Volonterlik – halyqtyń shynaıy bolmysy

Áleýmettik jaýapkershilik artady

Jıyn barysynda sóz sóı­legen Qasym-Jomart Toqaev Vo­lon­ter jylynda kóptegen aý­qym­dy joba qolǵa alynatynyn atap ótti. Mundaı ortalyqtar eli­­miz­diń barlyq óńirinde ashyl-
­maq.

О́z sózinde Memleket basshysy volonterlikpen aınalysý qazaq halqynyń boıynda bar asyl qasıet ekenin eske salyp, ata saltymyzdy qaıta jańǵyrtýdyń sáti kelgenine toqtaldy.

«Igi ispen aınalysý, adam­darǵa jaqsylyq jasaý – hal­qy­myzdyń kóne zamannan kele jat­qan dástúri. Biz osy dástúrdi saqtap qalýymyz kerek. Sebebi bireý­ge qol ushyn sozyp, qoldaý kórsetý – qanymyzǵa sińgen qasıet. Halqymyzda osyndaı bere­ke-birlikke shaqyratyn «Asar» dástúri bar. Bul – ǵasyrlar boıy qun­dylyǵyn joımaǵan ata salty­myz. «Jumyla kótergen júk jeńil» deıdi halqymyz. Volon­terlik qyzmettiń basty maqsaty da – birge jumylyp, halyqqa qyz­met etý», dedi Q.Toqaev.

Prezıdent qıyn-qystaý ke­zeń­­de Qazaqstanǵa jer aýdary­lyp kelgen kóptegen etnos ókil­derin qazaq halqy baýyryna basyp, bir úzim nanymen bóliskenin atap ótti. «О́zderińizge tarıhtan málim, kezinde Qazaqstanǵa kóptegen ult ókilderi jer aýdaryldy. Sol qıyn-qystaý ýaqytta halqymyz olar­dy baýyryna basyp, bir úzim nanyn bólisti. Shynaıy jana­­shyr­lyq kórsetý – qazaq halqyna tán qasıet. Mine, naǵyz volonter atanýdyń ozyq úlgisi dep osy­ny aı­týy­myz kerek», dedi Mem­leket bas­­shysy volonterlermen kezde­sýinde.

Búginde dúnıe júzinde volon­ter­likpen aınalysý úrdisi keń tara­lyp, álemdik qozǵalysqa aınal­ǵany belgili. Máselen, álem­dik ishki jalpy ónimniń 2,5 paıyzy – eriktiler eńbeginiń nátıjesi. Osy­ny eske salǵan Memleket bas­shysy osy salaǵa bel sheship aralasýǵa shaqyrdy.

«Qazirdiń ózinde jer betinde 1 mıllıardqa jýyq adam volon­­ter­likpen aınalysady. Olar­dyń jahandyq damýǵa tıgizer úlesi zor. Kóptegen elde volonter ataný qa­lypty jaǵdaı, úlken qurmet sanalady. Jurtshylyq olardy syılaıdy. Mysaly, Fransııa hal­qynyń jartysyna jýyǵy volonter atanǵan. Germanııa men Ja­ponııada volonterlerdiń sany jyl­dan-jylǵa kóbeıip keledi. Biz de osyndaı deńgeıge umtylýymyz ke­rek. Azamattarymyz ózgege kó­mek kórsetýden aıanyp qalmaýy tıis. Sol arqyly qoǵamda áleý­met­tik jaýapkershilikti arttyramyz», dedi Prezıdent.

Hakim Abaıdyń «Qareket qyl, paıdasy kópke tısin» degen ulaǵatty sózin keltirgen Pre­zı­dent volonterlikti keńinen dárip­tep, bereke-birligimizdi arttyratyn sharalarǵa bir el, tutas ult bolyp atsalysý qajettigin atap kórsetti.

«Volonterlik – patrıotızmniń bir kórinisi. Eriktiler, eń aldymen, eldiń ıgiligine qyzmet etedi. Olar­dyń jumysy azamattyq qoǵam­dy odan ári damytýǵa múmkin­dik beredi. Volonterlik – «bir jeń­nen qol, bir jaǵadan bas shyǵa­ryp» áreket etý. Volonterlik – halqy­myzdyń shynaıy bolmysy. Bul bastama ultty uıystyryp, mem­lekettilikti nyǵaıtý úshin qajet», dedi Q.Toqaev.

