Basylym basshylary • 17 Aqpan, 2020

Basylym basshylary - Keńesbaı ÚSEBAEV (1914-1995)

52 retkórsetildi

K.Úsebaev Qyzylorda oblysynyń Jalaǵash aýdanyna qarasty Mádenıet aýylynda dúnıege keledi. Jetim balalarǵa arnalǵan ınternatta tárbıelenedi. 1934 jyly qyzylorda qalasyndaǵy jetijyldyq mektepti bitiredi. Odan keıin mektepte muǵalim bolady. Qarmaqshy aýdandyq «Qyzyl tý» gazetinde qyzmet isteıdi. 

1935-1938 jyldary Almatydaǵy Kommýnıstik qazaq jýrnalıstıkasy ınstıtýtynda oqıdy. Oqýdy bitirgennen keıin Qaraǵandy oblystyq «Sovettik Qaraǵandy» gazetine jiberiledi. Munda ol 1938 jyldan 1946 jylǵa deıin ádebı qyzmetker, bólim meńgerýshisi, jaýapty hatshy, redaktordyń orynbasary qyzmetterin atqarady.

1946-1949 jyldary QKP Ortalyq Komıteti janyndaǵy Joǵary partııa mektebin bitiredi. 1949-1953 jyldar aralyǵynda Aqmola oblystyq gazetiniń redaktory bolady. 1953-1955 jyldary qazaq KSR Mınıstrler Keńesi janyndaǵy Radıohabarlar jónindegi komıtet tóraǵasy, al 1955 jyldan 1959 jylǵa deıin «Sosıalıstik Qazaqstan» gazeti redaktorynyń orynbasary qyzmetin atqarady.

1959-1960 jyldary K.Úsebaev respýblıka Mınıstrler Keńesi janyndaǵy ınformasııalyq agenttiktiń (qaz­TAG) dırektory boldy. Al 1960 jyly respýblıkalyq «Sosıalıstik Qazaqstan» gazetiniń redaktory bolyp taǵaıyndaldy. Bul qyzmetti ol 1969 jylǵa deıin atqardy. 1969 jyldan 1975 jylǵa deıin qazaq KSR Mınıstrler Keńesi janyndaǵy Televızııa jáne radıohabarlary jónindegi komıtet tóraǵasy boldy.

Ol birneshe ret Qazaqstan Kompartııasy Ortalyq Komıtetine múshe, Joǵarǵy Keńeske depýtat bolyp saılandy. Qazaqstan Jýrnalıster odaǵy basqarmasynyń tóraǵasy boldy.

Elimizge sińirgen eńbegi úshin K.Úsebaev Eńbek Qyzyl Tý, Qurmet Belgisi ordenimen marapattaldy, «Qazaqstan Respýblıkasynyń eńbek sińirgen mádenıet qyzmetkeri» ataǵy berildi.

Sońǵy jańalyqtar

Uqsas jańalyqtar