Mınıstr 1991 jyldan beri 1 mıllıon 57 myń etnıkalyq qazaq tarıhı otanyna oralyp, oralman mártebesin alǵanyn aıtty. 2019 jyly respýblıkaǵa 9 993 otbasy (17,7 myń etnıkalyq qazaq) keldi, 597 oralman otbasy (2 myń adam) qabyldaý óńirlerinde qonys aýdardy.
Azamattyq alý úshin qujattardy tapsyryp úlgermegen 8,2 myń etnıkalyq qazaq ótken jylǵy qandas mártebesin uzartý boıynsha birjolǵy aksııa sheńberinde Qazaqstan azamattyǵyn aldy.
«2019 jyly sheteldik jumys kúshin (budan ári – ShJK) tartýǵa bólingen kvota sheńberinde jergilikti atqarýshy organdar 25,5 myń ruqsat berdi (2019 jylǵa kvota 48,7 myń birlikti qurady), onyń ishinde kompanııa basshylary, sondaı-aq qurylymdyq bólimsheler menedjerleri men bilikti mamandarǵa ruqsattardyń 80%-y berildi. Jumys berýshiler 8,2 mlrd teńge salyq alymyn tóledi. Sonymen qatar kompanııalar kadrlardaǵy qazaqstandyqtardy qamtýdy qamtamasyz etý talaptaryn saqtaýda, onyń úlesi 96%-dy quraıdy», – dedi Birjan Nurymbetov.
2020 jylǵa sheteldik jumys kúshin tartý kvotasy 2019 jylmen salystyrǵanda 40%-ǵa qysqaryp, 29,3 myń birlikti qurady.
Qoldanystaǵy kóshi-qon júıesin jetildirý, elge kelgen etnıkalyq qazaqtar men mıgranttar úshin qolaıly jaǵdaılar jasaý, sondaı-aq ishki eńbek naryǵyn qorǵaý maqsatynda kóshi-qon prosesterin retteý týraly zań jobasy ázirlendi, ol Qazaqstan Respýblıkasy Parlamentiniń Májilisinde qaralyp jatyr.
«Zań jobasy aıasynda qandastarǵa turýǵa jáne Qazaqstan azamattyǵyn alýǵa bir ótinish berý quqyǵyn qarastyrý usynylady. Qandastarǵa «bir tereze» qaǵıdaty boıynsha memlekettik qyzmetter kórsetý rásimderin ońtaılandyrý kózdelip otyr. Sondaı-aq sheteldik bilikti qyzmetkerlerdi qazaqstandyq kadrlarmen aýystyrý jónindegi mindettemelerdi jumys berýshilerge júkteý usynylady. Ruqsat tek ishki eńbek naryǵynda mamandar bolmaǵan jaǵdaıda ǵana berilýi tıis», – dedi Birjan Nurymbetov.
