«Jetim kórseń, jebeı júr...»
«Birgemiz Sabaqtastyq» jalpyhalyqtyq jobasy – tálimgerlik jónindegi baǵdarlama. Bul joba osydan 5 jyl buryn tálimgerlikti qolǵa alǵan «Dara» qaıyrymdylyq qorynyń jumysymen úılesedi. Biz jetimder úıinde ata-anasynyń qamqorlyǵynsyz qalǵan balalarǵa, jasóspirimderge, qıyn ómir jaǵdaıyn bastan keship jatqan baldyrǵandarǵa qol ushyn sozamyz.
Jetimder úıine syılyqpen barǵan adam jaqsylyq jasadym dep oılasa, ol múlde qatelesedi. Biz bar bolǵany aıaýshylyq tanytyp, «syılyq jasadym» degen oımen óz-ózimizdi jaqsy sezinemiz. Balalar syılyqqa muqtaj emes. О́z aýyzdarynan estidim. Jetimder úıiniń bir tárbıelenýshisi BAQ ókilderine bergen suhbatynda: «Jańa jyl merekesinde tátti kámpıt úlestirgen kezde ár baldyrǵanǵa kemi 70 keliden buıyrady. Bizge sol kámpıt kerek dep oılaısyz ba? Joq. Bizge kóńil kúıimizdi suraıtyn, jan-dúnıemizde ne bolyp jatqanyn tyńdaǵysy keletin adam kerek», degen edi. Olar dúnıe-múlikke, qyzyldy-jasyldy zattarǵa emes, meıirimge zárý.
Asyrap alýshylar kóbine-kóp 10 jasqa tolmaǵan balalardy qanatynyń astyna alǵysy keledi. Odan eresekterine ıe bola almaımyz dep topshylaýy múmkin. Mine biz sol 10 jastan asqan balalarǵa qamqorlyq tanytamyz. Olardy ortaǵa beıimdeýge tyrysamyz. Tálimger óz jetistigin úlgi ete otyryp, tárbıelenýshige mamandyq tańdaýǵa, qyzmetke ornalasýǵa qatysty durys jol nusqaýǵa tyrysady.
Biz Almaty, Nur-Sultan, Pavlodar, Qaraǵandy, Aqtaý, Oral, Semeı, Shymkent, Temirtaý syndy 9 qalada jumys júrgizip jatyrmyz. Barlyǵy 134 tálimgerimiz bar. Ashyǵyn aıtaıyn, kez kelgen adam tálimger bola almaıdy. Oǵan tálimger bolýǵa úmitker azamattyń arnaıy psıhologııalyq portreti sáıkes kelýi, psıhologııalyq oqýdan ótýi kerek. Balalarmen qur oınaýǵa, syılyq jasaýǵa umtylǵan adamdar tálimger bola almaıdy. О́mirde kórgen-túıgeni mol, aıryqsha kózqarastaǵy adamdardy tálimger retinde qabyldaımyz. Ár volonter-tálimger 1 balamen kemi 2 jyl jumys isteýi týraly shartqa qol qoıady. 1 jyldan keıin tálimgerge bala da baýyr basyp úlgeredi. Keıin bul baýyrmaldyq ómir boıyna ulasýy múmkin.
Sonymen qatar bizde korporatıvti tálimgerlik degen baǵyt ta bar. Qazaqstandyq jáne halyqaralyq uıymdardyń qyzmetkerleri arqyly is-áreketke, kásipke, jumysqa daǵdylaımyz. Máselen, jetimder úıindegi tárbıelenýshiler ómir daǵdysyna, ortaǵa beıimdelýi qajet. Qarapaıym mysal – jumysqa qandaı kıim kıip barý kerektigine deıin uǵyndyramyz. Bizge sonyń barlyǵyn ata-anamyz úıretti. Úıretpese, baqylaı júrip túsindik. Al jetimder úıindegi balalardyń ata-analary múlde joq nemese nashaqorlyqqa, ishimdikke salynyp ketken. Túrmede otyrǵandary da bar. Sondyqtan ondaı balalardy ómirge beıimdeý – aýadaı qajet dúnıe.
Aldaǵy josparymyz – búgingi jetken jetistigimizdi laıyqty jalǵastyrý. Sondaı-aq Atyraý, Shymkent qalalarynda tálimgerlerdi daıyndaýdy, bedeldi, ataqty azamattar arasynan tálimgerler izdeýdi kózdep otyrmyz.