 Oı-sanany jańǵyrtatyn bastama

Prezıdent volonterliktiń naqty istermen kórinetin pat­rıo­tızmniń joǵary deńgeıin bildi­retinine toqtalyp, bireýdiń dúnıe-múlkine qol suǵyp, tonaýmen aınalysatyndardy patrıot sanamaıtynyn jetkizdi.

«Otanǵa degen mahabbat úlken urandar men bos deklarasııalar emes, bul – kúndelikti eńbek, so­nyń ishinde halyqtyń ıgiligi úshin shynaıy atqarylatyn qaıy­rymdy is. Bul – adamnyń bolmysy, bul – tereń bilim, joǵary minez-qulyq mádenıeti. О́zgeniń dúnıe-múl­kine qol suǵatyn, tonaýmen aınaly­satyn, jalǵan patrıottyq uran­dardy taratatyn adamdar patrıot emestigin túsinýimiz kerek. О́zgelerdiń múlkin tonap, olardyń ómirine qaýip tóndirgen azamattar halqymyzdyń patrıoty emes. Mundaı adamdar – zańdy óreskel buzǵan qylmyskerler. Sondyqtan olar qoǵam men memleket aldynda zańǵa sáıkes jaýap berýi tıis», dedi Q.Toqaev.

Memleket basshysynyń aı­týyn­sha, patrıotızm, qoǵamǵa qyz­met etý jáne ıgilikti is – adam­nyń tulǵalyq jáne rýhanı damýy­nyń joǵary deńgeıiniń jarqyn kórinisi.

«Volonterlik – memleket pen qoǵam ilgerileýiniń jarqyn kóri­nisi. Eldiń damýy men jetistigi ha­lyqtyń patrıottyq belsendi áre­ketine tikeleı baılanysty. Olar kún saıyn mańyzdy qyzmet etedi. Mundaı azamattar bizde az emes. 16 myń adam – bastapqy meje. Keleshekte júz myńdaǵan, mıl­lıon­daǵan adam jan-tánimen, erikti túrde volonterlikpen aınaly­satynyna senimdimin. Memle­kettiń, atqarýshy bıliktiń jáne Par­lament depýtattarynyń mindeti – volonterlik qozǵalysqa atsalysýǵa múmkindik berý.

Volonterlik qyzmet reformalardy júzege asyrýda, jalpy mem­leketimizdi jańǵyrtýda mańyz­dy ról atqarady. Iаǵnı volon­terler ózderiniń is-áreketi­men asa mańyzdy reformalar­dy júzege asyrýǵa naqty úles qo­sady. Eńbekqorlyq, álemge ashyq­tyq arqyly ozyq tehnolo­gııaǵa jáne joǵary eńbek ónim­dili­gine negizdelgen jańa ekonomıka qura alamyz. Volonterlik ıdeıa­syn belsendi ilgeriletý otandas­tarymyzdyń oı-sanasynyń jańa paradıgmasyn jańǵyrtýǵa yqpal etedi», dedi Prezıdent.

Jıyn barysynda jaqynyna kómektesý qazaq ultynyń qanyna sińgen erekshe qasıet ekeni de aıtyldy. Memleket basshysy mundaı dástúr qıyn-qystaý kezeńde  ha­lyq retinde bolmysymyzdy saq­tap qalýǵa kómekteskenine ekpin berdi.

«Búgin de elimizdiń azamattary muqtaj jandarǵa qol ushyn berýge árdaıym daıyn ekenin kórsetip keledi. Arys oqıǵasy – sonyń aıqyn dáleli. Tótenshe jaǵdaı ke­zinde Qazaqstannyń túkpir-túkpi­rinen jınalǵan volonterler zardap shekkenderge kómektesti. Qa­lany qalpyna keltirýge belsene atsalysty. Bizdiń halqymyz ózge­niń basyna túsken jaǵdaıǵa eshqashan beıjaı qaramaǵan. Buǵan kúndelikti ómirden kóptegen mysal keltirýge bolady», dedi Q.Toqaev.

Qasym-Jomart Toqaev volonterler aldynda sóılegen sózin­de belsendi uıymdardy atap ótti. Atap aıtqanda, qıyn turmys­tyq jaǵdaıǵa tap kelgen adamdar­ǵa kómek qolyn sozýǵa daıyn myń­daǵan belsendisi bar ulttyq volonterler jelisiniń, «Lider.kz», «Best for kids», elordalyq «28 petel» klýby men «Qamqorshylar klýbynyń» jumysyna joǵary baǵa berdi.

Ulttyq volonterlik jeli 10 jyl ishinde myńdaǵan belsen­dini jınap, kez kelgen mańyzdy ári qıyn sátte kómek qolyn sozýǵa ázir. Uıym úlken kompanııalarda korporatıvti volonterlikti damytyp, ádisteme arqyly kómektesip, elimizge kelgen qonaqtar men týrısterge arnalǵan erikti kezdesý ótkizedi.

Sondaı-aq «Lider.kz» volon­terlik qozǵalysynyń jumysyn erekshe atap ótken jón. Bul uıym tótenshe jaǵdaıda kómek kórsetý úshin qurylǵan. Onyń músheleri joǵalǵan azamattardy izdestirýge belsene atsalysady. Qazir osy qozǵalystyń qatarynda bir jarym myńnan astam erikti bar.

Volonterlikpen aınaly­syp júrgen «Best for kids» qoǵam­dyq qorynyń da jumysy – kópshi­likke úlgi-ónege. Bul uıym óz qyz­metin osydan on jyl buryn Aqmola oblysynda bastaǵan. Sodan beri balalar úıindegi jas­óspirimderge turaqty qoldaý kór­setip keledi. Qor jastarǵa jiger beretin túrli dárister, trenıng­ter ótkizedi. Sonymen qatar jetim ba­lalarǵa kómektesedi. Mine, osyn­daı volonterlik uıymdardy kó­beıtýimiz kerek», dedi Prezıdent.

Prezıdent mundaı mysaldyń elimizde kóptigin aıta kele, Qazaq­standa volonterliktiń birte-birte jalpyulttyq sıpat alyp kele jatqanyna toqtaldy.

«Bul úderis Volonter jylynda atqarylatyn is-sharalardyń arqasynda azamattarymyzdy odan ári biriktire túsetinine senim­dimin. Igi ister bizdiń mádenı bire­geı­ligimizdiń ajyramas bóligine aınaldy. Elimizde 200-den astam volonterlik uıym bar. Onda 50 myńnan astam volonter jumys isteıdi», dedi Memleket basshysy.

 Jeńildik jasalyp, qoldaý kórsetiledi

Jyl basynan beri áleýmettik mańyzy zor ondaǵan jalpyulttyq joba qolǵa alyndy. Volonter jy­lynyń basty urany – «Birgemiz». Sondyqtan bıylǵy barlyq bas­tama men ıgi is halqymyzdyń birligin bekemdemek. Memleket basshysy ózi usynǵan «Ár alýan pikir – birtutas ult» tujyrymy osyn­daı sharalar arqyly júzege asyrylatynyna nazar aýdardy. Osy oraıda, memleket eriktilerge ár­qa­shan qoldaý kórsetetinin jetki­zip, mańyzdy birqatar baǵyt­ty atap kórsetti.

«Jastar jylyn qorytyndylaý jıynynda qoǵamnyń naqty má­selelerin sheshýge arnalǵan bir­qa­tar jobalardy aıtyp óttim. Aýyl jastary, balalar úıiniń tárbıe­lenýshileri, ardagerler men zeı­netkerler qoldaýdy qajet etedi. Ásirese naýqastarǵa járdem­de­sýdiń mańyzy erekshe. Volon­ter­lerdiń kúshimen quqyqtyq saýat, ekologııa salalaryn jetildirip, Qazaqstannyń mádenı muralaryn qorǵap, elimizdiń batyrlaryn eske saqtaý salalaryndaǵy túıt­kil­derdi sheshýge múmkindik mol», dedi Prezıdent.

Qasym-Jomart Toqaev Qazaq­stan azamattaryn jahandyq jáne aımaqtyq máselelerdi sheshetin halyqaralyq volonterlik basta­ma­larǵa belsendi túrde tartýdy usyndy.

«Qazaqstan 116 eldiń 20 mıl­­­lıon­nan astam volonterin birik­ti­retin Dúnıejúzilik ekolo­gııa­lyq «World Clean up day» naý­qa­nyna qosylýǵa daıyn. Otandas­tary­myzdyń BUU, IýNISEF, AIESEC uıymdarynyń erik­tilik baǵdarlamalaryna jáne basqa da halyqaralyq basta­ma­larǵa atsalysýy ártúrli memle­ket­terdiń tájirıbesimen tanysýǵa jáne elimizge úzdik volonterlik tá­ji­rı­beni tartýǵa múmkindik bere­di», dedi Prezıdent.

Q.Toqaevtyń sózine qaraǵanda, memleket volonterliktiń ınfra­qu­rylymyn qalyptastyrýǵa qol­daý kórsetýi tıis. Sonyń ishinde aımaqtyq front-ofıster barlyq eriktilerge óz ıdeıalaryn nemese naqty volonterlik jobalaryn iske asyrýǵa kómektesedi.

