Qazaqstan • 18 Aqpan, 2020

Maǵzum Myrzaǵalıev: Taıaýda birqatar ken ornynyń ónimi taýsylýy múmkin

40 retkórsetildi

2025-2040 jyldarǵa taman Orlovskoe, Maleevskoe, Tıshınskoe, Rıdder-Sokolnoe sııaqty ken oryndarynda paıdaly qazba qorlarynyń tolyqtaı sarqylýy kútilýde. Bul týraly búgin Úkimet otyrysynda Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty.

Búgingi Úkimet otyrysynda 2021-2025 jyldarǵa arnalǵan geologııalyq barlaýdyń memlekettik baǵdarlamasynyń tujyrymdamasy jaıly talqylandy.

«Prezıdent Qasym-Jomart Toqaevtyń tapsyrmasyna sáıkes Geologııalyq barlaýdyń 2021-2025 jyldarǵa arnalǵan memlekettik baǵdarlamasynyń tujyrymdamasy ázirlendi. Bul máselege Memleket basshysy byltyr 5 qyrkúıekte Atyraý qalasynda ótken munaı-gaz salasyna qatysty keńeste basa nazar aýdardy. Negizi elimizde 8 myńǵa jýyq ken orny tirkelgen. Onyń ishinde 317 kómirsýtek, ıaǵnı munaı, gaz, kondensat ken oryndary bar. Munan bólek, 910 qatty paıdaly qazbalar ken orny bolsa, 3 myńnan astamy keń taralǵan paıdaly qazbalarǵa tıesili. Sonymen qatar 4 myńǵa jýyǵy jerasty sýlary ken orny bar», - dedi mınıstr.

Onyń aıtýynsha, búgingi kúni birqatar ózekti másele kún tártibinde tur. Sonyń ishinde sońǵy onjyldyqta sarqylýy múmkin ken oryndaryn qalypqa keltirý jaıynda bolmaq.

«Atap aıtqanda, monoqalalardaǵy taý-ken kásiporyndarynyń shıkizat bazasynyń turaqsyzdyǵy, paıdaly qazba qorlarynyń azaıýy jáne «baıyrǵy» ken oryndarynda óndirý kóleminiń tómen deńgeıge túsýi ózekti bolyp otyr. Mysaly, Qyzylorda oblysynda jyl saıyn munaı óndirýdiń kólemi 1 mln tonnaǵa deıin tómendeýde. Osy másele taıaý arada Aqtóbe men Mańǵystaý oblystarynda da boljanýda. Sońǵy on jyldyqta Shyǵys Qazaqstandaǵy monoqalalarǵa jaqyn ornalasqan – Shemonaıha, Iýbıleıno-Snegırıhınskoe, Zyrıanovskoe iri qorǵasyn-myrysh ken oryndarynyń qory túgeldeı taýsylyp, jabyldy. 2025-2040 jyldarǵa taman Orlovskoe, Maleevskoe, Tıshınskoe, Rıdder-Sokolnoe sııaqty ken oryndarynda da paıdaly qazba qorlarynyń tolyqtaı sarqylýy kútilýde», - dedi Ekologııa, geologııa jáne tabıǵı resýrstar mınıstri Maǵzum Myrzaǵalıev.

Sońǵy jańalyqtar

Qarttar úıindegi qasiret

Aımaqtar • Keshe

Qazaq aqyny qyrǵyzsha jyrlandy

Rýhanııat • Keshe

Uqsas jańalyqtar