Bizdiń ata-babalarymyzdyń Uly dalaǵa alǵash ret aıaq basýy sonaý HIII ǵasyrda tirkelgen eken. Iаǵnı Aral mańy arqyly Syrdarııa men Ile alqabyna tuıaq iliktirip, sodan soń Balqash kóliniń tusynan ótken polıaktar búginde táýelsiz elimizdiń ajyramas bir bóligine aınaldy.
Olar ortaq otanymyz Qazaqstannyń damýy men ósip-órkendeýine óz úlesterin qosýda. 1992 jyldyń 6 sáýir kúni Qazaqstan men Polıak respýblıkalary arasynda dıplomatııalyq qarym-qatynas ornatyldy. Biz qazaqstandyq polıak etnosynyń ókilderi sol kezeńnen beri qos memlekettiń senimdi áriptesteri retinde tyǵyz qarym-qatynastar men ózara baılanystar jasap kele jatqanyna súısinemiz. Bul jaǵymdy jaıt mereıimizdi ósirip, janymyzdy jadyratady.
Sondaı-aq 1994 jyldyń 20 naýryzynda Polshanyń elshiligi Qazaqstanda ashylsa, 2000 jyldyń qazanynan bastap Polshada Qazaqstannyń elshiligi óz jumysyn bastady. Qazaq topyraǵynda polıaktardyń alǵashqy birlestigi sonaý sekseninshi jyldary quryla bastasa, Aqtóbe oblysynda mundaı qoǵamdyq uıymnyń qaz-qaz basyp, qyzmet jasaı bastaǵanyna bıyl 20 jyl tolyp otyr. Taǵdyrdyń qazaq halqymen birge bolýdy jazǵany bizdiń baqytymyz jáne alańsyz ǵumyrymyz ben eseli eńbegimiz dep senimmen aıta alamyz. Uzaq jyldardan beri qos halyq ókilderiniń arasynda tıtteı bolsa da jaryqshaq, syzat túspegeni atap aıtýǵa turarlyq másele dep sanaımyz. Ásirese, ultaralyq tatýlyqty saqtaýǵa búgingi merekeli ómir súrip otyrǵan qoǵamdy qalyptastyrýǵa Elbasynyń qosqan úlesi ólsheýsiz.
Bizdiń bilýimizshe, álem halyqtary arasynda qazaq halqyn erekshelendirip turatyn jaıt – olardyń boıyndaǵy sózben aıtyp jetkizgisiz baı adamgershilik qasıetteri. Memleket quraýshy ulttyń eshkimdi jatsynbaıtyn márt minezi – elimizdegi tatýlyq pen kelisimniń basty kepili. Qazaq halqynyń boıyna burynnan ornyqqan qonaqjaılyq pen qarapaıymdylyq ta ózge otandastarǵa shýaǵyn shashyp keledi.
Mine, osyndaı kek, dyq saqtamaıtyn, meıirimi men keshirimi mol, shynaıy, adal dostyqty tý etip kóterip, ony baǵalaı biletin halyqqa aıtar alǵysymyz sheksiz. Memleket quraýshy ultty ózgelerden daralap turatyn taǵy bir qasıeti – jasaǵan jaqsylyǵy men qaıyrymdylyǵy úshin eshkimnen eshqashan eshteńe suramaıtyndyǵy, ony buldamaıtyndyǵy. Sondyqtan búgingi Alǵys aıtý kúnin aıtýly data etip belgilegen Tuńǵysh Prezıdent Nursultan Nazarbaevqa jáne sabaqtastyq saltyn saqtaı bilgen Memleket basshysy Qasym-Jomart Toqaevqa polıak etnomádenı birlestigi atynan sheksiz rızashylyǵymyz ben alǵysymyzdy jetkizgimiz keledi.
Biz úshin alǵys kúni – tatýlyq pen ózara kelisimdi pash etetin erekshe kún. Endeshe, osyndaı mereıli sátte zamana zapyrany qazaq jerine tap keltirýge májbúrlegen myńdaǵan jandardy jatsynbaı qarsy alyp ári qolyndaǵy rızyq-nesibesin olarmen bólisken Uly dalanyń búgingi muragerlerine taǵy bir márte basymyzdy ıip, alǵysymyzdy aıtý artyqtyq etpeıdi.
Elena SIBÝLSKAIа,
Aqtóbe oblysy polıaktarynyń «Svıatlo» etnomádenı birlestiginiń tóraıymy
AQTО́BE