«Volonterlerge jan-jaqty qol­daý kórsetý kerek. Meniń tapsyr­mam boıynsha olarǵa arnaıy je­ńildikter usynylady. Mysaly, endi volonterlik jumys eńbek ótili sa­nalady. Sondaı-aq volonter stý­dentterge qosymsha stıpen­dııa beriledi nemese pán kredıt­terin jabýǵa ruqsat etiledi.

Osy salada jumys isteıtin úki­mettik emes uıymdarǵa da qar­jy­laı kómek beriledi. Osyǵan oraı áleýmettik jobalardy jú­zege asyrý úshin 400-den astam shaǵyn grant bólinedi. Ár granttyń quny 300 myń teńge kóleminde bolmaq. Odan bólek, ákimderge jer­gilikti bıýdjetten qosymsha grant­tar bólýdi tapsyrdym. Eńbe­gimen erekshelengen volonterler memlekettik nagradalarǵa usy­ny­lady», dedi Memleket basshysy.

Budan bólek, Prezıdent volon­terlik qozǵalysqa qolaıly jaǵ­daı jasaý úshin kúsh salatynyn má­lim­dedi. Osyǵan baılanysty vo­lon­terlik ınfraqurylym ashyl­maq.

«Búgin volonterlik baǵdar­la­malar men jobalardy baqylaý jáne júıeleý úshin respýblıkalyq keńse ashyldy. Osyǵan uqsas orta­lyqtar elimizdiń búkil aımaq­tarynda iske qosyldy. Kez kelgen adam óz jobasymen  sonda bara alady. Qazaqstandaǵy mektepterde, kolledjderde jáne joǵary oqý oryndarynda volonterlik uıym­dar qurý josparlanyp otyr», dedi Q.Toqaev.

Volonterlik jobalardyń bárin memlekettik mekemelermen, kásipkerlermen birlesip júzege asyrýdyń artyqshylyǵyn eske salǵan Memleket basshysy mundaı qadam atalǵan salanyń damýyna tyń serpilis beretinin jetkizdi.

«Volonterler elimizdiń rýhanı áleýetin arttyrýǵa úles qosýy kerek. Mádenıetimizdi damytpaı ósip-órkendeý múmkin emes. Son­dyq­tan osy máselege erekshe mán be­rilýi tıis. Qazirgi tańda máde­nıet jáne óner salasyndaǵy jas ta­lanttardyń arqasynda Qazaq­stan kúlli álemge tanylyp keledi.

Biz osy baǵytta júıeli jumys júrgizýimiz kerek, ıaǵnı oıy ush­qyr, daryndy azamattardy barynsha qoldaý kerek. Sonda ǵana tól mádenıetimizdi jańa beleske kóteretin býyn qalyptasady. Osyǵan baılanysty Mádenıet pen óner bastamalaryn qoldaýǵa arnalǵan qor ashýdy tapsyrdym. Bul qurylym óner uıymdary men erekshe jobalarǵa qarjylaı da, basqa da kómek kórsetedi. Qordyń jumysyna volonterlerdi de tartý qajet. Olar mýzeı, kitaphana jáne óner mekemelerinde ózderiniń jobalaryn júzege asyra alady. Osy sharalar elimizdiń shyǵarmashylyq áleýetin nyǵaıtýǵa mol múmkindik beredi», dedi Q.Toqaev.

 Normatıvti-zańnamalyq baza jasaqtalady

Memleket basshysy BAQ-ty aqparat alańynda volonterlik qyz­metti belsendi túrde nasıhattaýǵa shaqyrdy.

«Joǵaryda aıtylǵan min­detterdiń bárin iske asyrý úshin biz volonterlik qyzmettiń zańna­ma­lyq bazasyn nyǵaıtýdy kózdep otyrmyz. Volonterler jumy­syn tabysty júrgizý úshin óziniń normatıvti-zańnamalyq negizde­mesine súıenedi. Mańyzdy mindet­terdiń biri – volonterlerdi daıyn­daý úshin trenıngti baǵdarla­malardy ázirleý. Turaqty túrde oqytý semınarlary ótkiziledi. Bıyl dástúrli «Zeren» jastar lageri osy taqyrypqa arnala­dy. Volonterlik ıdeıasy bi­lim ordalaryndaǵy oqytý baǵdar­la­malarynyń elementine aınalady. Azamattarymyzdyń ıgi isin BAQ pen áleýmettik jeliler arqyly halqymyzǵa jetkizip otyrý kerek», dedi Prezıdent.

