Parlament • 13 Aqpan, 2020

Darıǵa Nazarbaeva: Sapasyz zańdar memleket bıliginiń bedelin túsiredi

109 retkórsetildi

Parlament Senatynyń Tóraǵasy Darıǵa Nazarbaeva Parlament palatalarynda zań jobalarynyń qaralý kestesi boıynsha keńes ótkizdi. Sharaǵa Májilis basshylyǵynyń ókilderi, Senat Bıýrosynyń músheleri, Ádilet mınıstri, Prezıdent Ákimshiligi basshylyǵynyń, Premer-Mınıstr Keńsesiniń ókilderi, sondaı-aq, Parlament palatalary apparattarynyń basshylary qatysty. Bul týraly Parlament Senatynyń baspasóz qyzmeti habarlady.

Darıǵa Nazarbaeva kirispe sózinde zań shyǵarý prosesiniń jalpy jaqsaryp kele jatqanyna qaramastan, uıymdastyrý máselelerin qaraý barysynda birqatar sheshilmegen másele bar ekenin atap ótti.

«Bizdiń basty mindetimizdi oryndaýǵa – sapaly zańdardy qabyldaýǵa kedergi keltiretin júıedegi aqaýlardy bilý úshin barlyq tarapty tyńdaý kerek» dep atap ótti ol.

Zań jobalarynyń 90 paıyzy Úkimettiń bastamasymen ázirlenetinin atap ótken jón. Zań jobalary jumystarynyń jospary jyl saıyn bekitiledi, onda zań jobalarynyń Parlamentke ákelý merzimderi kórsetiledi.

«Degenmen jospar is júzinde saqtalmaı otyr, jyl sońyna qaraı Parlamentke zań jobalaryn berý merzimderi únemi ózgerip ketedi. Meniń oıymsha, bul josparlaýdyń sapasyzdyǵy men oryndaý tártibiniń tómendigin kórsetedi. Osyǵan baılanysty zań jobalary josparynyń oryndalýyn josparlaý men baqylaýdy jaqsartý qajettigine Úkimet ókilderiniń nazaryn aýdarǵym keledi» dep atap ótti D.Nazarbaeva.

Senat Tóraǵasynyń aıtýynsha, Úkimettiń Parlamentke ákeletin zań jobalarynyń sapasy da odan keıingi problema bolyp tabylady. Úkimet bastamasymen ázirlengen zań jobalary boıynsha Májilis aýqymdy jumys júrgizedi, olarǵa túzetýler engizip, keıde zań jobasy qaıta jazylady. Depýtattardyń keıbir túzetýlerine qarjy shyǵyndary talap etiledi,  oǵan Úkimettiń qorytyndysy qajet bolady, al ol ýaqyt alady. Úkimettiń qorytyndylary kelgenshe kóbine tıisti merzim buzylady.

«Bir ǵana mysaldy keltireıin - jer qoınaýyn paıdalaný, gaz jáne gazben jabdyqtaý máseleleri jónindegi zań jobasy. 11 qyrkúıekte Májiliske túsip, onda úsh aı qaraldy. Senatqa 12 jeltoqsanda keldi. Eger barlyq mereke jáne demalys kúnderin esepten alyp tastaıtyn bolsaq, onda 3 jumys kúninen keıin ony Palata otyrysynda birinshi oqylymda, al 3 jumys kúninen keıin ekinshi oqylymda qaraýǵa májbúr boldyq. Osylaısha, Senat osy zań jobasyn Senat otyrysynda qaraý kúnderin eskere otyryp 8 jumys kúni ǵana qarady. Bul qalaı bolǵany? Bul bizdiń jumysymyzdaǵy alshaqtyqtyń bir ǵana mysaly» dedi D.Nazarbaeva.

Kezdesý barysynda sondaı-aq zań shyǵarý úderisindegi mańyzdy býyn – Úkimet janyndaǵy zań jobalaý qyzmeti máseleleri jónindegi mekemearalyq komıssııa atap ótildi.

«Senat qabyldanatyn zańdardyń sapasyna óz ókilderi arqyly qandaı da bir áser etý úshin zań jobalarynyń tujyrymdamalaryn bastapqy kezeńde talqylaıtyn osy komıssııanyń jumysyna qarqyn berdi. Osy komıssııanyń jumysy týraly erejege sáıkes, talqylanatyn máseleler boıynsha materıaldar komıssııa múshelerine 7 jumys kúni ishinde usynylýy tıis, biraq olardyń merzimderi jıi buzylady. Osyndaı faktilerge jol bermeýge Ádilet mınıstrliginiń nazaryn aýdaramyn» dep atap ótti Senat Tóraǵasy.

Senatorlardyń zań jobalaryna túzetýler engizý quqyǵy talqylaýdyń jeke salasy boldy. Máselen, senatorlar jobadaǵy qaıshylyqtardy anyqtaǵannan keıin zań jobasyn jaqsartatyn túzetýlerdi usyna bastaıdy, al jobany ázirleýshiler senatorlarǵa osy qaıshylyqtardyń bári túzetiletinin, ol túzetýler kelesi zań jobasynda eskeriletinin aıtyp sendiredi, al bul zań jobasyn merziminiń shektelýine baılanysty túzetýsiz qabyldaý qajettigi aıtylady.

«Senatorlar zań jobasyn Májiliske eshqashan negizsiz qaıtarǵan emes ári qaıtarýdy usynbaıdy da. Senatorlardyń túzetýler engizýi men zań jobalaryn Májiliske qaıtarýdy jumys babyndaǵy ister prosesi retinde qalypty qaraý kerek. Bizdiń barlyq usynystarymyz saıyp kelgende zań jobalarynyń sapasyn arttyrýǵa baǵyttalǵan. Sapasyz zańdar memleket bıliginiń bedelin túsiredi» dedi D. Nazarbaeva.

Ádilet mınıstri Marat Beketaev óz kezeginde búgingi tańda zań jobalarynyń tujyrymdamasyn ázirleýge deıin olardy qoǵamda halyqtyń barlyq múddeli toptarymen ashyq talqylaý úshin negizgi ádis-tásilderdi jarııalaýǵa arnalǵan tetikter daıyndalyp jatqanyn baıandady.

Darıǵa Nazarbaeva sonymen qatar halyqaralyq kelisimderdi daıyndaý rásimderin ózgertýdi, ony ázirleýge senatorlardy da qatystyrýdy  usyndy. Senat basshysy sondaı-aq Úkimettiń zań jobalaryn kelisý reglamentin qaıta qaraýǵa nazar aýdardy jáne ol búkil jumysty sozyp jiberetini ári tetikteri nashar jumys isteıtini atap ótildi.

Senat Tóraǵasy zań jobalarynyń tujyrymdamalaryn talqylaýdan bastap zań qabyldanǵanǵa deıin mekeme múddelerin ysyra turyp, yntymaqpen ári kelisip jumys isteýdi usyndy.

«Árbir zańnyń artynda orasan zor adamnyń, kásiporyndardyń, bıznestiń taǵdyry tur. Bul óte mańyzdy másele. Úkimetti osy jylǵa arnalǵan zań jobalary jumystarynyń josparyn qaıta qaraýǵa shaqyramyn, ol jumys istemeı tur» dedi D.Nazarbaeva.

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar