Aldaǵy sý tasqyny maýsymyna daıyndyq maqsatynda Sý resýrstary komıtetiniń basseındik ınspeksııalary TJ organdarynyń, jergilikti atqarýshy organdardyń jáne «Qazsýshar» RMK ókilderimen birlesip gıdrotehnıkalyq qurylystarǵa kózben sholyp tekserý júrgizdi. Inspeksııalar qajetti is-sharalardy ótkizý týraly uıǵarymdar men usynymdar berdi.
«Aldyn ala gıdrotehnıkalyq boljamǵa sáıkes, bıyl qar qory úlken bolǵandyqtan ortasha norma jekelegen jerlerde 40-100%-ǵa joǵary. 7 óńir anyqtaldy, atap aıtsaq: Nur-Sultan qalasy, ShQO, SQO, Qaraǵandy, Pavlodar, Aqmola jáne Qostanaı oblystary. Bizde mınıstrlikte sý tasqynyna qarsy komıssııa qurylyp, tıisti josparlar ázirlendi. Úlken sý tasqyny oryn alǵan jaǵdaıda bizdiń sý qoımalarymyz tranzıttik tártipte jumys isteıtin bolady», — dedi S. Gromov.
Onyń aıtýynsha, sý qoımalaryna monıtorıng táýlik boıy júrgiziledi.
«Aldaǵy sý tasqyny maýsymyna daıyndyq maqsatynda biz tótenshe jaǵdaılardyń týyndaý qaýpi asa joǵary jerler kórsetilgen karta jasadyq. Jaýǵan qardy eskere otyryp, ózen arnalaryn tazalaý jumystaryn júrgizý qajet. Barlyǵy baqylaýǵa alynǵan, bógetterdi shaıyp ketý qaýpi ázirge baıqalmaıdy», — dedi vıse-mınıstr.
Búginde ıesiz GTQ boıynsha másele mınıstrliktiń erekshe baqylaýynda.
«2017 jyldan bastap jergilikti atqarýshy organdar aýqymdy jumystar atqardy, ıesiz qalǵan nysandar sany 49-dan 10-ǵa deıin azaıdy, degenmen bul jumysty áli de jalǵastyrý qajet», — dedi ol.
Sonymen qatar mınıstrdiń orynbasarynyń baǵalaýynsha, atalǵan ıesiz sý qoımalary búginde esh qaýip tóndirmeıdi.
Atap ótken jón, respýblıka boıynsha 463 gıdrotehnıkalyq qurylysty jóndeý qajet. Osy jyldyń sý tasqyny kezeńine daıyndyq maqsatynda 2019 jyldyń kúzinde óńirler 163 shaqyrym qorǵanys bógetterin salý jáne jóndeý, jaǵalaýdy bekitý, túbin tereńdetý, 330 shaqyrym sý tasqyny qaýpi bar ózen arnalaryn túzetý, 116 shaqyrym sý burý arnalaryn ornatý, 2006 shaqyrym arnany, aryqtardy, avtomobıl jáne temir jol kópirleri astyndaǵy 10314 birlik sý ótkizý qurylystaryn tazalaý jumystaryn júrgizdi.
Sý tasqynynyń aldyn alý jáne saldaryn joıý úshin 13,5 myń tonna janar-jaǵar maı, 152,6 myń tonna ınertti materıaldar, 840 myń qum salynǵan qap jáne 47 tonna jarylǵysh zattar qory daıyndaldy, eldi mekenderden 8,8 mln tekshe metrden astam qar shyǵaryldy. Evakýasııalanǵan halyqty qabyldaıtyn 1707 pýnkt daıyndaldy, evakýasııalaý baǵyttary jańartyldy, jalpy sany 9 myń adamnan jáne 1730 birlik tehnıkadan turatyn IIM kúshteri men quraldary daıyndaldy.