Memleket basshysy vo­lon­terlerdiń kún saıyn aýqymdy ári mańyzdy jumys atqaryp kele­tinin atap ótti. Sol arqyly Qazaq­stannyń ósip-órkendeýine úles qosyp otyrǵanyn alǵa tartty.

«Volonter jyly – kezekti naý­qan emes. Osyny halyqqa túsin­dirýimiz kerek. Bul – el úshin, qoǵam úshin adal qyzmet. Volon­terlik halqymyzdyń ómir saltyna aınalýy kerek. Ony táýel­siz Qazaqstannyń búgingi jáne bolashaq sıpaty retinde dáriptegen jón. Volonterlerdiń boıyndaǵy qaırat-jiger ár azamatty yntalandyrýy tıis. Elimizdegi ár aýyl-aımaq osy mańyzdy jumystan tys qalmaıdy dep senemin», dedi Prezıdent.

Aıta keterligi, jıyn barysynda Memleket basshysy Qasym-Jomart Toqaev Qazaqstandaǵy volonterler qozǵalysynyń qurmetti elshisi atandy. «Bul mártebe – volonterlik qyzmettiń qurmetti elshisi ataný da erekshe mańyzǵa ıe. Sol sebepti birge jumys atqaramyz», dep aǵynan jaryldy Prezıdent.

«Birgemiz» front-ofıstiń ashylý saltanatynda Aqparat jáne qoǵamdyq damý mınıstri Dáý­ren Abaev baıandama jasap, jos­parlanǵan jobalarmen tanys­tyrdy.

«Jańa bastama» dep atalatyn jańa jobaǵa nazar aýdarǵym keledi. Memleket bul jobaǵa 170 mıllıon teńge bóldi. Iаǵnı 170 áleýmettik joba mıllıon teńgeden ala alady. Bul qarajat aılyq retinde emes, volonterlerge ystyq tamaq berýge, jolaqysyn tóleýge, kerekti jabdyq alýǵa jumsalady», dedi vedomstvo basshysy.

Sondaı-aq mınıstr qazvolun­teer.kz saıtyna 16 myń stýdent tirkelgenin atap ótti. Aldaǵy ýa­qytta volonterliktiń damýy úshin zańnamaǵa da ózgerister engizý josparlanǵan.

«Bıyl volonterlerdiń sany artady degen senimdemin. Myńdaǵan volonter ómirlik qıyn jaǵdaıǵa tap kelgen balalarmen jumys isteıdi. 14 myń joǵary synyp oqý­shysyn aǵylshyn tilinen Ulttyq biryńǵaı testileýge daıyndaýdy josparlap otyrmyz. 7 myńnan astam azamatqa kómek kórsetemiz», dedi D.Abaev.

Mınıstrdiń sózine qaraǵanda, Volonter jyly aıasynda birqatar aýqymdy jobany júzege asyrý kózdelgen. Búginde elimizde 50 myń belsendi azamaty bar 200 vo­lon­terlik uıym jumys isteıdi.

«Prezıdenttiń bastamasy­men qolǵa alynǵan «Taza Qazaqstan» aksııasyna 300 myń adam qatys­ty. Osy jyly bul aksııany jalǵastyramyz. Menińshe, olar­dyń sany mıllıon adamǵa jetýi tıis. Bıyl Qazaqstan dúnıejúzilik aksııaǵa qatysady», dedi vedomstvo basshysy.

D.Abaevtyń keltirgen derek­terine súıensek, búginde qazaq­stan­dyqtardyń tek 6 paıyzy ǵana volonterlikpen belsendi aınaly­sady. Áıtse de, volonterlik shara­larǵa qatysýǵa nıetti qazaq­standyqtardyń sany 48 paıyzǵa jýyqtaıdy.

Is-shara sońynda «Qazvolunteer.kz» onlaın-platformasy kórse­tildi. Sondaı-aq «Birgemiz: Asyl mura», «Birgemiz: Bilim», «Bir­gemiz: Saýlyq», «Birgemiz: Sabaq­tastyq», «Birgemiz: Taza Álem», «Birgemiz: Úmit» sekildi jobalar tanystyryldy.

Joǵaryda atalǵan jobalar elimizdiń túkpir-túkpirindegi óńir­lerde júzege asyrylyp, kómek­ke muqtaj jandarǵa qoldaý kór­setip, el damýynyń dańǵyl jolyna úlken úles qospaq. Osy bas­tamalardyń sátti júzege asýy­na járdemdesetin front-ofıs­tiń jumysy jan-jaqty oılas­tyrylǵan. Volonter jylynyń qorytyndysy boıynsha, «Jyl volonteri» halyqaralyq syılyǵy taǵaıyndalmaq.

