«Mamam Kýban jerinde ósken. Soǵys bastalǵanda mamamnyń ákesi Afanasıı Trýsh pen anasy Praskovıa Hmara ómirge Anna, meniń mamam Tatıana, inileri Afanasıı, Ivan, sińlisi Sofıany ákelgen bes balaly ýkraın otbasy bolypty. Nemister derevnıaǵa basyp kirip, ákesi Afanasıı men inisin kóz aldarynda atyp ketedi. Ekinshi inisi Ivan qutylyp shyǵady. Mamam sol soǵys jyldaryn eske alǵanda «derevnıamnyń tas-talqany shyqqany, ákem men inimniń qazasy úshin ketpes kek qaldy júregimde. О́z erkimmen maıdanǵa barýǵa surandym» deıtin», dep bastady sózin Begejanovtardyń kishi qyzy Lýıza. Sóıtken T.Trýsh keıin 1944 jyly 20 jasynda Tımoshevskaıa stansasyndaǵy maıdan gospıtaline medbıke bolyp qabyldanady.
Seıit Begejanov bolsa 1917 jyly dúnıege kelip, 1939 jyly Almatydaǵy pedagogıkalyq ınstıtýtty támamdaıdy. Pavlodar pedagogıkalyq ýchılıshesinde sabaq beredi. Soǵys bastalǵan kezde ásker qataryna shaqyrylyp, Stalıngrad shaıqasyna qatysady. 1943 jyly Qyzyl Juldyz ordenimen, I jáne II dárejeli «Otan soǵysy» ordenimen, birneshe medaldarmen marapattalady. Batalon komandıri bolypty.
Tatıana 4-shi Ýkraın maıdanyna qatysýshylar quramynda gospıtalge medbıke bolyp keledi. «Snarıad, bomba jarylysy qulaǵymnan kúni búginge deıin ketpeıdi. Shabýyl júrip jatqan aımaqtan jaralylardy alyp shyǵýǵa júgiremiz. Kóz aldymda talaı jaýynger mert boldy» dep eske alatyn mamamyz», deıdi Lýıza.
...1944 jyly gospıtaldi Rýmynııanyń Senaı stansasyna kóshiredi. Tatıana Trýsh medsestra bolyp júrgen gospıtaldy Kerchen buǵazy arqyly Rýmynııanyń Sıgat qalashyǵyna jetkizedi. Osy qalashyqty qorǵaımyn dep júrip urysta S.Begejanov aýyr jaralanady. «Joldas kapıtan! Siz jaralysyz! Sanıtarlyq ınstrýktor Trýshpyn», degen medbıke qyzdyń daýysyn estıdi. T.Trýsh bolsa batalon komandıri S.Begejanovty súıregen kúıi gospıtalge jetkizipti. Maıdanda týǵan mahabbat taǵdyry osylaı bastalady.
Gospıtalde keshkilik bı keshi ótedi eken. «Sanbatta» jatyp emdelip shyqqan kapıtan S.Begejanov bir kúni T.Trýshty bıge shaqyrady. Jas medbıke kombatpen bıleýge júreksingendikten, onyń qurbysyn qushaqtaı alyp, bılep ketedi. «Qarasam, eki kózi mende. Sodan bı keshinen soń kezdestik. Arada bir aıdaı ýaqyt ótkende kombat maǵan sóz saldy. Ákelerińe kelisim berip, qosyldyq ta, Esqaradan kelip biraq shyqtym ǵoı!» dep eske alýshy edi mamam», deıdi Lýıza.
Seıit atamyz ýkraın qyzymen qosylyp, úılengenderin aıtyp, ákesine hat jazady. Soǵys aıaqtalǵan soń jas jubaılar 1946 jyly Pavlodarǵa kelip jetedi. Aýyl turǵyndary Tanıa kelinderin kórip, kóńilderi tolady. Ýaqyt óte kele T.Trýsh aýylda dárigerlik qyzmet atqardy. Olardyń shańyraǵynda Jumabaı, Maksım, Erkinbaı, Marat, Murat, Bolat esimdi 6 ul, Alma, Roza, Svetlana, Lýıza atty 4 qyz dúnıege keledi. Begejanovtar áýletinen búginde 27 nemere, 8 shóbere órbip otyr. 1967 jyly 3 shildede T.Trýshke «Batyr Ana» ataǵy berildi.
Bala-shaǵanyń qyzyǵyna qanyp, áýletiniń máýeli báıteregindeı bolǵan Seıit atamyz ókinishke qaraı, 1990 jyly ómirden ótti. 2004 jyly Elbasy N.Nazarbaevtyń Jarlyǵymen T.Begejanova apamyzǵa «Altyn Alqa» tabystaldy. Araǵa jyl salyp, 2005 jyly sol kezdegi Ýkraına Prezıdenti L.Kýchma T.Begejanovany «60 rokiv vızvolennnıa Ýkrainı vid fashıstskıh zagarbnıkiv» degen medalmen marapattady.
О́mirdiń ashy-tushysyn bir kisideı kórip, úlgi tutar urpaq ósirgen Tanıa ájeı 87 jasqa kelgen shaǵynda ómirden ozdy. «Iá, mamam marqum, Esqara aýylynyń Tana ájeıi edi. Aýyldas aǵamyz Temirhan Ramazanov maıdanda týǵan áke-sheshemizdiń mahabbaty jaıly jazdy. Soǵys kezinde ákem men sheshemdi tabystyrǵan móldir súıispenshilik, mahabbattan biz ómirge keldik qoı. Qaıtys bolǵanda Tana Isahmet kelini dep jazyp, zıratyna jerledik. Ákemniń jáne enesiniń qasynda qatar jatyr. Men de, aǵa-apaılarym da Krasnodar ólkesinde, Kıevte turatyn sheshemniń týysqandarymen aralasyp turamyz. Bala kezimizde jazǵy demalys kúnderin paıdalanyp, Krasnodar men Kıevke jıi baratynbyz», deıdi Lýıza.
Soǵys órtin kórgen mahabbat taǵdyry mine, osyndaı. Seıit Begejanov pen ómirge 10 bala ákelgen Tanıa ájemizge arnap, ákimdik tarapy Esqara aýylynda, aýdan ortalyǵy Jelezınka aýylynda memorıaldyq taqta, mahabbattyń, erliktiń sımvoly retinde eskertkish ornatsa – urpaq atynan jasalǵan taǵzymnyń ulyq úlgisi bolar edi deımiz.
Pavlodar oblysy,
Jelezın aýdany
