Mamın Shymkent qalasyn damytý máseleleri jóninde keńes ótkizdi

74 retkórsetildi

Premer-Mınıstr Asqar Mamın Shymkent qalasyna jumys sapary aıasynda qalany damytý máseleleri jóninde keńes ótkizdi. Bul týraly Premer-Mınıstrdiń baspasóz qyzmeti habarlady.

Shymkentti damytýdyń 2019-2023 jyldarǵa arnalǵan keshendi josparyn iske asyrý týraly, áleýmettik-ekonomıkalyq jaǵdaı, ınfraqurylymdyq qurylys, elektrmen jáne gazben jabdyqtaý, sondaı-aq, qalanyń 2020 jyly TMD-nyń mádenı astanasy mártebesin alýy aıasynda is-sharalardy ótkizýge daıyndyǵy týraly Shymkent qalasynyń ákimi Murat Áıtenov, mádenıet jáne sport mınıstri Aqtoty Raıymqulova, ındýstrııa jáne ınfraqurylymdyq damý birinshi vıse-mınıstri Qaıyrbek О́skenbaev, ulttyq ekonomıka vıse-mınıstri Ermek Alpysov jáne energetıka vıse-mınıstri Jumabaı Qaraǵaev, «Báıterek» UBH» AQ basqarma tóraǵasy Aıdar Áriphanov baıandady.

«Bıyl Shymkent TMD-nyń mádenı astanasy bolyp tabylady. Osy jyldyń resmı ashylýyna Prezıdent Qasym-Jomart Kemeluly Toqaev qatysady dep josparlanǵan», dedi A. Mamın.

Úkimet basshysy ózekti áleýmettik-ekonomıkalyq máseleler men qala turǵyndarynyń turmys sapasyn arttyrý máselelerin ýaqytyly sheshýdiń, sondaı-aq TMD-nyń mádenı astanasy jyly aıasynda josparlanǵan barlyq is-sharalardy joǵary deńgeıde ótkizýdiń mańyzdylyǵyn atap ótti. 

A. Mamın tıisti memlekettik organdarǵa jáne Shymkent qalasynyń ákimdigine TMD-nyń mádenı astanasy jyly aıasyndaǵy barlyq is-sharalarǵa sapaly daıyndyqty qamtamasyz etýdi, sonymen qatar eki apta merzim ishinde sýmen, elektrmen jáne gazben jabdyqtaý, turǵyn úı qurylysy jáne kólik salalarynda ınfraqurylymdyq jobalardy qarjylandyrý máselelerin qaraýdy tapsyrdy.

Jumys sapasy aıasynda A. Mamın Shymkent qalasyndaǵy halyqaralyq áýejaıdaǵy ótkizý qabileti saǵatyna 2000 jolaýshyny quraıtyn jolaýshylar termınalynyń salyný barysymen tanysty, ony bıyl qazan aıyna qaraı aıaqtaý josparlanǵan. 

Ońtústik AEA aralaý kezinde Úkimet basshysyna 1700-den asa jańa jumys ornyn qurýmen jalpy somasy 58,8 mlrd teńge bolatyn, qazir iske asyrylyp jatqan 23 joba týraly baıandaldy. Iri perspektıvaly jobalardyń biri retinde 2020-2025 jyldary salynatyn sorǵylaý jabdyqtary men qubyr armatýrasyn óndiretin zaýyt qurylysy tanystyryldy. Jobanyń quny — 26,5 mlrd teńge, 1500 jumys orny qurylady. 

Premer-Mınıstr uzaq jyldardan beri jumysy toqtap qalǵan tigin jáne jip ıirý toqyma fabrıkalaryna baryp, «Qazaqstannyń ınvestısııalyq qory» AQ-nyń olardy iske qosý jáne Qazaqstannyń toqyma klasterin odan ári damytý jobalarymen tanysty. Kásiporyndardy bıyl paıdalanýǵa berý josparlanyp otyr, bul 800-ge jýyq jańa jumys orny men Qazaqstanda óńdeletin maqta kóleminiń eki ese ósimin qamtamasyz etedi. 

Úkimet basshysy arheologııalyq qazbalar kezinde tabylǵan «Shymkent qalashyǵy» (Sıtadel) restavrasııalaý jáne mýzeılendirý jobasynyń iske asyrylý barysyn tekserdi. Munda ejelgi dáýir mýzeıi, galereıa, amfıteatr salynatyn bolady. Jobanyń tarıhı qundylyǵy zor jáne ol Shymkenttiń tartymdy týrıstik nysanyna aınalady. 

О́ńirdiń týrıstik áleýetin damytý aıasynda A. Mamın sonymen qatar Shymkent qalasynan 60 shaqyrym qashyqtyqta ornalasqan Túrkistan oblysy Tóle bı aýdanyndaǵy Qasqasý shatqalyna baryp, «Qasqasý» týrıstik rekreasııa kesheniniń jobasymen tanysty.

Sońǵy jańalyqtar

Abaı murasyna arnalǵan kórme

Rýhanııat • Keshe

Jaǵa ustatqan jat qylyq

Aımaqtar • Keshe

Uqsas jańalyqtar