Ol 1866 jyly 25 naýryzda Semeı oblysy Qarqaraly ýezi Toqyraýyn bolysynyń 7-shi aýylynda dúnıege kelgen. Bul qazirgi Jezqazǵan oblysy, Aqtoǵaı aýdanyna qarasty Qaratal aýyly. Ol qazaqtyń aqyrǵy hanynyń biri Bókeıden taraǵan urpaqtyń tórtinshi býyny, Bókeı hannyń shópshegi.
Álıhan Bókeıhan – XX ǵasyrdyń bas kezinde qazaq dalasynda keńinen qanat jaıǵan ult-azattyq «Alash» qozǵalysynyń negizin qalaýshy jáne jetekshisi, Alashorda ulttyq aýtonomııasy Halyq keńesiniń tóraǵasy boldy.
Sondaı-aq ekonomıst, tarıhshy, etnograf, ádebıetanýshy retinde tanyldy. Qazaq eginshiligi men mal sharýashylyǵy, sonyń ishinde qazaqtyń sıyr, qoı jáne jylqy sharýashylyǵy týraly irgeli zertteýler jarııalady. Qazaq tarıhy, etnografııasy, ádebıeti men folklory týraly júzdegen maqalalar jazyp, «Qozy Kórpesh – Baıan Sulý», «Er Tarǵyn», «Er Saıyn» sekildi halyq aýyz ádebıetiniń birneshe úlgilerin jınaqtyp, baspa betine shyǵardy.
1937 jyldyń 27 qyrkúıeginde Qazaqstan Keńestik Respýblıkalar Odaǵy Joǵarǵy Sotynyń Áskerı Kollegııasy «vozglavlıal kontrrevolıýsıonnýıý borbý protıv Sovetskoı vlastı, ýstonovıl svıazı s rýkovodıtelıamı terrorıstıcheskogo sentra v Kazahstane ı v Moskve» degen jalǵan aıyppen qazaqtyń ult-azattyq qozǵalysynyń negizin qalaǵan asa kórnekti qoǵam jáne memleket qaıratkeri, ǵulama ǵalym Álıhan Nurmuhameduly elinen tys jerde – Máskeýde ólim jazasyna kesilsin degen úkim shyǵardy.