Aınur AIMÝRZINA,
«Birgemiz Sabaqtastyq» jalpyhalyqtyq jobasynyń ambassadory, «Dara» jobalar men baǵdarlamalar qaıyrymdylyq qorynyń dırektory
Volonterlerdiń bedeli artady
Volonterlerdiń respýblıkalyq front-ofısiniń ashylýyna arnalǵan jıynǵa qatysqan volonterler birneshe baǵyt boıynsha naqty máselege kóz jetkizip, óz isterin alańsyz jalǵastyrýǵa jáne jumystaryn yntalandyrýǵa qatysty mańyzdy suraqtardyń jaýabyn tapty dep oılamyn.
О́zim eki nárseni anyq baıqadym. Birinshiden, Memleket basshysy Qasym-Jomart Toqaev volonterlerdiń atqarǵan jumysynyń zańdy negizi jasalatynyn aıtty. Endigi jerde jastardyń volonterlikke arnaǵan jyldary eńbek ótili retinde esepke alynatyn boldy. Bul – biz úshin kópten kútken jaǵymdy jańalyq boldy. Endi volonterlerdiń qataryna suranýshylardyń legi kóbeıedi dep oılaımyn endi. Sondaı-aq olardyń eńbegine qaraı kótermeleý aqysymen, stıpendııamen yntalandyrý sheshilmek. Bul da volonterliktiń bedelin kóterip, olardyń qyzmetine degen qurmetti arttyrmaq. Ekinshiden, elimizdiń barlyq aımaǵynan kelgen zamandastarymyzben tanysyp, pikir almasýdyń ońtaıly sáti boldy. Usynystarymyzdy ortaǵa saldyq, tájirıbemizben bólistik. Dostastyq, aqyldastyq. Bul bolashaqta eriktilerdiń tutas el boıynsha jumyla eńbek etýine oń áser etedi. Volonterlerdiń respýblıkalyq shtaby aıasynda front-ofıs ashyldy. Osyndaı ortalyqtar oblystarda da jumys isteıtin bolady.
Jetisýlyq volonterler úshin jastarǵa júktelgen mindetter qalypty sharýa desem, qatelespespin, óńir jastary bilek sybanyp jumys isteýdi dástúrge aınaldyrǵan. Biz tabıǵatty aıalaýǵa, ardagerler men qarttarǵa kómek kórsetýde únemi bastamashy bolyp júrmiz, tártip saqshylaryna kómekshi bolyp, qoǵamdyq baqylaýǵa da úles qosyp otyrmyz. Bıyl aýyl jastarynyń bilimin arttyrýǵa, onyń ishinde aǵylshyn tilin oqytýǵa óz kúshimizdi jumsaýǵa kirisemiz. Buǵan oblystaǵy 17 aýdan men 3 qalada barlyq jaǵdaı jasalǵan.
Erjan DÁÝLETBAEV,
volonter
Almaty oblysy
Talapty jastarǵa berilgen múmkindik
Volonter front-ofısiniń ashylǵanyna erekshe qýanyp otyrmyn. Bul sharaǵa ózim de qatystym. Bıylǵy jyl elimizdegi volonterler úshin úlken múmkindik dep esepteımin. Qazir respýblıka boıynsha kóptegen tyń jobalar qolǵa alynyp jatyr. 2017 jyly bizdiń ýnıversıtette volonterlik korpýs ashylǵan. Bizdiń volonterlik korpýs birneshe baǵytta jumys isteıdi. Turǵyndarǵa áleýmettik kómek kórsetemiz. Budan bólek volonter retinde respýblıkalyq saıystarǵa da qatysamyz. Mamandyǵymyz dáriger bolǵannan keıin qaladaǵy medısınalyq mekemelerde aýyr naýqastardy emdeıtin dárigerlerge járdemdesemiz. Olardyń jumysyn jeńildetýge atsalysamyz. Bıyl Reseıdiń volonterlerimen birlese jumys istemek oıymyz bar. Medısınalyq mekemelerge kómektesýdi jalǵastyramyz. Balalar úıi men Qarttar úıine de dástúrli túrde baryp konsert qoıamyz. О́zim keshe Nur-Sultandaǵy front-keńsesiniń ashylýyna oraı uıymdastyrylǵan seksııada sóz sóılep, volonterlerdiń aýyr naýqastarǵa kómektesýi jóninde oıymdy ortaǵa saldym. Osy jıynda jaqsy ıdeıalar aıtyldy. Densaýlyq saqtaý vıse-mınıstri medısına baǵytyndaǵy volonterlerge qoldaý bildiretinin jetkizdi. Bir sózben aıtqanda, 2020 jyl talapty jastardyń qoǵamdyq isterge belsene aralasýyna zor múmkindik beretini anyq.
Gúlfaırýz TÝKINOVA,
Semeı medısına ýnıversıtetiniń 5-kýrs stýdenti, ýnıversıtet janyndaǵy «QazMedVolunteers» korpýsynyń tóraıymy