Qatysýshy jastar lebizi

 Mánsııa ESEKEEVA,

«Jas ulan» biryńǵaı balalar men jasóspirimder uıymy» qoǵamdyq qorynyń tóraıymy:

– Keshe Qazaqstan Respýblıkasynyń Prezıdenti Qasym-Jomart Toqaevtyń vo­lonterlik jobalardy úılestiretin ári qoǵamdyq monıtorıng jasaıtyn jáne volonterlikti búkil elimiz boıynsha oqytyp, nasıhattaıtyn front-ofıstiń jumysymen tanysqan kezinde sóılegen sózin muqııat tyńdadyq.

Júıeli sózdiń árqashan júıesin de, ba­ǵyttalyp otyrǵan ıesin de tabatyndyǵy daýsyz. Prezıdenttiń sózindegi aıtylǵan qadaý-qadaý máseleler kópshiliktiń kókeıinde júrgen oıdy dóp basyp otyr dep aıtsaq, artyq bolmas edi.

Qazaq halqy yqylym zamannan beri baýyrmal ári yntymaqshyl. Bizdiń kúni búginge deıin jalǵasyp kele jatqan halyq­tyq pedagogıkamyzda da, salt-dástú­rimizde de birligimizdi nyǵaıtatyn, ynty­ma­ǵymyzdy arttyratyn mazmun óte kóp. Biz de tereńnen tamyr tartqan osy ba­ǵytta jumys isteýdemiz. Bizdiń «Jas ulan» biryńǵaı balalar men jasóspirimder uıymy 2011 jyldan bastap jumys istep keledi. Qazir Aqmola oblysynda jetpis myńnan astam múshesi bar. «Jasta bergen tárbıe, jas qaıyńdy ıgenmen birdeı» deıtuǵyn ataly sóz bar. Bul ómir eleginen ótkizilgen támsil. Biz de balǵyn júrekterde adamgershilik dánin seýip, oń men solyn tanytyp tárbıeleýdemiz.

Shynyn aıtý kerek, balalar men jasós­pirimder bir-birine qamqorlyq jasaý­ǵa qushtar. Máselen, joǵary synyp oqýshylary tómengi synypta tár­bıe­lenetin býyndy udaıy qadaǵalap otyrady. Olardyń oqýlaryna kómektesedi, ásirese kórkem shyǵarmalardy náshine keltirip, mánerlep oqýǵa qumar. Keıbir tómengi synyptardaǵy oqýshylardyń sabaq úlgerimi nasharlasa, kómekke kele­tinder de joǵary synyptardaǵy aǵala­ry men apalary. Balalar óz zamandas­taryn ǵana emes, aýyldaǵy jalǵyzilikti qarııalar men zeınetkerlerge de qol ush­taryn berip, qamqorlyq kórsetedi. Mundaı mysaldar óte kóp. Egde adamdarǵa jasaǵan jaqsylyqtary úshin aq bata alyp, kóńilderi qanattanyp qalady. Osyndaı jaılar tálimdi tárbıeniń qaınar bulaǵy, bastaýy desek, qatelespes edik.

Uıym óz jumysyn jan-jaqty jolǵa qoıǵan. Máselen, bir kezde «tili bas­qa tilegi bir, júzi basqa júregi bir» dep aı­tylatyndaı júzdegen ult pen ulys­tyń balalary baldáýren qy­zyq­ty shaqtaryn birge ótkizip, birge erje­týde. Olardyń arasynda ultqa bóli­ný, ulys­qa bóliný joq. Erteń at ja­lyn tar­typ mingende de, aralaryna syna tús­peı­tindigine senim mol. Ár­daıym túr­li ta­qyrypta baıqaýlar men tre­nıng­­ter ótkizemiz.

Jas tolqyndy kórkem ádebıetti oqýǵa, kórkem ónermen baýyrlastyrýǵa talpynamyz. Osynyń barlyǵy aınalyp kelgende, jas tolqynnyń boıyndaǵy izgilik pen izetti, parasat pen adamgershilikti damyta túsedi.

Al parasatty adamdar qaı ýaqytta bolsyn zamandasynyń jan dúnıesine tereńdeı úńilip, qınalǵan sátinde qol ushyn berýge daıar turady emes pe? Meniń oıymsha, patrıotızmniń negizgi bir tamyry – volonterlikti óristetý. Adamdardyń bir-birine jany ashyp, eljirep turýy bala jastan boıyna bitip, súıegine sińýi kerek.

