Aımaqtar • 14 Aqpan, 2020

Berdibek Saparbaev: Eń basty talap – Prezıdenttiń tapsyrmalaryn sapaly jáne ýaqytyly oryndaý

30 retkórsetildi

Jýyrda Jambyl oblysynyń ákimi qyzmetine taǵaıyndalǵan Berdibek Saparbaev alǵashqy apparat keńesin ótkizdi. Jıynda óńirdiń odan ári damýy men ekonomıkalyq jáne áleýmettik saıasattaǵy basym baǵyttary týraly sóz boldy.

«Eń basty talap –  Memleket basshysynyń tapsyrmalaryn sapaly jáne ýaqytyly oryndaý. О́tken jyldyń qorytyndysy boıynsha oblys jaqsy áleýmettik-ekonomıkalyq kórsetkishterge qol jetkizdi. Osy qarqyndy tómendetpeý kerek», dedi ákim.

Qazirgi kezde oblystyń áleýeti aıtarlyqtaı joǵary. Alaıda, aǵymdaǵy jyldyń birinshi aıynda ónerkásip, qaıta óńdeý, ınvestısııa tartý sııaqty salalarda tómendeýge jol berilgen. Igerilgen qarajattyń kólemi boıynsha aıtarlyqtaı artta qalýy baıqalǵan. Berdibek Saparbaev osy baǵytta bıýdjettik baǵdarlamalardyń oryndalý boıynsha jumystardy kúsheıtý qajettigin jáne birinshi toqsannyń qorytyndysy ótken jyldyń nátıjesinen kem bolmaýy tıis ekenin basa aıtty.

Jambyl oblysynda jumyssyzdyq deńgeıi 4,8 paıyzdy qurasa, ol respýblıkalyq ortasha mánniń deńgeıinde.  Biraq bul rette oblysta ózin-ózi jumyspen qamtymaǵandardyń sany áli de kóp. Sondyqtan ákim «Qazfosfat» jáne «Evrohım» sııaqty jergilikti ónerkásiptiń alyptarymen tyǵyz jumys isteý, óńirge iri otandyq jáne sheteldik ınvestorlardy tartý qajettigin de eskertti. Sonymen qatar, oblys aýmaǵy arqyly úsh iri gaz qubyry ótedi desek, bul óńirdegi eldi mekenderdi gazdandarýǵa zor múmkindik beredi. Jıynda osy máselelerdi aıta kele, Berdibek Saparbaev «Amangeldi» gaz ken ornynyń da qarqyndylyǵyn arttyrý úshin salalyq mınıstrliktiń kómegimen aýqymdy geologııalyq barlaý jumystaryn júrgizý qajettigin jetkizdi. Sondaı-aq, ákim sýarmaly jerlerdiń kólemin ulǵaıtý boıynsha memlekettik qoldaýdyń az emes ekenin, sony keńinen paıdalaný jáne olardy paıdalaný tıimdiligin arttyrý qajettigin de aıtty. Basqosý barysynda egistikterdi ártaraptandyrý, rentabeldi daqyldarǵa, maıly daqyldarǵa kóbirek kóńil bólý, jergilikti qant zaýyttaryn odan ári júktemesin arttyrý úshin qant qyzylshasynyń kólemin ulǵaıtý mańyzdylyǵy da aıtyldy. Kún tártibinde kóterilgen  máselelerdiń biri – kóktemgi egis jumystaryna daıyndyq, aýyl sharýashylyǵy tehnıkasyn ýaqytynda daıyndaý, joǵary sapaly tuqym satyp alý jáne otyrǵyzý boldy.

Jıynda Berdibek Saparbaev óńirde bastaý alǵan aýyl turǵyndarynyń turmystyq tabysyn arttyrý pılottyq jobasynyń mindetti túrde óz jalǵasyn tabatyndyǵyn aıtyp, jaýapty basshylarǵa naqty tapsyrmalar júktedi. «Aýyl turǵyndary jyl boıy jumyspen qamtylyp, egin sharýashylyǵymen de, mal sharýashylyǵymen de aınalysýy kerek. Bul oraıda pılottyq jobaǵa bólingen 7,2 mıllıard teńge tolyq kólemde ıgerilýi tıis. Biz jobanyń ómirsheńdigin kórsetýimiz kerek, bul aldaǵy ýaqytta qarjylandyrý kólemin ulǵaıtýǵa jáne kóp adamdardyń materıaldyq jaǵdaıyn jaqsartýǵa múmkindik beredi», dep atap ótti ákim. Sondaı-aq, áleýmettik-mádenı nysandardyń qurylysy tıisti deńgeıde júrgizilýde desek, bul úrdis óz deńgeıinde jalǵasatyn bolady. Bilim berý salasynda apatty jáne úsh aýysymdy mektepterdi joıý úshin 17 mektep ashý qajet.

Sonymen qatar taýar aınalymyn ulǵaıtý úshin oblystyń tranzıttik áleýetin keńinen paıdalanǵan jón ekenin, balamaly energetıka salasynda 6 stansııanyń qurylysyn aıaqtaý jáne kún jáne jel elektr stansııalarynan alynatyn elektr energııasynyń jıyntyq qýatyn 400 mVt-qa deıin jetkizý kózdelip otyrǵanyn da jetkizdi. Jıynda jambyldyqtardyń tabys deńgeıin arttyrý, salyq salý bazasyn ulǵaıtý, mindetti medısınalyq saqtandyrý júıesin engizý, jalaqy boıynsha bereshekterdi joıý, medısınalyq qyzmet sapasyn arttyrý, densaýlyq saqtaýdaǵy bıýrokratııa deńgeıin tómendetý, jastardy rýhanı-adamgershilikke tárbıeleý, ata-analar men mektep arasyndaǵy baılanysty nyǵaıtý sııaqty ózekti máseleler de jan-jaqty saralandy. Keńesti qorytyndylaı kele Berdibek Saparbaev jaýapty memlekettik organdar Qordaı aýdanynda bolǵan oqıǵalardan qorytyndy shyǵarý kerektigin atap ótti. «Bul jaǵdaı bizge sabaq bolýy kerek. Osy sekildi qaıǵyly oqıǵalar aldaǵy ýaqytta qaıtalanbas úshin tıisti sheshim shyǵara bilýimiz qajet. Memlekettik organdar, jurtshylyq pen ıntellıgensııa óz kúsh-jigerin biriktirip, qoǵamdaǵy birlik pen kelisimdi saqtaý boıynsha jumys júrgizýi tıis», dep atap ótti ákim. Budan keıin Berdibek Saparbaev ákimderdiń esepterine jappaı memlekettik qyzmetshilerdiń emes, qarapaıym halyqtyń qatysýy kerektigin aıtty.

 

Jambyl oblysy

 

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar