Aımaqtar • 02 Naýryz, 2020

Darhan halqyma rızamyn

19 retkórsetildi

Elimizde birneshe jyl qatarynan mańyzdy da aýqymdy mereke – Alǵys aıtý kúni atalyp keledi. Kóktemniń alǵashqy kúni, ıaǵnı 1 naýryzda merekelenetin bul kún – eljandylyqtyń, qazaqstandyq patrıotızmniń jáne ymyra birliktiń kórinisi. Bul – taǵdyr tálkegimen qýǵynǵa ushyrap Qazaqstanǵa qonys aýdarǵan etnostardyń Qazaq eline rızashylyǵy men bir-birine degen rııasyz qurmetiniń kúni.

Biz bul kúni ózegimizden teppeı, basymyzdy óz shańyraǵynyń astyna biriktirip, qanatymen sý sepken qarlyǵashtaı qamqorlyǵyna alǵany úshin Qazaq eline alǵys aıtamyz. Qıyn-qystaý ýaqytta bir tilim nanymen bólisip, súıeý bolǵan qazaǵymyzdyń jerinde sol dostyq, sol kelisim men beıbitshilik saqtalyp keledi. Qazaq jeri – bizdiń Otanymyz.

Adamgershilik qarym-qatynastyń úlgisine aınalǵan bul aıshyqty mereke – Qazaqstan Respýblıkasynyń Tuń­ǵysh Prezıdenti Nursultan Nazarbaev­tyń Jarlyǵymen Qazaqstan halqy Assambleıasynyń qurylǵan kúnimen sáıkes merekelenedi. Elimizde turatyn etnostar bul aıtýly kúnniń mán-mańy­zyn óte jaqsy biledi ári qurmetteıdi. Stalındik rejim kezindegi jyldarda 800 myńǵa jýyq nemis, 100 myń polıak, Soltústik Kavkaz halyqtarynyń 550 myń ókili, Qıyr Shyǵystaǵy 18 myń koreı otbasy Qazaqstanǵa qonys aýdarǵan. Vagondarǵa tıelip, aıdalaǵa ákelinip tastalǵan olar qazaq otbasylarynan pana tapty. Ozbyr saıasattan zobalań kórip, japa shekken túrli etnostar Qazaq eline osylaısha sińisip ketti.

«Otanyn satqandardyń jubaılary» qatarynda bolǵan Gertrýda Plataıstyń esteliginiń jelisimen jazylǵan «Qurt – qasıetti tas» oqıǵasyn barshamyz jaqsy bilemiz. Dárýmenge baı, ashyq­qanǵa qorek, ash-jalańash bala-shaǵa men toryqqan áıelderge talshyq bolǵan qazaqtyń ulttyq taǵamy qurt – shynynda da qasıetti.

Ulttar men ulystardyń tatýlyǵy men birligin jańa deńgeıge kótergen erekshe mereke respýblıka boıynsha, ár óńirde dástúrli túrde atalyp ótiledi. Bul aıtýly kúnniń negizi «О́z tarıhyńdy umytpa jáne ony maqtan et» dep atalady. Aq peıil, adal kóńil Qazaq eli baýyrmaldyǵynan esh tanǵan emes. Elbasynyń bastamasymen ómirge kelgen bul merekeniń sıpaty da sol. Bul mereke bizge osy turǵydan asa qymbat. Elordamyzdyń 20 jyldyǵyna oraı, Qaraǵandy oblysy bıiktigi 14 metr «Qazaq eline myń alǵys» monýmentin syıǵa tartqan bolatyn. Onda koreı, kavkaz, orys balalaryn baýyryna basqan qazaq áıeliniń músini ornatylǵan. Monýmenttiń ashylý saltanatynda Tuńǵysh Prezıdent Nursultan Nazarbaev Qazaqstan tarı­hyndaǵy halyq jadynda saqtalǵan qı­ly kezeńderdiń mańyzdylyǵyna toq­talǵan bolatyn. «Jaqsylyqty baǵalaı bilip, oǵan jaqsylyqpen jaýap qaıtarý ózara syılastyq pen qurmetke bastaıdy. Qundylyqtardyń qadirine jete alǵan eldiń keleshegi kemel», degen edi.

Búginde Qazaqstan halqy Assam­bleıa­sy san alýan etnostardy azamattyq tur­ǵyda toptastyrǵan qýatty qural­dar­dyń biri. Jalpy alǵanda, óz qyz­meti­­niń alǵashqy kúnderinen bastap Qazaq­stan hal­qy Assambleıasy eli­mi­zdegi etnos­tar­­dyń mádenıetiniń qaı­ta jań­ǵyrýy men damýyna eleýli úles qosyp kele­di. Kúr­deli zamandy ıyq tirese birge eń­­serip, Táýelsiz Qazaq­standy qurý jolyn­­da aıanbaı ter tókken elimizdiń bar­lyq aza­mat­­tynyń bir-birine qurmet bildire­tin kúni qutty bolsyn! Qazaq eline myń alǵys!

 

Ývaıs DJANAEV,

Qazaqstan halqy Assambleıasy tóraǵasynyń orynbasary,

«Vaınah» cheshen-ıngýsh etnomádenı birlestiginiń tóraǵasy

 

Qaraǵandy oblysy

 

Sońǵy jańalyqtar

Juma: Almatyda 28 indet oshaǵy karantınde tur

Ońtústik Qazaqstan • Keshe

Almatyda zerthanalar sany artady

Ońtústik Qazaqstan • Keshe

Uqsas jańalyqtar