Memleket basshysy Qasym-Jomart Toqaevtyń sheshimine kelisemin. Bul oqıǵa aımaqtaǵy basshylardyń kemshiligin kórsetedi. О́ıtkeni onda laýazymdy qyzmetke taǵaıyndalǵan soń, turǵyndardyń jaı-kúıin, nemen tynystap, ne iship-jep otyrǵanyna deıin túgel bilýi tıis. Mundaı kıkiljińdi aldyn ala kóre bilip, oǵan jol bermeýdiń áreketin jasaýy kerek edi. О́kinishke qaraı, ondaǵy jastardyń kóbi jumyssyz, áleýmettik jáne ekonomıkalyq teńsizdik bar. Qaltasy qalyń azamattar «barmaq basty, kóz qystymen» zańnan qutylyp ketken dep estip jatyrmyz. Munyń bári, árıne qarapaıym halyqtyń ashý-yzasyn týǵyzady. Sondaǵy laýazymdy tulǵalar osynyń bárine jol bermeýi qajet bolatyn.
Qazaq halqy beıbit halyq. Mundaı basbuzarlyq jergilikti jerde bir kúnde shyqpaıdy. Ýaqyt óte qordalana beredi. Jergilikti ákim-qaralar buǵan mán bermegen, baıqamaǵan. Bul, birinshiden. Ekinshiden, aımaqtaǵy memlekettik mekemelerdi jemqorlyq pen paraqorlyq jaýlap alǵan syńaıly. Soǵan eti úırenip ketken. Muny jaı ǵana basbuzarlyq dep, «jabýly qazan jabýly» kúıinde qaldyrýǵa múldem bolmaıdy. Bul áleýmettik teńsizdikti, rýhanı túsiniktiń tómendegenin kórsetedi. О́ńirdegi memlekettik mekeme basshylary osyǵan qatysty jumys isteýge mindetti. Memleket basshysy aıtyp ótkendeı, mundaı jaǵdaıǵa jol berý jergilikti ákim-qaranyń salǵyrttyǵy.
Qazaqstannyń túkpir-túkpirinde etnostyq toptar bar. Olardyń turmys-tirshiligi árqıly. Tanym-túsinigi, dúnıetanymy ártúrli. Alaıda solardyń bári Qazaq eliniń, Qazaqstannyń azamaty. Qordaıdaǵy qordalanǵan másele sol etnostyq toptardyń keıbirinde Qazaqstan azamaty degen sana-sezimi álsiz ekenin kórsetedi. Jergilikti jerdiń basshylary osy máselemen jumys isteýi tıis. Iаǵnı, bárimiz bir eldiń azamatymyz, Qazaqstan – ortaq elimiz, ortaq qazynamyz, oǵan nuqsan keltirmeý kerek degen uǵym qalyptastyrýǵa kúsh salý qajet.
Áıtse de, bul máseleni sheshýdi tek ortalyq apparatqa artyp qoıý durys emes. Aýyldyq jerlerde aqsaqaldar alqasy, zııaly qaýym ókilderi bar. Olar da osy túıtkilmen aınalysyp, eldiń tutastyǵy men tatýlyǵyn, Qazaqstan azamaty degen uǵymdy kúsheıtýge kúsh salýy tıis. Qordaıdaǵy qordalanǵan másele bárimizge sabaq bolýy kerek.
Ǵarıfolla ESIM,
qoǵam qaıratkeri
