Qoǵam • 20 Aqpan, 2020

Nur-Sultan qalasynyń kópbalaly analary AÁK týraly oılarymen bólisti

51 retkórsetildi

Bıylǵy qańtardan bastap ataýly áleýmettik kómek jańa formatta taǵaıyndalyp, oǵan Nur-Sultan qalasyndaǵy 2 myńnan astam otbasy ótinish ótkizgen. Bul týraly Nur-Sultan qalasy ákimdiginiń baspasóz qyzmeti habarlady. 

Jańa formattaǵy AÁK mólsheri otbasynyń barlyq músheleri úshin jan basyna shaqqandaǵy kirister men kedeılik sheginiń arasyndaǵy aıyrmashylyq retinde anyqtalady. Jańa formattaǵy ataýly áleýmettik kómekti alýshylardyń biri – jeti balanyń anasy, «Altyn alqa» ıegeri Aıgúl Qoılybaeva. О́z sózinde kópbalaly ana AÁK arqyly balalarynyń tegin oqıtyndyǵyn atap ótti.

«Osydan 8 jyl buryn kúıeýimniń jumysy boıynsha elordaǵa Shardaradan qonys aýdardyq. Jubaıym tehnıkalyq qyzmet kórsetý stansııasy jumys jasaıtyn, men bala kútimi boıynsha úıde otyrdym. Biraq, ókinishke qaraı 2016 jyly ajyrasyp kettik. Az qamtylǵan otbasy retinde sol jyldan bastap ataýly áleýmettik kómekke ilindim. Minekeı, búgin jańa formattaǵy AÁK-ti alyp qýanyp otyrmyz, jeti balaǵa 138 851 teńge shyqty. AÁK arqasynda 2 balam kolledjde tegin oqıdy, shákirtaqy, jol júrý bıletterimen qamtylǵan. Mektepten de kóp kómek aldym. Balalaryma ystyq tamaq, mektep formasy men oqý quraldary tegin beriledi», - dep bólisti Aıgúl Qoılybaeva. Sondaı-aq kópbalaly ana tigin kýrsyna jazylyp, óz bıznesin ashýǵa nıetti ekenin bildirdi. «Qazirgi kezde tigin kýrsyna oqýǵa tirkeldim. Altaı Kólginov myrzanyń arqasynda Tursynzada hanymnyń sheberlik sabaǵyn oqyp, búginde tigin mashınasymen jastyq, quraǵymdy tigemin. Endi tek óndiris jaǵy qıynǵa túsip tur. Endigi maqsatym -  otbasylyq bıznesti ashý. Úlken ulym armany boıynsha pıssahana ashyp bergim keledi. Bıznes josparyn grant alýǵa tapsyrdyq, jaýabyn tosyp otyrmyz», - dedi ol.

Bes balanyń anasy Uldanaı Aıtqulova da búgin áleýmettik kómekti alǵanyna dán rıza. Elordaǵa 2008 jyly qonys aýdarǵan otbasy bolashaqta shashtaraz ashýdy josparlap otyr: «Elordaǵa alǵash kelgenimizde páter jaldaýdan qıyndyq kórdik. Qazir bul másele boıynsha týystarymyz kómek kórsetip júr. Jańa formattaǵy AÁK alýǵa qujat tapsyryp kúttim, keshe kómekti alýshylar tizimine ilingenimdi bildim. Balalardyń nesibesi shyǵar dep qýanyp otyrmyn. Bolashaqta joldasymmen birge salon ashyp, kásip dóńgeletsek dep otyrmyz. Bala kútimi boıynsha ázirge jumys jasamaımyn, biraq shashtaraz mamany kýrstaryn qarap júrmin», - deıdi elordalyq ana. Boljamdyq málimetterge sáıkes, osy jyly 4 myńnan astam otbasyny AÁK-pen qamtylady. Sondaı-aq ataýly áleýmettik kómekpen qatar, osy jyldyń 1 qańtarynan bastap kópbalaly otbasylarǵa olardyń tabystaryna qaramastan, memlekettik balalar járdemaqysy engizildi.

Sońǵy jańalyqtar

Shymkent: Sıfrly otbasynyń bir kúni

Ońtústik Qazaqstan • Keshe

Uqsas jańalyqtar