Zııaly qaýym ókilderi, jastar men stýdentter qatysqan kórmeniń ashylýynda oblys ákiminiń orynbasary Naýryzbaı Baıqadamov uly tulǵa ómirin tanyp-bilý, fılosofııasyn zerdeleý bir jyldyń aıasymen shektelmeýi qajettigin aıtyp ótti.
- Abaıdy rýhanı ómirimizdiń shamshyraǵyna aınaldyrý qoǵamdy izgilikke tárbıeleý úshin qajet. Semeı topyraǵynan Syrǵa jetken búgingi kóshpeli kórme osy maqsat jolyndaǵy sharanyń biri, – dedi ol.
«Jıdebaı-Bórili» memlekettik qoryq-mýzeıiniń aǵa ǵylymı qyzmetkeri Qýat Qıyqbaı ortaq iske úles qosqan qyzylordalyq áriptesterine alǵys aıtty.
Kórmede kóp kózine túsken qundy jádigerdiń biri 1933 jyly basylyp shyqqan Abaı shyǵarmalarynyń tolyq jınaǵy. Qýat Qıyqbaı dál osy Qyzylorda qalasyndaǵy «Qazaqstan» baspasynan shyqqan bul jınaq sol tusta búkil qazaq dalasyn eleń etkizgen úlken oqıǵa bolǵanyn aıtady. Sebebi, bul qazaq jerinde Abaı shyǵarmalarynyń alǵashqy basylýy bolatyn. Buǵan deıin ár jyldarda Sankt-Peterbýrg, Tashkent, Qazanda shyqqan kitaptarǵa aqyn týyndylarynyń birazy enbeı qalǵan edi. Sondyqtan da bul jınaqtyń ult tarıhyndaǵy máni zor.
Kópshilikke uly tulǵanyń ómiri men shyǵarmashylyǵyna qatysty qujattar men arhıvtik derekter, qundy qoljazbalar, fotosýretter, túrli jádigerler, ol oqyǵan arab, túrik, parsy, shaǵataı tilderindegi kitaptar tanystyryldy.
1885 jyly Semeı óńirinde mýzeı isi uıymdastyrylyp, Abaı oǵan dosy Nıfont Dolgopolov arqyly qazaq eliniń ómirine qatysty alpystan asa turmystyq zat tapsyrǵan. Sol jádigerlerden osy kórmege er, asataıaq, sybyzǵy, kise belbeý sekildi qundy dúnıeler qoıyldy.
Syr jerindegi kóshpeli kórme jumysy 1 naýryzǵa deıin sozylady.
Qyzylorda
