«Jeti múshel buryn jaryq kórgen bul gazetter alystaǵy aýylda qalaısha mini quramaı saqtalyp qalǵan?» – Qarapaıym aýyl mýzeıindegi qundy jádigerdi kórgen adamnyń oıyna eń aldymen keletin saýal osy.
- Osydan birer jyl buryn Jánibek aýdany ortalyǵynda ornyna jańa úı turǵyzý úshin bir kóne ǵımaratty ıesi buzǵan bolatyn Sol kezde eski esiktiń taqtaılary arasynan bir býma gazet shyqqan eken. Ony bizdiń kitaphanashymyz Laýra Aıýpova kórip qalyp, attaı qalap surap alǵan edi. Sodan beri bizdiń mýzeıdiń eń baǵaly buıymdarynyń biri retinde kórmede tur, - deıdi mektep dırektory Serik Sıdaǵalıev.
Latyn árpimen shyqqan «Sosıalıstik Qazaqstan» gazetiniń 1938 jylǵy qarasha aıyndaǵy №254, 259, 261, 262, 263, 264, 267, 268, 269, 286 sandary sol kúıinde búlinbeı saqtalǵan. Bul kezeń KSRO-da gazet basý isi barynsha jolǵa qoıylǵan, gazettiń ár sanynda fotosýret basylǵan, «halyq jaýlarynyń» qalyń tobyn qaýsatyp úlgerip, sosıalıstik damýdyń urandy jolyna túsken alasapyran ýaqyt edi. Sarǵaıǵan paraqtardan sol zamannyń lebi áli esip turǵandaı...
Bul gazetterdi esiktiń qýysyna kim tyqqany da belgisiz. Tek bir gazettiń syrtynda karandashpen «Detdom» dep jazylypty. Shamasy kóne ǵımarat sol kezde jetim balalardy panalatqan qazyna úıi bolsa kerek.
Búgingi Talov aýyly – burynǵy Ishki Qazaq ordasy – Bókeılikke qaraǵan Talópke qısymynyń aýmaǵynda jatyr. Aqyn-aǵartýshy Ǵumar Qarashty jaýlary qylyshtap óltirgen Qunanshapqan aýyldyń irgesinde. 5 shaqyrymda memlekettik shekara – Reseı Federasııasy bastalady. Belgili dáriger, obaǵa qarsy kúresýshi Májıt Shombalovtyń ataqonysy da osy óńirde. Osyndaı tarıhı aýylda mektep murajaıy osydan dál 10 jyl buryn – 2010 jyly ashylǵan bolatyn. Búginde munda 200-diń ústinde jádiger jınaqtalǵan. Mektep oqýshylary el men jer tarıhyna jetik, patrıot bolyp ósip keledi.
Batys Qazaqstan
