Qabyldaýǵa 65 azamat kelgen. Olardyń kótergen máseleleri negizinen turǵyn úı, jer telimderin berý, sharýashylyq daýlardy sheshý jáne basqa da aspektilerge qatysty boldy. Berdibek Saparbaev turǵyn úı máselesi tıisti zańdarmen retteletinin aıtyp, páter bólý kezegin jyljytý da belgilengen tártip pen erejelerge sáıkes qatań túrde júzege asyrylatynyn jetkizdi.
Merki aýdany, Surat aýylynyń turǵyndary jergilikti sharýa qojalyq basshylarynyń biriniń shekten asqan is-áreketin ákimge jetkizbek bolyp, shaǵym aıta kelgen eken. Aýyl turǵyndarynyń aıtýynsha, sharýashylyqtyń basshysy jer ıelerine eskertpeı, olarǵa tıesili jer telimderin óz atyna zańdastyryp alǵan. Bul rette Berdibek Saparbaev eger zań buzýshylyq anyqtalsa, bul máselemen oblystyq prokýratýra aınalysatynyn atap ótti.
Sonymen qatar ákim Merki aýdanyna barǵan issapary kezinde turǵyndardyń osy shaǵymyna egjeı-tegjeıli taldaý jasaıtynyn jetkizdi. Al, Berik Ýálıhanov ákimnen Merki aýdanynda ornalasqan Kenesary han eskertkishine baılanysty týyndaǵan túıtkildi máseleni sheship berýdi surady. Sonymen qatar, ol Taraz qalasyndaǵy mektepterdiń birine Kenesary hannyń esimin berý týraly usynysyn aıtty. Ákimmen kezdesýde bilim salasynyń ardageri Kamılıa Qojyqova salany damytý úshin bólinetin qazyna qarjysy tıimdi jumsalýy kerek ekenin aıtyp, ol mundaı jaǵdaı Talas aýdandyq bilim bóliminde kórinis taýyp otyrǵanyn, qarajatty maqsatsyz jumsaý áreketteri oryn alyp otyrǵanyn jetkizdi. О́z kezeginde Taraz qalasy, «Myńbulaq» shaǵynaýdany turǵyndarynyń tilek-ótinishin jetkize kelgen Rahatgúl Itqulova kópqabatty úılerdiń arasyna shaǵyn bıznestiń zańsyz nysany salynyp jatqan faktisi oryn alǵanyn aıtty. Sonymen qatar, Olga Pımenova Taraz qalasynda balalarǵa arnalǵan arnaıy demalys oryndary ashylsa degen tilegin jetkizse, Musatılla Tohanov ákimnen meıiz ben órik ónimderin daıyndaý boıynsha jobany júzege asyrýǵa kómek kórsetýin surady.
Kezdesýde kópshilik kótergen máseleler boıynsha tıisti basshylar jaýaptaryn berdi. Qabyldaý barysynda birqatar máseleler de sheshimin tapty. Al, Berdibek Saparbaev kóterilgen máseleler oń sheshimin tabýy úshin jeke baqylaýyna alatynyn jetkizdi.
Jambyl oblysy