Eldos ABAQANOV,

Taza alem jobasynyń ambassadory:

– «Biz birgemiz!» jobasy birneshe baǵytta jumys isteıdi. Men ekovo­lon­­terlik baǵytyna jaýaptymyn. Ekolo­gııany, qorshaǵan ortany qorǵaý bul mem­lekettik dárejeden buryn ár azamattyń deńgeıindegi másele. Ol ár adamnyń óziniń turǵan jerine kóńil bólýi men ony kútýinen bastalady. Bizdiń negizgi maqsatymyz – keleshekte elimizdi, Jer sharyn qorǵaıtyn, saqtaıtyn urpaqty tárbıeleý, ekologııalyq máselelerge beıjaı qaramaıtyn azamattardyń qataryn kóbeıtý. Bul da áleýmettik jaýap­kershilik. О́ıtkeni qorshaǵan ortany oılaý, ekologııaǵa kóńil bólý jastardyń áleýmettengenin kórsetedi.

Atalǵan baǵytta túrli jumystardy qolǵa aldyq, jobalar iske qosyldy. Eń qa­rapaıym qoqysty suryptaýdy úıre­tý­den bastap, planetamyz úshin mańyz­­dy ózgeristerge aıaq bastyq. Bul turǵy­da mektep, joǵary oqý oryndarymen birlese otyryp jumys bastadyq. Olarǵa volonterlik týraly túsindirip, jumys isteý retin kórsetip jatyrmyz.

Volonterlik tek kómektesý emes, onyń aıasy keń. Ekologııalyq máselelerdi tabý, retteý, aldyn alý da volonterliktiń bir bóligine jatady. Basqasha aıtqanda, álem jurtshylyǵyn alańdatqan máselelerdiń sebebi men saldaryn túsiný, anyqtaý. Bul – ekologııa mádenıeti. Keleshekte bul da jolǵa qoıylady, azamattarymyzǵa qyzyq bolady degen oıdamyz.

Taǵy bir úlken jaýapkershilik – aqparat taratý. Volonterler qataryn kóbeıtý úshin durys aqparat taratýymyz kerek. Volonterlik arqyly úlken kompanııalardyń nazaryn aýdarý, olardy ekologııany qorǵaýǵa jumyl­dyrý da volonterlerdiń áleýmettik jaýap­ker­shiligi dep bilemin. О́ıtkeni keı kezde ekologııaǵa qaýip úlken kompanııalardyń jumysynan keledi. Sondyqtan volon­terlik tek kómek emes, bul – úlken jaýap­kershilik. Bul – mańyzdy máselelerge nazar aýdarta alatyn kúsh.

Gúlmıra ABDRAShEVA,

«Klýb dobrıakov» jobasynyń negizin qalaýshy:

– Volonterlik – árkimniń mindeti. Bári volonterlikti tegin qyzmet, járdem­desý dep biledi. Shynyna kelsek, ár azamat volonter bolýy kerek. Kómek­ke muqtaj adamdar kóp. Másele materıal­dyq kómekte emes. Jyly sóz aıtyp, qoldaǵanyńnyń ózi volonterlik. Bul da úlken saýap. «Bári jaqsy bolady» degendi estigisi keletinder qanshama.

Jaýapkershilik te ár adamnyń mindeti. Bul tek volonterlerdiń sheńberinde qaraıtyn másele emes. Ár azamat turyp jatqan jerimizdiń bizge tek ýaqytsha berilgenin esinen shyǵarmaǵany jón. Qoǵam­nyń, balalarymyzdyń aldyndaǵy jaýapkershilikti sezinýimiz kerek. Urpa­­ǵymyzǵa bizden ne qalatynyn jıi oı­laý qajet. Jerdegi qoqysty kótergen­nen azamattardyń arlanbaǵany durys. Sondyqtan volonterler dep jaýap­ker­shilik pen mindetti shektemegen jón. Bul barlyǵymyz birge, jumylyp kirisetin jumys.

Qýandyq Janysbaev,

Shymkent Volunteers tobynyń jetekshisi:

– Nur-Sultan qalasyndaǵy EKSPO kórmesiniń «Art Hub» pavılonynda ornalasqan volonterlerdiń «Birgemiz» respýblıkalyq front-keńsesiniń ashylý saltanatyna jáne ondaǵy salalyq 7 baǵyttyń tanystyrylymyna shaqyrtý alǵanyma qýanyshtymyn.

