- Aýdandyq kitaphananyń qorynda 50 myń kitap bar. 10 qyzmetker jumys isteıdi. Buǵan deıin birneshe ǵımaratqa kóship, qonyp júrdik. Qazir mekteptiń bir bólmesinde otyrmyz. 280 sharshy metr aýmaqta ári kitap saqtap, ári oqyrmanǵa qyzmet kórsetip kelemiz. Mádenı kópshilik sharalar ótkizý kezinde qınalamyz. Kitaphana qyzmetiniń sharty boıynsha ózimizdiń sırek qorymyz, gazet-jýrnaldar saqtaıtyn qoımamyz bolýy tıis edi. Ol arnaıy ǵımaratta, qalypty aýa júıesinde saqtalýy kerek. О́kinishke qaraı, munyń biri de joq. Jaǵdaıdan aýdan basshylyǵy, oblystyń mádenıet basqarmasy habardar. Jyl saıyn kitaphana úshin ǵımarat salý nemese satyp alý týraly másele kóteriledi, ázirge sheshimin tabar emes, - deıdi Qaratal aýdandyq ortalyq kitaphana meńgerýshisi Gúlshat Sembekova.
Aıtpaqshy, aýdandyq kitaphana óńirdiń tarıhyna qatysty derekterdi jınaqtaýmen aınalysyp otyrǵan jáne turǵyndardyń rýhanı jańǵyrýyna úles qosyp júrgen jalǵyz mádenı mekeme eken. О́ıtkeni, bul óńirde ólketaný mýzeıi joq. Biz habarlasqan aýdannyń belsendi jastary tarıhy tereńnen tartatyn aýdanda ortalyq mýzeıdiń múldem bolmaǵanyn aıtady.
Jalpy, Almaty oblysynyń Qaratal aýdany 1924 jyly qurylǵan eken. Qazir aýmaqty 45 myńǵa jýyq turǵyn mekendeıdi. О́sken ólkeden Eskeldi, Balpyq, Aıtý sııaqty qara qyldy qaq jarǵan bıler men Qarymbaı, Jolbarys batyrlar, Qaban jyraý, Jálmende bolys pen Pyshan aqyn syndy tarıhı tulǵalar shyqqan.