О́zderińizge belgili, Shymkent qalasy elimizdegi jastar kóp shoǵyrlanǵan megapolısterdiń biri. Sondyqtan qalamyzda volonter jastardyń qatary óte kóp. Qazirgi tańda shaharda 40-qa jýyq volonterlik top jumys isteýde. Árıne Prezıdentimiz Qasym-Jomart Toqaev elimizdegi volonterler sanyn 100 myńǵa deıin jetkizý kerektigin aıtty. Osy tarıhı mańyzy zor is-sharadan qaıtqan soń Shymkenttegi áriptesterimizdi osy sa­ýapty iske qatysýǵa shaqyratyn bolamyz.

Volonterler sapyna qosylǵanyma 5 jyldan asty. Eń alǵash 2015 jyly osy salada qaıyrymdylyqpen jáne ózin ózi basqarý baǵytymen jumys isteı bastadym. Qazirgi tańda Shymkent qalasy «Jastar resýrstyq ortalyǵy» KMM janynan qurylǵan Shymkent Volunteers tobynyń jetekshisimin. Volonterlik klýbymyzdyń qurylyp, jumys bastaǵanyna 6 aıdan asty. Prezıdentimiz «Volonter jyly» dep jarııalaǵannan beri Shymqalada volonterlik toptar kún sanap kóbeıip keledi. Atalǵan volonterler tobymyzda 200-ge tarta jas 3 baǵyt («Qamqor», «Sabak­tastyq», «Saýlyq») boıynsha jumys istep kelemiz. Naqtyraq aıtar bolsaq,
6 aı ishinde 60-qa jýyq is-shara ótkiz­dik. Munyń kóbisi jaǵdaıy tómen otbasy­larǵa jáne Ardagerler úıine, Balalar úıiniń tárbıelenýshilerine konserttik qoıylymdar uıymdastyrý boldy.

Sondaı-aq volonterlerdiń bastamasymen óńirimizden shyqqan óner juldyzdarymen birlese otyryp «Janǵa jylý» aksııasyn uıymdastyrdyq. Nátı­jesinde, jaǵdaıy tómen 50 otbasyn azyq-túlik, qajetti zattarmen qamtamasyz ettik. Bul aksııa áli de jalǵasyn taba-
dy.

Sabyrjan KEŃShILIK,

Qyzylorda qalalyq jastar resýrstyq ortalyǵynyń dırektory:

– Memleket basshysy bıylǵy jyldyń basty urany «Birgemiz» ekendigin atap ótip, osy jyl aıasyndaǵy barlyq bastamalar men ıgi ister halqymyzdyń birligin bekemdeıdi degen senimin bildirdi.

Volonter jylynda bizdiń qoǵamdaǵy naqty máselelerdi sheshýge arnalǵan birqatar ataýly jobalar júzege asatyny aıtyldy. Mysaly, volonterlik jumys endi eńbek ótiline eseptelip, eriktiler isine úles qosqan  stýdentterge túrli jeńildikter jasalatynyn qýana quptadyq. 

Osy salada jumys isteıtin úkimettik emes uıymdarǵa da qarjylaı kómek berilip, barlyq jobalarǵa memlekettik organdar men bıznes tarapynan qoldaý bolatyny bárimizdi bir serpiltip tastady. Men bul sharada «Jeńis» jobasy aıasyndaǵy qyzylordalyq volonterler jumysy ja­ıly aıtyp óttim. Uly Otan soǵysy, tyl ardagerleri men áleýmettik osal toptar ókilderine járdem beretin bul qozǵalys qalada 4 jyl kóleminde turaqty jumys istep, júzdegen janǵa kómek kórsetti.

 Osy saparymyzda volonterler ju­mysyn úılestirýdiń túrli tájirı­bele­rimen tanystyq. Endi sony elge jetkizip, ıgi ispen aınalysýǵa nıet bildirgender arasynda nasıhattaımyz.

Qazir Qyzylorda qalasynyń ózin­de ǵana volonterlikpen aınalysyp júr­gen 20-ǵa jýyq uıym bar. Aldaǵy ýaqytta osy uıym múshelerin oqytyp, baǵyttarymyzdy naqtylaı túsemiz. Qı­nalǵanǵa qol ushyn sozatyn ıgi dás­tú­rimizdi jańǵyrtatyn jastardyń qatary áli de kóbeıe túsetinine kúmán joq.  О́ıt­keni volonter bolý elińe degen súıis­penshiliktiń kórinisi.